1 Kastzij, kastzij quinbij chiwe chi quinwaj chi quiyaʼ i sipanic chque ri mebayib. Chichajij iwib. Mibano chquiwäch ri winak rech quixquicaʼyej. We je quiban waʼ, man cʼo tä tojbal iwe rucʼ ri i Tataxel ri cʼo chicaj.

2 Aretak cʼut quiyaʼ i sipanic, man quirak tä i chiʼ je jas ri cäquiban ri quieb qui wäch pa tak ri be y pa tak ri ja ri cäquitijoj wi quib ri winak. Je cäquibano rech cänimarisax qui kʼij cumal ri winak. Kastzij quinbij chiwe, chi cʼo chic ri tojbal que.

3 Ri ix cʼut, aretak quiyaʼ jun sipanic, märetamaj ri i moxkʼab jas ri cuban ri i wiquiakʼab.

4 Jeriʼ cäbantaj ri i sipanic chi cuyal. Ri i Tataxel cʼut ri quilow ri cäban chi cuyal, areʼ cäyow na tojbal iwe chquiwäch conojel.

5 Aretak quiban chʼawem rucʼ Dios, je mibano jas ri quieb qui wäch. Utz cäquil ri e areʼ cäquitacʼabaʼ quib pa tak ri ja ri cäquitijoj wi quib ri winak che ri pixab, cäquitacʼabaʼ pa tak ri u chʼuc ri be pa ri tinimit, cäquiban chʼawem rucʼ ri Dios. Jeʼ, cäquibano rech cäquicʼut quib chquiwäch ri winak. Kastzij quinbij chiwe, chi cʼo chic ri tojbal que.

6 Ri ix cʼut, aretak quiban chʼawem rucʼ ri Dios, chixoc pa ri iwachoch, chitzʼapij ri u chiʼ ja, chabanaʼ chʼawem rucʼ ri a Tataxel ri cʼo chi cʼuyal. Ri i Tataxel cʼut quilow ri quiban chi cʼuyal, are cäyow na tojbal iwe chquiwäch conojel.

7 Aretak quiban chʼawem rucʼ ri Dios, mibij qʼui tzij ri man cʼo tä qui patan je jas cäquibano ri cäquikʼijilaj ri alaʼs tak tiox. Ri e areʼ cäquichomaj chi cumal ri qʼui qui tzij quetatajic.

8 Miban iwe jas ri cäquibano. Are cʼu ri i Tataxel retaʼm chic jachique tak ri jastak ri rajwaxic chiwe cʼä majok quitaʼ che.

9 Ri ix cʼut jewaʼ chibanaʼ chʼawem rucʼ Dios: Ka Tat ri cʼo la chicaj, cächʼajchʼojorisax ri biʼ la.

10 Ban tä na ri rayibal la cho ri uwächulew, jas ri cäban chilaʼ chicaj.

11 Chesaj la ka mac, je jas ri uj cäkasach ri mac banom chke.

12 Mäyaʼ la chke chi cujkaj pa ri takchibal che mac, xane chujtoʼ la cho ri etzelal.

13 Ri lal cʼut cätakan la puwiʼ ronojel. Cʼo ronojel cuinem ucʼ la. Sibalaj nim na kʼij la chquiwäch conojel. Jewaʼ cäbe kʼij sak. Amén.

14 We ri ix quebisach qui mac ri nicʼaj winak chic, xukujeʼ ri i Tataxel ri cʼo chilaʼ chicaj quebusach na ri iwe ix.

15 We man quebisach qui mac ri nicʼaj winak chic, xukujeʼ ri i Tataxel man cusach tä na ri i mac.

16 Xukujeʼ aretak quikʼiʼ jun kʼij man quitij tä i wa, miban iwe jas ri cäquiban ri winak xaʼ quieb qui wäch. Ri e areʼ xak bis n qui palaj. Cäquetzelaj ri qui palaj rech cäquicʼut quib chquiwäch ri winak chi man qui tijom tä ri qui wa. Kastzij quinbij chiwe chi cʼo chic ri tojbal que.

17 Ri ix cʼut, aretak quikʼiʼ jun kʼij man quitij tä i wa, chicojoʼ aceite piwiʼ, y chichʼajaʼ ri i palaj.

18 Jeriʼ man quicʼut tä iwib chquiwäch ri winak chi man i tijom tä i wa. Xane xak xuwi ri i Tataxel quilow ri cʼo iwucʼ xak i tuquiel. Ri i Tataxel cʼut ri quilow ri quiban chi cʼuyal, are cäyow na tojbal chquiwäch conojel.

