1 Xcʼulmataj cʼut chi cʼäte ri Jesús xubij we tzij, xuchʼabej ri u tijoxelab chquijujunal, xubij chque: ¿Jachique ri quirayij chi quinbana, are in benak chic rucʼ ri Tataxel?

2 E cʼo oxib ri man xechʼaw taj, tzare conojel ri nicʼaj chic xechʼawic, xquibij: Cäkarayij chi aretak uj opaninak cʼä pa ri u riʼjaric ri achi, aretak uj ka qʼuisom ri lokʼalaj ka pataninem ri xujsiqʼuix che umal la, chi chanim cujcuinic cujpetic ucʼ la pa ri ajawibal la.

3 Areʼ xubij chque: Ix tewichim rumal quirayij chi quinban waʼ. Rumal riʼ, aretak ix cʼo oxcʼal cablajuj i junab, quixpe na wucʼ pa ri wajawibal, wucʼ in quirik na uxlanem.

4 Aretak chʼawinak chque, xutzolkomij rib chquiwäch ri oxib chic y xubij chque: ¿Jas quiwaj chi quinban chiwe, are in benak rucʼ ri Tataxel?

5 Xebison ri e areʼ pa canimaʼ, rumal chi cʼäx xquinaʼo che u bixic ri qui rayibal.

6 Areʼ xubij chque: Chitampeʼ, wetaʼm ri i chomanic. I rayim junam rucʼ ri xurayij ri Xuan, ri nu lokʼ, ri xinrachilaj pa ri lokʼalaj nu pataninem nabe chuwäch xinquiwalajisaj ri aj Judeyib.

7 Rumal riʼ, mas tewichim na ix, rumal chi mijumul quirik na ri cämical. Xane quixcʼojiʼ na cʼä quiwilo ronojel ri cuban na ri Tataxel cucʼ ri calcʼual ri winak, cʼä quetzʼakatisax conojel ri jastak je jas u beyal ri u rayibal ri Tataxel, are quinpe na rucʼ nu juluwem, cucʼ ri cuinem re ri caj.

8 Mijumul quirik na ri cʼäx re ri cämical, xane quixqʼuex na re cämical che junalic cʼaslemal pa jun jakow yupunic bokʼwächaj. Cʼäte cʼu riʼ, quixtewichixic na pa ri rajawibal ri in Tat.

9 Xukujeʼ, man quinaʼ tä cʼäx pa ri i cʼaslemal cho we ulew rucʼ ri i tiojilal, mawi quixbisonic, xak xuwi cumal ri macaj ri e cʼo cho ri ulew. Quinban cʼu na ronojel waʼ rumal ri i rayim chi quinban chiwe. Rumal cʼu ri ix riʼ i rayim chi quixcuinic quicʼam ulok chwe ri canimaʼ ri achijab, cʼä cätaqʼuiʼ ri uwächulew.

10 Rumal we jasäch riʼ, quirik na jun tzʼakatalaj i quicotemal. Quixtʼuyiʼc na pa ri rajawibal ri in Tat. Kas jeʼ, cʼo na jun tzʼakat quicotemal iwucʼ, je jas ri Tataxel u yaʼom jun tzʼakatalaj nu quicotem. Quixux na junam wucʼ, in cʼut junam rucʼ ri Tataxel. Cʼu ri Ttaxel y ri in, uj xaʼ jun.

11 Cʼu ri Lokʼalaj Uxlabixel cuyaʼ kʼalajisanem chrij ri Tataxel y chwij ri in. Ri Tataxel cʼut cuyaʼ ri Lokʼalaj Uxlabixel chque ri calcʼual ri achijab rumal wech in.

12 Xcʼulmatajic cʼut chi cʼäte ri xubij we tak tzij, ri Jesús xuchap chquijujunal ri belejeb rucʼ u wiʼ ri u kʼab, are cʼu ri oxib ri quecanaj na man xuchap taj, cʼäte cʼu riʼ xbec.

13 Chiwilampeʼ, xjak ri caj. We oxib riʼ xecʼam bic pa ri caj, y xquita y xquilo jastak ri man cuyaʼ tä u bixic.

14 Man xyaʼ tä chque chi xquitzijoj waʼ, xukujeʼ man xyaʼ tä chque ri cuinem che u kʼalajisaxic ri jastak ri xquito y ri xquilo.

