1 Xcʼulmataj cʼu riʼ chi ri u tijoxelab ri Jesús xebinic, xquitzijoj jas ri quilom qui tom. Xquiban ri kasbal xeʼ jaʼ pa ri u biʼ ri Jesús. Xcʼulmataj chi aretak tajin cäquiban ronojel waʼ, xquimulij quib ri tijoxelab, junam xquiban jun mayilaj chʼawem rucʼ ri Dios, junam xquiban majwaʼim.

2 Cʼu ri Jesús xucʼut rib chi jumul chquiwäch, rumal ri e areʼ tajin cäquiban chʼawem rucʼ ri Tataxel pa ri u biʼ. Xpe ri Jesús, xtaqʼuiʼ chquixol, xubij chque: ¿Jas quiwaj chi quinyaʼ chiwe?

3 Ri e areʼ xquibij che: Kajaw, cäkarayij chi cäcʼut la chke jachique u biʼ ri cäkacoj na che we winakil ri, rumal chi jalajoj qui chomanic ri winak chrij we jasäch.

4 Ri Ajawaxel cʼut xubij chque: Kastzij, kastzij quinbij chiwe: ¿Jasche quechʼachʼat ri winak y cʼo jalajoj qui chomanic chrij waʼ?

5 ¿La man qui siqʼuim ri lokʼalaj tak tzij ri cäquibij chi rajwaxic quicʼam piwiʼ ri u biʼ ri Cristo, are ri nu biʼ in? Rumal we biʼaj riʼ, quixsiqʼuix na pa ri qʼuisbal kʼij.

6 Jachin cʼut ri cucʼam nu biʼ puwiʼ, y cukʼiʼ cʼä pa ri qʼuisbal kʼij, are riʼ cäcolotaj na pa ri qʼuisbal kʼij.

7 Rumal laʼ, ronojel ri quibano, chibanaʼ pa ri nu biʼ in. Je cʼu riʼ, chicojoʼ nu biʼ che we winakil. Chibanaʼ chʼawem rucʼ ri Tataxel pa ri nu biʼ rech cutewichij ri winakil rumal wech in.

8 ¿Jas u banic cʼut ri nu winakil we man cäcoj tä nu biʼ che? Are cʼu riʼ, we jun winakil cäcoj u biʼ re Moisés che, are ri u winakil ri Moisés. We cäcoj ri u biʼ jun achi che, are riʼ ri u winakil re we achi riʼ. Tzare we cäcoj nu biʼ che, rumal riʼ are nu winakil, we ri are tacʼabam puwiʼ ri lokʼalaj nu tzijobal.

9 Kastzij quinbij chiwe, ix tacʼabam puwiʼ ri lokʼalaj nu tzijobal. Rumal waʼ, apasäch ri quicoj u biʼ, chicojoʼ ri nu biʼ. Je cʼu riʼ we quitaʼ che ri Tataxel chi cutokʼobisaj ri nu winakil, ri Tataxel cuto na, we quibano pa ri nu biʼ in.

10 Y we tä kastzij ri winakil tacʼabam puwiʼ ri lokʼalaj nu tzijobal, cʼäte riʼ, ri Tataxel cucʼut na ri tak u banom chquixol.

11 Tzare we man tacʼabam tä puwiʼ ri lokʼalaj nu tzijobal, xane tacʼabam puwiʼ ri qui banom ri achijab, o puwiʼ ri u banom ri itzel, kastzij quinbij chiwe chi xak xu jujun kʼijal quequicot na rucʼ ri qui banom, tzare cäpe cʼu na ri qʼuisbal re, y quetastaj na, y queqʼuiak na chupam ri kʼakʼ, y man cʼo tä qui tzelejic.

12 Ri qui banom amakʼel u terenem chquij, are cʼu riʼ rumal ri qui banom quekʼat na. Rumal cʼu laʼ, chinatajisaj ri jastak ri nu bim chiwe.

13 Chitampeʼ, nu yaʼom chiwe ri lokʼalaj nu tzijobal, are cʼu waʼ ri lokʼalaj tzijobal ri nu yaʼom chiwe: Chi in petinak cho ri uwächulew che u tzʼakatisaxic ri u rayibal ri in Tat, rumal chi in u takom ulok.

14 Y ri in Tat xinutak ulok rech quinwalajisax puwiʼ ri ripibal, y rech chi cʼäte ri in walajisam puwiʼ ri ripibal, quincuinic quincʼam ulok wucʼ conojel ri achijab, rech ri e areʼ quewalajisax na rumal ri Tataxel, je jas xinwalajisax in cumal ri achijab, rech quepe chnuwäch, y cäkʼat tzij paquiwiʼ rumal rech ri qui banom, we utz o we man utz taj.

15 In walajisam che u banic waʼ. Rumal cʼu riʼ, quebincʼam ulok wucʼ conojel achijab je jas u beyal ri u cuinem ri Tataxel, rech cäkʼat tzij paquiwiʼ je jas u beyal ri qui banom.

16 Cäcʼulmataj na chi jachin cuqʼuex u cʼux che u mac, y cuban ri u kasbal xeʼ jaʼ pa ri nu biʼ, cänojisaxic. Y we cukʼiʼ cʼä pa ri qʼuisbal kʼij, in quinbij na chi man cʼo tä u mac pa ri jun kʼij aretak quintacʼabaʼ na che u kʼatic tzij paquiwiʼ conojel ri winak re ri uwächulew.