19 Mimulij i kʼinomal waral cho ri uwächulew. Waral cʼut xak cächicopir wi ri i kʼinomal, cuchuluj rib, queboc elakʼomab, quelakʼan bic.

20 Xane chimulij i kʼinomal pa ri caj, chilaʼ ri man cächicopir tä wi ri i kʼinomal, man cuchuluj tä rib, man queboc tä elakʼomab chilaʼ.

21 Jawijeʼ cʼut ri cʼo ri i kʼinomal, chilaʼ cʼo wi ri iwanimaʼ.

22 Ri u chäj ri tiojil are ri bokʼwächaj. We cʼu utz ri i bokʼwäch, ronojel ri i tiojil cʼo u chäj.

23 Tzare we man utz tja ri i bokʼwäch, ronojel ri i tiojil cʼo pa ri kʼekum. Jeriʼ, we ri i chäj ri cʼolic are kʼekum, sibalaj cʼo i kʼekumal, man cʼo tä jubikʼ ri sakil.

24 Man cʼo tä jachin jun cäcuinic quebupatanij quieb ajawib. Rumal rech cäretzelaj na u wäch ri jun, culokʼokʼej cʼu na ri jun chic. O cärucʼaj rib rucʼ ri jun, man nim tä cäril wi ri jun chic. Man quixcuin tä quipatanij ri Dios xukujeʼ ri kʼinomal.

25 Xcʼulmataj cʼu ri Jesús xubij we tzij, cʼäte riʼ xebucaʼyej ri cablajuj achijab ri e u chaʼom, xubij chque: Chebinatajisaj tak ri tzij ri nu bim chiwe. Chiwilampeʼ, ix riʼ ri nu chaʼom rech quiban ri lokʼalaj tak chac chquixol we winak. Quinbij baʼ chiwe: Mixoc il che ri cʼaslemal, jas ri quitijo, jas ri quikumuj. Mixoc il che ri i tiojil, jas iwatzʼiak quicojo. ¿La ma tä are nim na u kʼij ri u cʼaslemal jun winak chuwäch ri cutijo? ¿La ma tä nim na u kʼij u tiojil jun winak chuwäch ri atzʼiak?

26 Chiwilampeʼ ri chicop aj uwo caj. Ri e areʼ man queticʼonij taj, man quekʼatan taj, man quemulin tä pa cʼuja. Ri i Tataxel cʼut ri cʼo chilaʼ chicaj quetzukuwic. ¿La ma tä nim na i kʼij ix chquiwäch ri chicop?

27 ¿Jachin tä cʼu jun chiwe we coc il, cäcuin tä che u wikic ri rakän nicʼaj etabal?

28 Xukujeʼ ri atzʼiak, ¿jasche quixoc il che? Chiwesaj i noʼj chquij ri cotzʼiʼj re ri juyub, jas ri cäquibano queqʼuiyic. Man quecos tä rucʼ nimalaj chac. Man quebatzʼin taj.

29 Quinbij cʼu chiwe, chi mawi ri Salomón je ratzʼiak waʼ xucojo, pune sibalaj nim u kʼij.

30 We ri kʼayes re ri juyub, ri cʼo camic, chuek cʼut cäqʼuiak pa kʼakʼ, je quixratzʼiakij na ri Dios, we man chʼutin tä ri i cojobal.

31 Rumal cʼu riʼ, mixoc il, mibij: ¿Jas cäkatijo? ¿Jas cäkakumaj? ¿Jas katzʼiak cäkacojo?

32 Ri i Tat cʼu ri cʼo chilaʼ chicaj retaʼm chi conojel we jastak riʼ rajwaxic chiwe.

33 Are nabe chitzucuj ri rajawibal ri Dios, chibanaʼ ri sucʼ chuwäch ri areʼ. Cʼäte riʼ, conojel we jastak riʼ quewikitaj na chiwe.

34 Je cʼu riʼ, mixoc il che ri kʼij re chuek. Ri kʼij cʼut re chuek coc na il che. Re etzelal ri cärikitaj pa ri kʼij re camic, cuban waʼ che ri jun kʼij.