15 Man xecuin taj che retamaxic we xquiban waʼ rucʼ ri qui tiojil o man rucʼ tä ri qui tiojil, rumal xquichomaj chi xbantaj jun qʼuexbal che qui tiojil je tä ne xqʼuexic ri qui tiojil. Nabe cuyaʼ quecämic, wacamic cʼut man quecäm tä chic na. Jeriʼ cʼut xecuinic rech xquicaʼyej ri jastak rech ri Dios.

16 Tzare xcʼulmataj cʼut chi jumul chic xquiban ri qui lokʼalaj pataninem cho ri ulew. Pune jeriʼ, man xquibij tä ri jastak ri xquito ri xquilo rumal rech ri takbal ri xyaʼ chque chicaj.

17 Are cʼu riʼ, we xecanaj che qui cämic o che jun junalic qui cʼaslemal cʼäte ri xqʼuextaj ri qui tiojil, waʼ man wetaʼm taj.

18 Xak xuwi wetaʼm je jas cubij ri ojer tak tzij ri yaʼom canok, chi xebinic cho ri uwächulew, xequipatanij conojel ri winak, xequikasaj ri winak xeʼ jaʼ, xquicʼam ulok che ri u winakil conojel ri xecojon chque tak ri tzij ri xquitzijobej. Y ronojel ri xquiban ri qui kasbal xeʼ jaʼ xquicʼamo ri Lokʼalaj Uxlabixel.

19 Cʼu ri areʼ xeqʼuiak pa cheʼ cumal ri man e aj u winakil ri Cristo. Cʼu ri tak cheʼ ja ri xeboquic wi, man xecuin tä che qui chapic rumal chi xepakʼin che nicʼaj.

20 Xukujeʼ xemuktajic, xane xquisoco ri ulew rucʼ ri u tzij ri Dios. Rumal riʼ, je jas u beyal ri u cuinem xebel bic cʼä pa ri ulew. Rumal laʼ, man xecuin tä ri winak chubanic nimalaj tak jul rech quecanajic e muktalic.

21 Churox mul xeqʼuiak chupam jun tuj ri cʼo ri u kʼakʼ chupam, man cʼo tä cʼäx xquiriko.

22 Chucab mul xeqʼuiak chupam jun jul que cʼaʼnalaj tak awaj. Chiwilampeʼ, xetzʼen cucʼ ri cʼaʼnalaj tak awaj, je u banic jun acʼal ri quetzʼen rucʼ jun alaj chij ri cätuʼnic, man cʼo tä cʼäx ri xquiriko.

23 Xcʼulmataj cʼut chi jeriʼ xebinic chquixol conojel tak ri tinimit re Nefi. Xquitzijobej cʼut ri lokʼalaj u tzijobal ri Cristo chque conojel ri xecʼojiʼ cho ri ulew. Xquicʼam ri u tzij ri Ajaw pa canimaʼ, y xquimulij quib che ri u winakil ri Cristo. Jewaʼ xetewichixic ri ijaʼlil riʼ je jas u beyal ri u tzij ri Jesús.

24 Rucʼ waʼ, in, Mormón, quinqʼuis nu tzij chrij we jastak cʼä jun kʼij chic.

25 Chiwilampeʼ, xaʼ jubikʼ cäraj rech xintzʼibaj ri qui biʼ ri oxib tijoxelab ri man cäquirik tä na ri cämical, xane ri Ajawaxel man xuyaʼ tä chwe. Rumal riʼ, man quintzʼibaj taj, rumal chi man esam tä chi sak cho ri uwächulew.

