1 Xcʼulmataj cʼu riʼ chi e qʼuialaj winak re ri Nefi qui mulim quib, qui sutim rij ri jun lokʼalaj ja re ri Dios pa ri utzalaj ulew ronojel cuyaʼo. Cätajin quemayinic, quechʼobon cachbil quib. Cätajin cäquicʼut cachbil quib jas ri nimalaj qʼuexenic ri bantajinak.

2 Xukujeʼ cätajin quetzijon chrij we jun Jesucristo, ri xcʼutic retal u cämical.

3 Xcʼulmataj chi aretak cätajin quetzijon cachbil quib, xquita jun chʼabal je tä ne xpe ulok chicaj. Xecaʼy che jun sutim ib rumal rech chi man xquichʼob tä ri jun chʼabal ri qui tom. Are man co taj ri jun chʼabal riʼ. Pune man co tä ri chʼabal, xoquic chupam qui cʼux ri xetowic. Jewaʼ cʼu riʼ, ronojel ri qui tiojil xbirbat rumal kastzij, xjuluwic chupam ri canimaʼ.

4 Xcʼulmataj chi jumul chic xquita ri chʼabal, man xquichʼob tä cʼut.

5 Churox mul xquita ri chʼabal. Kas xquitatabej, xquiyaʼ qui bokʼwäch cʼä jawi xpe wi ri chʼabal. Xecaʼy chicaj, ja ri xpe wi ri chʼabal.

6 Cʼäte cʼu riʼ, che rox mul kas xquichʼobo ri chʼabal, xubij chque:

7 Chiwilampeʼ, are waʼ ri nu cʼojol nu lokʼ, ri sibalaj utz quinwilo. Nu nimarisam nu biʼ rumal ri u banom areʼ. Chitatabej jas ri cubij.

8 Xcʼulmataj cʼut chi aretak xquito, xecaʼy chicaj chi jumul. Kastzij xquil jun achi cätajin cäkaj ulok chicaj, ri u cojom jun sakalaj atzʼiak. Xkaj ulok, xtaqʼuiʼ chquixol. Ronojel qui bokʼwäch ri winak xquicaʼyej che rilic. Majun xchʼawic cachbil quib y man xquichʼob taj jas u sucʼ, rumal xquichomaj chi ri areʼ jun ángel ri u cʼutum rib chquiwäch.

9 Xcʼulmataj cʼu riʼ chi xuyuk u kʼab, xtzijon chque ri winak, xubij:

10 Chiwilampeʼ, in riʼ ri Jesucristo, ri xkʼalajisax ulok cumal ri kʼalajisanelab che ri cäpe na chi quinalax na ulok cho ri ulew.

11 Chiwilampeʼ cʼut, in ri sakil y ri cʼaslemal que ri winak cho ri uwächulew. Nu tijom che ri jun cʼayalaj kumubal yatajinak ulok chwe rumal ri Tataxel. Nu nimarisam cʼut ri u kʼij ri Tataxel, rumal nu cʼamom qui mac ri winak ri e cʼo cho ri uwächulew. Jewaʼ cʼut, nu jachom wib che u nimaxic ri u rayibal ri Tataxel chquij conojel jastak tzpa ri u jekbal ri uwächulew.

12 Xcʼulmataj chi are bitajinak chi waʼ rumal ri Jesús, xetzak cho ri ulew conojel ri qʼuialaj winak. Xnataj chque ri jun tzij ri xkʼalajisax chquixol chi ri Cristo cucʼut na rib chquiwäch ri e areʼ are benak chic chicaj.

13 Xcʼumataj chi ri Ajawaxel xtzijon chque, xubij:

14 Chixwalajok y tisaj wucʼ rech quixcuinic quinim ri i kʼab pa nu cʼalcʼax, rech quinaʼ ri retal ri clawux pa nu kʼab y pa wakan, rech cʼu jewaʼ quichʼobo chi in ri Dios re Israel, y ri Dios paquiwiʼ conojel ri winak ri e cʼo cho ri uwächulew, y chi ri in xincämisaxic rumal quech qui mac ri winak ri e cʼo cho ri uwächulew.

