1 Chiwilampeʼ, xcʼulmataj chi aretak ri Jesús xuqʼuis u bixic we tzij riʼ, xebucaʼyej ri qʼuialaj winak ri qui sutim rij, xubij chque: Chiwilampeʼ, cäketet chi ri nu kʼijal.

2 Quinwilo chi man cʼo tä ri u chukʼab ri iwanimaʼ, chi man quixcuin taj che u chʼobic conojel tak nu tzij, ri takom chwe rumal ri Tataxel rech quinbij chiwe wacamic.

3 Rumal riʼ, jix cho tak iwachoch, chichomaj pa iwanimaʼ ri tzij ri nu bim, chitaʼ u tokʼob ri Tataxel pa ri nu biʼ in, rech quichʼobo. Chisucʼumaj cʼu iwib rucʼ i noʼjibal che ri kʼij re chuek, cʼu quinpe chi jumul na iwucʼ.

4 Wachanim cʼut, quinbe na chilaʼ rucʼ ri Tataxel, xukujeʼ quinbe chnucʼutic wib chquiwäch ri sachinak tak rijaʼlil ri Israel. Rumal rech chi are cʼu riʼ man e sachinak tä chuwäch ri Tataxel. Areʼ cʼut retaʼm jawijeʼ e u cʼamom bic.

5 Xcʼulmataj cʼu riʼ chi tzijoninak chi jewaʼ ri Jesús, xebucaʼyej jumul chic ri qʼuialaj winak ri qui sutim rij, xrilo chi tajin quebokʼic. Sucʼum xquicaʼyej je tä ne jun tabal tokʼob che chi cäcanaj chi na jutzʼit cucʼ.

6 Xubij cʼu chque: Sibalaj quel nu cʼux chiwe chupam ri nu tiojil.

7 ¿La cʼo jujun yawabib chixol? Chebicʼamaʼ ulok. ¿La cʼo jujun cächʼocnaj iwucʼ, o moyab, o ri cʼäx tak qui kʼab, o socotajinak, tʼoyab, esatal jun qui kʼab, cakän, o ri qui rikom xaʼ apachique cʼäx? Chebicʼamaʼ ulok, ri in quebincunaj cʼu na, rumal rech chi quel nu cʼux chiwij. Cänojisax cʼu riʼ chupam ri ixcoʼl nu tiojil che tokʼobisan wächaj.

8 Quinnabej cʼut chi quirayij chi quincʼut jas ri nu banom chque ri iwachalal ri e cʼo pa Jerusalén, rumal rech chi quinwilo chi utz u beyal ri i cojobal. Rumal cʼu riʼ quixincunaj na.

9 Xcʼulmataj cʼut chi aretak u bim chi waʼ, ri qʼuialaj winak xebe ocʼok cucʼ ri qui yawabib y ri qui rikom jun cʼäx, y ri quechʼocnajic, xukujeʼ cucʼ ri qui moyab, y ri qui memib, xukujeʼ cucʼ conojel ri qui rikom apachique cʼäx. Kas xebucunaj chquijujunal je jas xecʼam ulok che.

10 Kas conojel cʼut xquimej quib che cakän, xquikʼijilaj, chi e cunatajinak chi e tzʼakat quebanic. Conojel cʼu riʼ ri xecuinic xepe ulok che, rumal rech chi e cʼo qʼuialaj winak, areʼ xquitzʼumaj ri rakän. Je cʼu waʼ, xquijaʼaj ri rakän rucʼ ri u waʼl qui bokʼwäch.

11 Cʼäte cʼu riʼ, xutak chque chquicʼamaʼ ulok ri alaj tak calcʼual.

12 Xequicʼam cʼu ulok ri alaj tak calcʼual, xequiyaʼo co ri ulew chi qui sutim rij, ri Jesús tacʼalic chquixol. Ri qʼuialaj winak cʼut xquiyaʼ qui cʼolbal cʼä xecʼamtaj ulok conojel rucʼ.

13 Xcʼulmataj cʼu riʼ chi aretak e cʼamtajinak chi rucʼ, xtaqʼuiʼ ri Jesús chquixol, xtakan chque ri winak chi quexuquiʼc ulok cho ri ulew.

14 Xexuquiʼ cʼut cho ri ulew. Cʼäte cʼu riʼ, xchʼekow ri Jesús pa ranimaʼ xubij: Tataxel, sachinak nu cʼux rumal rech ri quetzelal ri winak ri e aj ri uwo rachoch ri Israel.

15 Aretak u bim chi we tak tzij riʼ, ri areʼ xukujeʼ xxuquiʼc cho ri ulew. Kastzij, xuban chʼawem rucʼ ri Tataxel, y man yatal taj cätzʼibax jas ri xubij pa ri u chʼawem. Ri qʼuialaj winak cʼut ri xetowic areʼ xquiyaʼ kʼalajisabal re.

16 Jewaʼ cʼu riʼ ubeyal cäquiyaʼ kʼalajisabal: Mawi jumul ilom che bokʼwächaj, mawi tom che xiquinaj tak ri nimalaj mayilaj jastak ri xkilo y xkato, are xtzijon ri Jesús che ri Tataxel.

17 Man cuyaʼ taj chi cächʼawic jun akʼaj, mawi chi cätzʼibaxic rumal jun achi, mawi chi cächʼobic pa canimaʼ ri winak ri nimalaj mayilaj jastak ri xkilo y xkato ri xtzijon ri Jesús. Man cʼo tä cʼu jun ri cäcuinic che u chʼobic ri quicotemal ri xunojisaj ri kanimaʼ aretak xkata ri u chʼawem ri xuban rucʼ ri Tataxel rumal kech.

18 Xcʼulmataj cʼu riʼ chi ri Jesús xuqʼuis u banic ri u chʼawem rucʼ ri Tataxel, cʼäte riʼ, xwalajic. Tzare sibalaj nim na xequicotic ri qʼuialaj winak, rumal riʼ, xekʼiʼtajic che quicotemal.

19 Xcʼulmataj cʼut xtzijon ri Jesús chque, xutaʼ chque chewalijok.

20 Xewalaj cʼu cho ri ulew, xubij cʼu chque: Ix tewichim rumal rech chi cʼo i cojobal. Wacamic cʼut chiwilampeʼ, tzʼakat ri nu quicotemal.

21 Aretak u bim chic we tzij, xokʼic, y ri qʼuialaj winak xquilo chi jewaʼ xbanic. Cʼu ri areʼ xebuchap ri alaj calcʼual, y xebutewichij chquijujunal, y xuban chʼawem rucʼ ri Tataxel rumal quech.

22 Aretak u banom chic waʼ, xokʼic chi jumul.

23 Xtzijon cʼut chque ri qʼuialaj winak, xubij chque: Chiwilampeʼ ri tak iwalcʼual.

24 Aretak xquiyaʼ qui bokʼwäch chquicaʼyexic, kas xecaʼy chicaj, y xquilo u jakic ri uwo caj. Xequilo angelib ri xekaj ulok chicaj je tä ne e cʼo chuxol jun kʼakʼ. Xekaj ulok, xquisutij quij ri alaj acʼalab, sutim quij jun kʼakʼ, cʼu ri angelib xequitewichij.

25 Ri qʼuialaj winak kas xquilo, kas xquito, y xquiyaʼo kʼalajisabal. Quetaʼm chi kastzij ri qui kʼalajisabal rumal rech chi conojel kas xquilo y xquito. Are cʼu riʼ dos mil quinientos winak ri xecʼojiʼ chilaʼ. Are riʼ e achijab, e ixokib, y acʼalab.