1 Xcʼulmataj cʼu riʼ, chi aretak ri Jesús xuqʼuis u bixic waʼ, cʼäte cʼu riʼ, xril ri qʼuialaj winak, xubij chque: Chiwilampeʼ, ix i tom jas ri xintijonic nabe canok cho ri xinpakiʼc chilaʼ rucʼ ri in Tat. Rumal riʼ, ronojel jachin ri cunatajisaj we nu tzij riʼ, cunimaj cʼut, areʼ quinnimarisaj na u kʼij pa ri qʼuisbal kʼij.

2 Xcʼulmataj cʼu riʼ, u bim chi ri Jesús we tak tzij riʼ, xrilo chi cʼo jujun chque ri xemayinic, xechomanic che jas cäraj ri areʼ chrij ri pixab re ri Moisés. Man xquichʼob tä cʼut ri tzij ri cubij chi ocʼowinak chic ri ojer jastak, bantajinak chi cʼacʼ conojel ri jastak.

3 Xubij cʼu chque: Mimayij jas ri xinbij chi ocʼowinak chic ri ojer jastak, chi bantajinak chi cʼacʼ conojel ri jastak.

4 Chiwilampeʼ, quinbij chiwe chi xtzʼakatisax riʼ, ri pixab ri xyaʼ ulok che ri Moisés.

5 Chiwilampeʼ, in xinyaʼow ulok ri pixab, in xinbanow yabal tak tzij cucʼ ri nu winak Isreal. Je cʼu waʼ, xtzʼakatisax ri pixab wumal in, rumal rech chi ri in petinak chutzʼakatisaxic ri pixab, je cʼu riʼ, qʼuisinak chic ri pixab.

6 Chiwilampeʼ, man quinpe tä chubixic chi man e utz tä chic ri kʼalajisanelab che ri cäpe na. Rumal rech chi conojel ri qui tzij ri majaʼ xetzʼakatisaxic wumal, kastzij quinbij chiwe, conojel riʼ quetzʼakatisax na.

7 Rumal rech chi xinbij chiwe chi ocʼowinak ri ojer tak jastak, are riʼ man quel cubij chi quinsach na u wäch ri jas xbix chic chrij ri cäpe na.

8 Chiwilampeʼ, man xtzʼakatisax tä ronojel ri yabal tak tzij ri xinban cucʼ ri nu winak. Tzare cʼo u qʼuisic wucʼ in ri pixab ri xyaʼ ulok che ri Moisés.

9 Chiwilampeʼ, in riʼ ri pixab y ri sakil. Chinicaʼyej, chikʼiʼaʼ cʼä pa ri qʼuisbal. Jewaʼ cʼut quixcʼasiʼ na, rumal rech chi ri in quinyaʼ na ri junalic cʼaslemal che ri cäkʼiʼowic cʼä pa ri qʼuisbal.

10 Chiwilampeʼ, e nu yaʼom ri takbal chiwe. Je cʼu riʼ, chebinimaj ri nu takbal. Are cʼu waʼ ri cubij ri pixab. Are waʼ ri qui tijonic ri kʼalajisanelab che ri cäpe na. E areʼ kas qui kʼalajisam chwij.

11 Xcʼulmataj cʼut, chi aretak ri Jesús xuqʼuis u bixic we tzij, xubij chque ri cablajuj achijab riʼ ri u chaʼom:

12 Ix ri nu tijoxelab. Ix je jun sakil chque we winak, ri e areʼ ri nicʼajil winak re ri rachoch ri José.

13 Chiwilampeʼ, are waʼ ri ulew re ri iwechbal. Are cʼut ri Tataxel u yaʼom waʼ chiwe.

14 Ri Tataxel mawi jumul u takom chwe chi quinbij waʼ chque ri iwachalal pa ri tinimit Jerusalén.

15 Xukujeʼ mawi jumul ri Tataxel u takom chwe chi quinkʼalajisan chque chquij nicʼaj tak ijaʼlil re ri rachoch ri Israel, ri u cʼamom bic ri Tataxel pa nicʼaj tak ulew.

16 Xak jewaʼ ri xutak ri Tataxel chwe chi xinbij chque:

17 Chi e cʼo chic nicʼaj nu chij, ri man e rech tä we chijel riʼ. E areʼ cʼu riʼ, xukujeʼ rajwaxic quebincʼamaʼ ulok. Cäquita na ri nu chʼabal, cäcʼoji, na xaʼ jun chijel, xukujeʼ xaʼ jun ajyukʼ.

18 Y rumal rech chi co ri canimaʼ y man cʼo tä ri qui cojonic, kastzij man xquichʼob tä nu tzij. Rumal laʼ xtak chwe rumal ri Tataxel chi man quinbij tä mas chque chrij waʼ.

19 Tzare kastzij quinbij chiwe chi ri Tataxel u takom chwe chi quinbij cʼu waʼ chiwe: Ix tasom chquij cumal rech ri quetzelal. Rumal ri quetzelal, man cʼo tä ri quetamabal chiwij.

20 Kastzij cʼut, xukujeʼ quinbij chiwe chi ri Tataxel e u tasom nicʼaj ijaʼlil chic chquij ri e areʼ. Rumal cʼu ri quetzelal man cʼo tä ri quetamabal chquij.

21 Kastzij quinbij chiwe chi ix riʼ, xintzijon chiwij aretak xinbij: E cʼo chic nicʼaj nu chij, ri man e rech tä we chijel riʼ. E areʼ cʼu riʼ, xukujeʼ rajwaxic quebincʼamaʼ ulok. Cäquita na ri nu chʼabal, cäcʼoji na xaʼ jun chijel, xukujeʼ xaʼ jun ajyukʼ.

22 Man xquichʼob tä cʼu riʼ nu tzij, xane xquichomaj chi xintzijon chquij ri Gentilib. Man xquichʼob tä cʼut chi cäcʼam na ri u tzij ri Dios chque ri Gentilib rumal rech ri qui tzijonic.

23 Xukujeʼ man xquichʼob taj ri xinbij, chi ri jutak chij chic cäquitatabej na ri nu tzij. Xukujeʼ man xquichʼob taj chi ri Gentilib mawi jumul cäquita na ri nu chʼabal, xane xak xuwi quinpe na cucʼ rumal ri Uxlabixel.

24 Tzare kastzij ix, i tom nu tzij, iwilom nu wäch, ix ri nu chij, quixajilataj cʼut chquixol ri e u yaʼom chwe ri Tataxel.