1 Kastzij, kastzij quinbij chiwe chi e cʼo chic nicʼaj nu chij ri man e rech tä we ulew riʼ, mawi e rech ri ulew Jerusalén. Mawi e rech majun ulew chunakaj ri jawi in cʼolinak wi chubanic ri lokʼalaj chac.

2 Ri e areʼ ri quebintzijoj ri majaʼ qui tom nu chʼabal, mawi jumul nu cʼutum wib chquiwäch.

3 Tzare nu cʼamom u takbal ri Tataxel, chi quinopan na cucʼ, cäquita na nu chʼabal, y queriktaj na chquixol ri nu chij. Je cʼu waʼ rech chi cʼo jun chijel, y xaʼ jun ajyukʼ. Rumal cʼu waʼ quincʼut wib chquiwäch.

4 Quintakan chiwe chi chitzʼibaj tak we tzij are benak chic ri in, rech quecʼolic, y rech chi ri Gentilib cäquicʼamo. Ri nu winak pa Jerusalén are ri in quilom, ri xecʼojiʼc wucʼ aretak xinban ri lokʼalaj nu chac. We tä ri e areʼ man cäquitzʼonoj tä che ri Tataxel pa nu biʼ chucʼamic quetamabal rumal ri Uxlabixel chiwij ix, y chquij ri nicʼaj ijaʼlil chic ri man etamatal tä chquiwäch, ri Gentilib cʼut cäquicʼam na ri u tzʼakatisaxic ri lokʼalaj nu tzijobal. Je cʼu riʼ, ri u nicʼajil ri quijaʼlil ri nu winak pa Jerusalén quejabutaj na apan cho ri uwächulew rumal rech chi man quecojon taj. Jeriʼ cʼut, cumal ri Gentilib quetijox na ri nu winak che jun etamabal chwij ri in, ri Esal qui mac.

5 Cʼäte cʼu riʼ, quebinmulij na tzpa ri cajib tak u cʼutbal ri uwächulew. Cʼäte cʼu riʼ, quintzʼakatisaj na ri yabal tzij ri xban rumal ri Tataxel chque conojel ri winak ri e aj uwo ri rachoch ri Isreal.

6 Tewichim na ri Gentilib rumal rech chi quecojon chwe rumal ri Uxlabixel, ri cäyaʼow kʼalajisabal chque chwe ri in, y che ri Tataxel.

7 Chiwilampeʼ, cächa ri Tataxel, rumal ri qui cojobal ri Gentilib, y rumal rech chi ri ix man quixcojon taj, ix ri aj uwo rachoch ri Israel, je baʼ, ri kastzij copan na cucʼ ri Gentilib pa ri qʼuisbal tak kʼij, rech cäcʼut chquiwäch, rech cätzʼakatisax we jastak riʼ.

8 Tzare cʼut, cächa ri Tataxel, tokʼob qui wäch ri Gentilib ri man quecojon taj. Rumal chi e petinak cʼu waral cho ri u wäch we ulew riʼ, e qui jabum cʼut ri nu winak ri e aj uwo rachoch ri Israel. Are cʼut ri nu winak ri e aj ri uwo rachoch ri Isreal e qʼuiaktajinak apan chquixol, e tacʼaletajinak cumal.

9 Rumal cʼut chi ri Tataxel cutokʼobisaj qui wäch ri Gentilib, cukʼat tzij ri Tataxel paquiwiʼ ri nu winak ri e aj uwo rachoch ri Israel. Kastzij, kastzij quinbij chiwe, chi aretak banom chic ronojel waʼ, y nu banom cʼut chi cäsocotaj qui wäch nu winak ri e aj uwo rachoch ri Isreal, chi cäcʼajisax qui wäch, chi quecämisaxic, chi queqʼuiak apan chquixol, chi quetzelax qui wäch cumal, chi cäban tak cʼäxalaj xokʼonic chquiwäch ri winak, y chi cäqʼuiakic cʼäxalaj tzij paquiwiʼ rech quetzʼbex qui wäch—