15 Xcʼulmataj cʼu riʼ chi xekeb ocok, xquinim qui kʼab cʼä chupam ri u cʼalcʼax. Xquinaʼ ri retal clawux ri cʼo pa ri u kʼab y pa rakän. Kas xquiban cʼu waʼ chquijujunal cʼä e benak ocok conojel rech xquil rucʼ qui bokʼwäch, rech xquinaʼ rucʼ ri qui kʼab, rech cäquetamaj rucʼ qʼuisbal qui cʼux, y xquikʼalajisaj chi kas are riʼ, ri tzʼibam can cumal ri kʼalajisanelab che ri cäpe na, chi kas cäpe cʼu na.

16 Aretak e benak chi ocok conojel che rilic, conojel xquirak qui chiʼ, xquibij:

17 ¡Hosana! ¡Chtewichixok ri u biʼ ri nimalaj Dios kas cʼo chicaj. Xetzak cʼut cho rakän ri Jesús, xquinimarisaj u kʼij ri areʼ.

18 Cʼäte cʼu riʼ, xchʼaw che ri Nefi. Ri Nefi cʼo chquixol ri qʼuialaj winak. Xutak ri Nefi chpe ulok rucʼ.

19 Are cʼu riʼ, xwalaj ri Nefi, xbe rucʼ, xxuquiʼc chuwäch ri Ajawaxel, y xutzʼumaj ri rakän.

20 Ri Ajawaxel xtakan che chi cäwalajic. Xwalaj ri Nefi, xtaqʼuiʼ chuwäch.

21 Cʼäte cʼu riʼ xubij ri Ajawaxel che: Quinyaʼ cuinem pa a kʼab chubanic qui kasbal xeʼ jaʼ ri winak riʼ are ri in benak chi chicaj.

22 Ri Ajawaxel xukujeʼ xebusiqʼuij juleʼ winak chic, xubij cʼu junam chque. Xuyaʼ cuinem pa qui kʼab chubanic ri kasbal xeʼ jaʼ. Y xubij chque: Jewaʼ cʼu riʼ u beyal quiban ri kasbal xeʼ jaʼ. Y man cäyactaj tä na oyowal chixol.

23 Kastzij quinbij chiwe, apachin ri cuqʼuex u cʼux che ri u mac rumal rech ri i tzij, y cäraj cuban u kasbal xeʼ jaʼ pa nu biʼ ri in, jewaʼ u beyal quiban ri u kasbal xeʼ jaʼ. Chiwilampeʼ, quixoc na kajok, quixtaqʼuiʼ na pa ri jaʼ. Y pa nu biʼ ri in, quiban na ri u kasbal weʼ jaʼ.

24 Chitampeʼ cʼu waʼ, are tak waʼ ri tzij quibij na, quisiqʼuij na che u biʼ, quibij:

25 Rumal rech yaʼom ulok pa nu kʼab ri takanic rumal ri Jesucristo, ri in catinkasaj xeʼ we jaʼ pa qui biʼ ri Tataxel, y ri Cʼojolaxel, y ri Uxlabixel. Amen.

26 Cʼäte riʼ, quikasaj ri winak riʼ chuxeʼ ri jaʼ, y quixel chi bic chupam ri jaʼ.

27 Jewaʼ cʼu riʼ u beyal quiban na ri kasbal xeʼ jaʼ pa ri nu biʼ ri in. Chitampeʼ, kastzij quinbij chiwe che xaʼ e jun ri Tataxel, y ri Cʼojolaxel, y ri Uxlabixel. Ri in cʼut, in cʼo rucʼ ri Tataxel, y cʼo ri Tataxel wucʼ in. Ri Tataxel y ri in, uj xaʼ jun.

28 Je jas ri in nu takom piwiʼ, kas je quiban na ri ix ri kasbal xeʼ jaʼ y miyac oyowal chixol je jas i banom cʼä wacamic. Miyac na oyowal chixol che tak ri u beyal ri lokʼalaj nu tijonem, je jas ri i banom chic.