26 Tzare chiwilampeʼ, in e wilom, cʼu ri e areʼ xinquipatanij.

27 Chiwilampeʼ, queriktaj na chquixol ri Gentilib, cʼu ri Gentilib man cäquichʼob tä na qui wäch.

28 Xukujeʼ queriktaj na chquixol ri aj Judeyib, cʼu ri e areʼ man cäquichʼob tä na qui wäch.

29 Cäcʼulmataj na chi aretak ri Ajaw cuchomaj pa ri u noʼjibal chi utz, kastzij quequipatanij conojel ri rijaʼlil ri Israel ri e jabutal canok, y xukujeʼ conojel ri nimak tak tinimit, calpuk winak, y winak ri jalajoj qui chʼabal. Cäquicʼam na ulok qʼui winak che ri Jesús rech cätzʼakatisax qui rayibal, xukujeʼ rumal ri u cuinem ri Dios ri cʼo cucʼ che qui toʼic ri winak rech cäquicʼam ri u tzij.

30 Ri e areʼ cʼut je jas ri rangelib ri Dios. Y we cäquitzʼonoj che ri Tataxel pa ri u biʼ ri Jesús, kas quecuin na che qui cʼutwächinic chuwäch apachique achi ri utz cuchomaj.

31 Kastzij cʼut, cäquiban nimalaj mayilaj tak chac nabe chuwäch ri nimalaj kʼij ri cäpe na, aretak conojel kastzij takal chque chi quetaqʼuiʼ chuwäch ri u kʼatbal tzij ri Cristo.

32 Kas jeʼ, cʼä chquixol ri Gentilib cäquiban na jun nimalaj mayilaj chac nabe chuwäch ri kʼij re kʼatow tzij.

33 We tä cʼo iwucʼ conojel tak ri lokʼalaj tzʼibatalic ri cäquibij ronojel mayilaj tak chac re ri Cristo, kas quiwetamaj na chi we jastak kas quecʼulmataj na, je jas u beyal ri u tzij ri Cristo.

34 ¡Tokʼob u wäch jachin man cutatabej ri u tzij ri Jesús, mawi ri qui tzij ri e u takom areʼ chquixol! Rumal chi jachin man cucʼam taj ri u tzij ri Jesús, mawi ri qui tzij ri e u takom areʼ, man cucʼam tä ri areʼ xukujeʼ. Rumal riʼ, ri areʼ man cucʼam tä na ri areʼ pa ri qʼuisbal kʼij.

35 Mas utz chque we ma tä xebalaxic. ¿La quichomaj baʼ pa iwanimaʼ chi quixcuin quikʼatej ri u kʼatbal tzij ri Dios, ri cʼäx cunaʼ chiwij, ri tacʼalem cumal ri achijab rumal rech we beyal riʼ cuyaʼ chi cäpe ri colotajic.

36 Chiwilampeʼ, wacamic, je jas xintzijon chquij ri e u chaʼom ri Ajawaxel. Kas jeʼ, ri oxib ri xecʼam bic chicaj, ri man xinwetamaj taj we ri e areʼ xechʼajchʼojarisaxic pa ri cʼaslemal cʼä che ri junalic cʼaslemal—

37 Chiwilampeʼ, cʼäte ri xintzʼibaj, in nu taʼom che ri Ajawaxel. Areʼ cʼut xukʼalajisaj chnuwäch chi rajwaxic u banic jun qʼuexbal che ri qui tiojil, we ma tä xuban jewaʼ, kastzij cäquirik na ri cämical.

38 Rumal riʼ, rech man cäquirik tä ri cämical, xban jun qʼuexbal che ri qui tiojil rech man cäquirik tä cʼäx, mawi bisonem, xak rumal ri qui mac ri e cʼo chuwächulew.

39 We qʼuexbal riʼ man junam tä rucʼ ri cuban na pa ri qʼuisbal kʼij. Xane kas xban jun qʼuexbal chque rech man cʼo tä u cuinem ri itzel che qui takchixic che mac. Y kas xpe ri chʼajchʼojil che qui tiojil, rech chi xebux chʼajchʼoj winak, rech cʼu man cʼo tä cuban chque ri cuinem ri cʼo cho ri ulew.

40 Pa we cʼolem riʼ, takal chi quecanajic cʼä pa ri kʼij re kʼatbal tzij re ri Cristo. Pa ri jun kʼij riʼ, ri e areʼ cäquicʼam jun qʼuexbal chic, ri mas nim na, y quecʼulutaj cʼu na pa ri rajawibal ri Tataxel, rech mawi jumul quebel bic chilaʼ, xane quecʼojiʼ na rucʼ ri Dios che junalic chicaj.