10 Je cʼu waʼ, cätakan ri Tataxel chi quinbij chiwe: Cäpe na ri kʼij aretak ri Gentilib quemacun chrij ri lokʼalaj nu tzijobal. Cäquinimarisaj na quib pa canimaʼ paquiwiʼ conojel tak ri tinimit, y paquiwiʼ conojel ri winak ri e cʼo cho ronojel ri uwächulew. Jeʼ, quenojisax na che ronojel tak banow tzij, che subunic, y xukujeʼ che etzelal. Jeʼ, cäquiban na quieb qui wäch, y quecämisanic, y cäquiban itzelalaj itzibal, y we quemacun cucʼ ixokib, y cäquiban itzel tak jastak chi cʼuyal chquiwäch ri winak, y we tä cäquiban ronojel waʼ, cäquixutuj ri u tzʼakatisanic ri lokʼalaj nu tzijobal, chiwilampeʼ, cächa ri Tataxel, in quinwesaj bic ri u tzʼakatisanic ri lokʼalaj nu tzijobal chquixol.

11 Cʼäte cʼu riʼ quinnatajisaj na nu yabal tzij ri xinban chque ri nu winak, ri e aj ri uwo rachoch ri Israel, quincʼam na ulok ri lokʼalaj nu tzijobal chquiwäch.

12 Quincʼut na chiwe, lokʼalaj uwo rachoch ri Israel, chi ri Gentilib man cʼo tä na qui chukʼab piwiʼ. In cʼut quinnatajisaj na ri yabal tzij ri xinban ulok chiwe, ix aj uwo rachoch ri Israel, y quixoc na che ri retamabal u tzʼakatisaxic ri lokʼalaj nu tzijobal.

13 We tä cäquiqʼuex na qui cʼux ri Gentilib, y we tä quetzelej na wucʼ, kastzij queriktaj na cucʼ ri nu winak, O rachoch ri Israel.

14 Ri in cʼut man quinyaʼ tä na chi ri nu winak, ri e aj uwo rachoch ri Israel, quekaj na pa qui kʼab rech chi quequitacʼalej, cächa ri Tataxel.

15 Tzare we man cäquitzolkʼomij tä quib wucʼ, y we man cäquitatabej tä ri nu chʼabal, in cʼut quinyaʼ na chque, kas jeʼ, quinyaʼ na chque nu winak, ri e aj uwo rachoch ri Israel, chi quekaj na paquiwiʼ, quequitacʼalej na cʼut. Je cʼu waʼ, quebux na je tä ne atzʼam ri man cʼo tä chi ri u tzayil. Kastzij man cʼo tä u patan, cäqʼuiak apan, cätacʼalex cʼu riʼ che cakän ri nu winak, ri e aj uwo rachoch ri Israel.

16 Kastzij, kastzij quinbij chiwe chi jewaʼ u takom chwe ri Tataxel: Chayaʼ na we ulew chque we winak che quechbal.

17 Cʼäte cʼu riʼ, quetzʼakatisax na ri u tzij ri Isaías, ri cubij:

18 Ri chajinelab iwe cäquiban na nim ri qui chʼabal. Junam qui chʼabal quebixon na, rumal rech chi cäquil na bokʼwächaj che bokʼwächaj pa ri u cʼamic ulok jumul ri Sión rumal ri Ajawaxel.

19 Chixquicotok, junam chixbixonok, ix ri tzʼinowinak tak cʼolbal pa ri Jerusalén, rumal rech chi ri Ajawaxel u cuʼbisam qui cʼux ri u winak, e u colom ri e aj Jerusalén.

20 Ri Ajawaxel u chʼanabam ri lokʼalaj u kʼab che qui bokʼwäch conojel tak ri tinimit. Conojel winak cʼut ri e cʼo pa tak u cʼulbat ri ulew, quilow ri u colotajic ri Dios.