17 Jachin cʼut ri man cukʼiʼ tä cʼä pa ri qʼuisbal kʼij, cätastaj na, cäqʼuiak na pa ri kʼakʼ. Chilaʼ man cʼo tä u tzelejem, rumal ri u kʼatbal tzij ri Tataxel.

18 Are cʼu waʼ ri tzij ri u yaʼom chque ri calcʼual ri winak. Y cuban waʼ che u tzʼakatisaxic ri tzij ri u bim canok. Man cuban tä tzij, xane cutzʼakatisaj conojel ri u tzij.

19 Majun tzʼil coc na pa ri rajawibal. Rumal riʼ, majun coc pa ri ruxlanic areʼ, xak xuwi jachin ri qui chʼajom ri catzʼiak pa ri nu quiqʼuel, rumal ri qui cojobal, y ri qʼuexbal qui cʼux che ronojel ri qui mac, y ri qui nimaxic cʼä pa ri qʼuisbal.

20 Are cʼu waʼ ri takbal: Chiqʼuexaʼ i cʼux che i mac, iwonojel ix ri cʼo cho ri cʼulbat re ri uwächulew, tisaj wucʼ y chibanaʼ i kasbal xeʼ jaʼ pa ri nu biʼ, rech quixux chʼajchʼoj rumal u cʼamom ri Lokʼalaj Uxlabixel, rech chi quixriktajic chʼajchʼoj chnuwäch pa ri qʼuisbal kʼij.

21 Kastzij, kastzij quinbij chiwe chi are waʼ ri lokʼalaj nu tzijobal. Cʼu iwetaʼm ri jastak ri rajwaxic chi quibano chupam ri nu winakil. Chibanaʼ baʼ ri chac ri iwilom chi nu banom. Rumal rech ri jastak ri iwilom chi nu banom, are chibanaʼ ix.

22 Rumal waʼ, we quiban we jastak, ix tewichim rumal chi quirik na i cʼolbal chicaj pa ri qʼuisbal kʼij.

23 Chitzʼibaj ri jastak ri iwilom y ri i tom. Tzare mitzʼibaj ri man cajawex taj chi quetzʼibaxic.

24 Chitzʼibaj ri qui banom we winak, ri cäquiban na, jas e tzʼibatalic ri ocʼowinak chic.

25 Cäkʼat na tzij paquiwiʼ we winak rumal ri tak wuj ri e tzʼibatalic, y rumal ri tak wuj ri quetzʼibax na. Cumal are quel na chi sak ri qui banom ri achijab.

26 Chiwilampeʼ, conojel ri jasak e tzʼibatalic rumal ri Tataxel. Rumal riʼ cäkʼat na tzij paquiwiʼ ri e cʼo cho ri uwächulew rumal ri cʼo chupam ri tak wuj ri quetzʼibax na.

27 Chichʼoboʼ cʼut chi ix quikʼat na tzij paquiwiʼ we winak, je jas u beyal ri kʼatbal tzij ri quinyaʼ chiwe, are sucʼ. Rumal riʼ, ix achijab, ¿jas i cholaj quibana? Kastzij quinbij chiwe, takal chiwe chi quixux junam wucʼ.

28 Wacamic cʼut, quinbe na rucʼ ri Tataxel. Kastzij quinbij chiwe, apachique jastak ri quitaʼ che ri Tataxel pa nu biʼ, cäyataj na chiwe.

29 Rumal riʼ, chitaʼ, quicʼam cʼu na. Chisiqʼuij che u chiʼ ja, cäjaktaj cʼu na chiwäch. Rumal chi jachin cutaʼ, cucʼamo, jachin cusiqʼuij che u chiʼ ja, cäjaktaj chuwäch.

30 Chiwilampeʼ, nim ri nu quicotemal, cʼä u tzʼakatisaxic, iwumal ix, y xukujeʼ cumal we ijaʼlil. Jeʼ, cʼä cäquicot ri Tataxel, xukujeʼ conojel ri lokʼalaj angelib iwumal, xukujeʼ cumal we ijaʼlil. Are cʼu riʼ majun chque cäsach na.

31 Chiwilampeʼ, quinwaj chi quichʼobo, rumal chi tajin quintzijon chquij ri winak re we ijaʼlil ri cʼä e cʼaslic. Majun chque cäsach na u wäch, nu quicotemal kas tzʼakat cumal.

32 Tzare chiwilampeʼ, quinoc il chque ri ucaj ijaʼlil ri quepe na chrij we ijaʼlil riʼ, rumal chi ri e areʼ quekaj na pa u kʼab ri itzel, je jas xban che ri u cʼojol ri etzelal. Rumal chi quinquicʼayij che u qʼuexal sak puak y kʼän puak, che u qʼuexal ronojel ri cächicopir, y rumal rech ri jastak ri cäquitzucuj ri elakʼomab y cäquelakʼaj. Pa ri kʼij riʼ quinpe na cucʼ, quintzelej na ri qui banom paquiwiʼ.

33 Xcʼulmatajic chi aretak ri Jesús xuqʼuis u bixic we tak tzij, xubij chque ri u tijoxelab: Chixoc pa ri sucʼalaj u chiʼ ja, rumal sucʼ ri u chiʼ ja, latzʼ xukujeʼ ri be ri copan cʼä pa ri cʼaslemal, xaʼ cʼo jujun ri querikowic. Tzare nim u wäch ri u chiʼ ja, y nim u wäch ri be ri copan cʼä pa ri cämical, e qʼui ri quebinic chilaʼ, cʼä coc ri akʼab aretak majun cäcuinic cächacunic.