29 Kastzij, kastzij, quinbij chiwe, apachin cʼo ri uxlabal re oyowal rucʼ, ri areʼ man wech taj, xane, areʼ rech ri itzel, ri tata re ri oyowal. Ri areʼ quebutakchij ri winak pa canimaʼ rech chi cäquiban jun oyowalalaj chʼoʼj chquixol.

30 Chiwilampeʼ, man wech tä ri tijonem chquitakchixic ri achijab cho oyowal cachbil quib. Are cʼu waʼ ri lokʼalaj nu tijonem in, chesax bic ri u wäch tak we jastak riʼ.

31 Chiwilampeʼ, kastzij, kastzij, quinbij chiwe, in quinkʼalajisaj na chiwe ri lokʼalaj nu tijonem.

32 Are waʼ ri lokʼalaj nu tijonem, y yaʼom ulok chwe rumal ri Tataxel. In cʼut quinban kʼalajisabal re ri Tataxel. Cʼu ri Tataxel cuban kʼalajisabal we. Ri Uxlabixel cuban kʼalajisabal re ri Tataxel y we in. In cʼut quinban kʼalajisabal chi ri Tataxel kas cuyaʼ u takbal chque conojel ri winak, apawijeʼ ri e cʼo wi, chquiqʼuexaʼ qui cʼux che ri mac y checojonok chwe.

33 Apachin ri cäcojon chwe in, ri cäban u kasbal xeʼ jaʼ, ri areʼ kas cäcolotaj wi na. Cʼu ri areʼ cärechbej na ri rajawibal ri Dios.

34 Apachin ri man cäcojon tä chwe, ri man cäban tä u kasbal xeʼ jaʼ, kastzij cʼajisabal wächaj.

35 Kastzij, kastzij, quinbij chiwe, are waʼ ri lokʼalaj nu tijonem, y rucʼ waʼ quinban kʼalajisabal chrij ri Tataxel. Apachin ri cäcojon chwe xukujeʼ cäcojonic che ri Tataxel. Ri Tataxel cuban kʼalajisabal chwij ri in che ri areʼ. Rumal kastzij cäpe na che ri areʼ rucʼ kʼakʼ y rucʼ ri Uxlabixel.

36 Jewaʼ cʼu riʼ, ri Tataxel cuban na kʼalajisabal chwij, y ri Uxlabixel cuban na kʼalajisabal che ri areʼ chrij ri Tataxel y chwij ri in, rumal rech chi ri Tataxel, y ri in, y ri Uxlabixel, uj xaʼ jun.

37 Jumul chic quinbij chiwe chi rajwaxic quiqʼuex i cʼux che ri i mac, y quixkasax xeʼ jaʼ. Rajwaxic quiban je jas jun alaj acʼal. We majaʼ quiban waʼ, man quixcuin taj quicʼam we jastak riʼ.

38 Jumul chic quinbij chiwe chi rajwaxic quiqʼuex i cʼux che ri i mac, y quiban i kasbal xeʼ jaʼ pa ri nu biʼ, y quiban je jas jun alaj acʼal. We tä man quiban tä jewaʼ, man cuyaʼ taj quiwechbej ri rajawibal ri Dios.

39 Kastzij, kastzij, quinbij chiwe chi are waʼ ri lokʼalaj nu tijonem, y apachin ri cutacʼabaʼ rib puwiʼ waʼ, kas cutacʼabaʼ rib puwiʼ ri nimalaj abäj wech, y man cächʼec taj rumal ri u kʼakʼ re xibalba.

40 Apachin cʼut ri cuyaʼ u wiʼ waʼ o cäresaj u wiʼ waʼ, y cubij chi are laʼ nu tijonem, are riʼ kas petinak chuwäch ri etzelal. Are riʼ man cutacʼabaʼ rib puwiʼ ri nimalaj abäj wech. Xane u tacʼabam rib puwiʼ ri sanyeb, y jekel ri u chiʼ ri kʼakʼ re xibalba chucʼamic aretak cäpe puwiʼ ri nimalaj cakʼikʼ y ri tak salkʼut jäb.

41 Rumal cʼu waʼ, jix cucʼ we winak, chebitijoj ri winak ri e cʼo pa tak ri u cʼulbat ronojel uwächulew che ri tzij ri nu bim.