1 Xcʼulmataj cʼu riʼ, chi xtakan chque rech cäquitzʼibaj tak ri tzij ri xuyaʼ ulok ri Tataxel che ri Malaquías, rech cukʼaxaj chque. Xcʼulmataj cʼu riʼ chi are tzʼibam chic riʼ, xukʼalajisaj. Are waʼ cʼu ri tzij ri xubij chque, xubij: Jewaʼ xubij ri Tataxel che ri Malaquías: Chawilampeʼ, quintak na ulok ri nu takom, are cʼut cusucʼumaj na ri be chnuwäch. Ri Ajawaxel cʼut, ri quitzucuj, man etamatal tä jampa cäpe na pa ri lokʼalaj rachoch, are kas ri takom re ri yabal tzij, ri cuyaʼ quicotemal chawe. Chawilampeʼ, kas cäpe na, cächa ri Ajawaxel que ri ajchʼoʼjab.

2 ¿Jachin cʼu riʼ ri cukʼiʼ na ri kʼij re ri u petibal? ¿Jachin cʼu cätaqʼuiʼ na aretak cucʼut rib? Are cuban cʼut je ri kʼakʼ ri cächʼajchʼojinic, cuban je ri chʼipak re jun ri aj yakʼal cʼul.

3 Ri areʼ cʼut cätʼuyulic na je tä ne jun ri sucʼumanel rech sak puak ri cuchʼajchʼojarisaj. Are cʼu riʼ, quebuchʼajchʼojarisaj ri u cʼojol ri Levi, cäresaj na ronojel ri man utz taj chquixol, je cäban che ri kʼän puak y che ri sak puak. Jewaʼ cʼu riʼ cuban na rech quecuinic cäquichiʼj jun sucʼalaj sipanic che ri Ajawaxel.

4 Cʼäte riʼ, utz cäril na ri Ajawaxel ri qui sipanic ri e aj Judá y aj Jerusalén. Je xban pa ri ojer tak kʼij, y pa tak ri junab ri ocʼowinak chic.

5 In cʼut quinkeb na iwucʼ chukʼatic tzij pa wiʼaj. Chanim cʼut quinkʼalajisaj na tzij chquij ri itzinelab, y chquij xukujeʼ ri quemacun cucʼ ri ixokib y ri achijab ri e cʼulan taj. Quinkʼalajisaj na tzij chquij ri man kas tä tzij ri cäquibij, y chquij ri cäquiban cʼäx che ri cajchaquib che ri u tojonic, y chquij ri cäquiban cʼäx chque ri malcaʼnib, y chque ri man cʼo tä qui nan qui tat. Quinkʼalajisaj cʼu na tzij chquij ri quequixutij ri winak we man cäquichʼob tä qui wäch, ri man cäquixej tä quib chnuwäch, cächa ri Ajawaxel que ri ajchʼoʼjab.

6 Rumal rech chi in ri Ajawaxel, man quinqʼuex tä wib. Rumal cʼu riʼ, man cäsach tä i wäch ix, ri ralcʼual ri Jacob.

7 Ix i tasom iwib chquij ri lokʼalaj nu sucʼumabal, man i nimam tä cʼut. Waʼ i banom tzpa ri tak qui kʼij ri ojer tak i mam. Chixtzelej wucʼ, y in quintzelej cʼu na iwucʼ, cächa ri Ajawaxel que ri ajchʼoʼjab. Ix cʼu riʼ quibij: ¿Jas u banic rech cujtzelej ulok?

8 ¿La cärelakʼaj na jun achi jun jasäch pa u kʼab ri Dios? Ix cʼut cʼo jas iwelakʼam pa nu kʼab in. Ix cʼu riʼ quibij: ¿Jas ri kelakʼam pa kʼab la? Are riʼ pa ri u lajujil i chʼecoj, y pa ri tojbal u qʼuexwäch ri waʼim man i tijom taj.

9 Xkʼat itzel tzij piwiʼ rucʼ jun nimalaj etzelal, rumal rech chi cʼo jas iwelakʼam pa nu kʼab, iwonojel ix, ix we nimalaj tinimit riʼ.

10 Chicʼamaʼ ulok conojel ri lajujil re i chʼecoj chupam ri cʼuja, rech cäcʼojiʼ na ri cätijowic cho wachoch. Chiwilaʼ baʼ jas quinbano wachanim, cächaʼ ri Ajawaxel que ri ajchʼoʼjab, we man quinjak tä ri wentana rech ri uwo ri caj, we man quinmaqʼuinic jun tewichibal piwiʼ, chi man cʼo tä ri cʼolibal ri cuban na rech quicʼam ulok.

11 Quinyajajej cʼu na ri jun itzel ri cuqʼuis ronojel cumal iwech ix. Ri areʼ man cusach tä na u wäch tak ri uwo ri cheʼ ri i ticom pa iwulew. Xukujeʼ ri cheʼ ri cuyaʼ uvas, man cuyaʼ tä na u wäch cʼä majok cäpe ri u kʼijal waʼ pa tak ri ulew, cächa ri Ajawaxel que ri ajchʼoʼjab.

12 Conojel tak ri tinimit cäquibij cʼu na chi ri ix tewichim, rumal ix cʼu quixux na jun jeʼlalaj ulew, cächa ri Ajawaxel que ri ajchʼoʼjab.

13 Co ri i tzij ri i bim chwij, cächa ri Ajawaxel. Ix cʼu riʼ quibij: ¿Jas ri tzij ri ka bim chij la?

14 Ix i bim: Man cʼo tä u patan ri cäkapatanij na ri Dios. ¿Jas u patan chke chi cäkanimaj ri lokʼalaj u sucʼumabal? Y xukujeʼ bis uj bininak chuwäch ri Ajawaxel que ri ajchʼoʼjab.

15 Wacamic cʼut cäkabij chi quequicotic ri winak ri cäquinimarisaj quib. Tzare, quetacʼabax ri quebanow etzelal, kas jeʼ, quebesax pa qui cʼäx ri cäcaj chi ri Dios cuban ri man utz taj.

16 Cʼäte riʼ, ri areʼ ri xquixej quib chuwäch ri Dios amakʼel, xetzijon chachbil quib. Ri Ajawaxel cʼut xuta y xutatabej. Xtzʼibax cʼu jun wuj re natabal chuwäch ri areʼ, quech ri areʼ ri xquixej quib chuwäch ri Ajawaxel y xquichomaj che ri u biʼ.

17 Quebux cʼu na chi e wech, cächaʼ ri Ajawaxel que ri ajchʼoʼjab, pa ri jun kʼij ri quebinsicʼo ri alaj jeʼlic tak abäj wech. Quebincʼolo cʼu na je jas jun achi cucuy u mac ri kas u cʼojol ri cäpatanin che.

18 Cʼäte cʼu riʼ, quixtzelej na, quichʼob na jachin tak ri e sucʼumalaj winak y jachin tak ri e itzel winak. Quichʼob na jachin tak ri cäquipatanij ri Dios, jachin tak ri man cäquipatanij taj.