1 Are tzijom chi cʼu we tak tzij riʼ rumal ri Jesús, xcʼulmataj chi xutzijoj waʼ chquiwäch ri qʼuialaj winak. Xutzijoj ronojel chquiwäch, ri nim qui banic, ri nitz qui banic.

2 Xubij cʼu riʼ: Ri Tataxel xutak chwe chi xinyaʼ na we lokʼalaj tzʼib chiwäch, ri man xcʼojiʼ tä iwucʼ. Xuchomaj rucʼ u noʼjibal chi xbix na we lokʼalaj tzij chque ri tak e quijaʼl ri winak ri calax na.

3 Kas xutzijoj cʼu riʼ jas ronojel ri bantajinak tzpa ri u tiquiribal ri uwächulew cʼä pa ri kʼij ri cäpe ri areʼ rucʼ u juluwinic. Kas jeʼ xutzijoj ronojel jas cäban na cho ri uwächulew cʼä xjaʼric na ronojel ri choconisan chrij rumal ri u kʼakʼal. Cäbotot cʼu na ri uwächulew je tä ne jun bototic wuj, y quebesax cʼu na qui banic tak ri caj y ri uwächulew.

4 Kas xutzijoj jas cäban na pa ri nimalaj qʼuisbal kʼij. Cʼäte riʼ, quetaqʼuiʼ na chuwäch ri Dios conojel calpuk winak, tinimit, y conojel ri winak re jalajoj quechʼawic. Cäkʼat cʼu na tzij paquiwiʼ rumal rech ri chac ri qui banom, we tä utz, we tä itzel riʼ.

5 We tä utz ri qui banom, quecʼastaj na ulok pa ri jun cʼaslemal ri man cʼo tä u qʼuisic. We tä cʼu itzel ri qui chac, quecʼastaj na che jun cʼajisabal wächaj. Cäquiban cʼut cachbil quib e quieb. Junam quebec jun pa ri mox y jun chic pa ri u wiquiakʼab. Cäban waʼ che ri u beyal ri u tokʼobisan wächaj, y ri u suqʼuilal, y ri u chʼajchʼojilal ri Cristo, ri xcʼasiʼc cʼä majok xjek u banic ri uwächulew.

6 Are cʼu riʼ, man cuyaʼ tä cätzʼibaxic ri u cienil chakatil jas ronojel kas xucʼut ri Jesús chquiwäch ri winak.

7 Are cʼu ri jewaʼ, ri xaxalaj u xak tak chʼichʼ rech ri Nefi cʼolic mas ri tzʼib re ri jastak ri xucʼut can chquiwäch.

8 Are cʼu ri nu tzʼibam in, xak jubikʼ ri xtijonic chquiwäch ri winak. Nu tzʼibam cʼu riʼ rech cuyaʼ chi xcʼam ulok na chic jumul chquiwäch we winak riʼ, pa qui kʼab ri Gentilib. Waʼ je ri tzij ri u bim ri Jesús.

9 Are waʼ rajwaxic cäquicʼam we tzij riʼ nabe, rech quiltajic we kas cʼo qui cojobal che ri Dios. Are qui cʼamom chi waʼ, y we tä quecojon na che waʼ, cʼäte cʼu riʼ, cäkʼalajisax jastak ri nim na qui banic.

10 We tä man cäquicoj tä cʼu waʼ, cʼäte riʼ, man cäyataj tä na jastak ri nim na qui banic. Je cʼu waʼ cäkʼat na itzel tzij paquiwiʼ.

11 Chiwilampeʼ, are majaʼ xinchaplej quebintzʼibaj ri tzij riʼ, ronojel ri e cʼo can retal chrij ri xaxalaj tak u xak chʼichʼ re ri Nefi, tzare ri Ajawaxel man xuyaʼ tä chwe, xubij: Quinwil na we cʼo ri qui cojobal ri nu winak chwe.

12 Rumal cʼu riʼ, in, Mormón, kas quintzʼibaj jas ri u takom ulok ri Ajawaxel chwe. Are cʼu ri in, Mormón, quinqʼuis u tzʼibaxic ri nu tzij, quinjek cʼu ri u tzʼibaxic jas ri takom ulok chwe.

13 Rumal cʼu riʼ, quinwaj na chi quichʼobo chi ri Ajawaxel kas xebutijoj ri winak, che oxib kʼij xuban waʼ. Cʼäte riʼ, e qʼui mul xucʼut rib chquiwäch, e qʼui mul xupir ri cäxlan wa, xutewichij, xujach chque cʼut.

14 Xcʼulmataj cʼu riʼ chi kas xebutijoj ri calcʼual ri qʼuialaj winak ri e tzijotajinak canok. Xuban cʼut ri lokʼalaj u chac rumal quech. Ri areʼ cʼut xutzokopij ri cakʼ, xquibij cʼu riʼ ri nimalaj mayilaj tzij chque ri qui tataʼib. Are nim na qui banic we tzij riʼ che jas ri u kʼalajisam chquiwäch ri winak. Xutzokopij cʼu ri cakʼ rech xecuinic xechʼawic.

15 Xcʼulmataj cʼut chi cʼäte riʼ, xpakiʼ chicaj. Waʼ ri ucab mul ri u cʼutum rib chquiwäch, y benak chi rucʼ ri Tataxel. E u cunam conojel ri yawabib y ri quechʼocnajic ri e cʼo chquixol. U jakom qui bokʼwäch ri moyab ri e cʼo chquixol. U torom ri qui xiquin ri tʼoyab ri e cʼo chquixol. Kas u banom ronojel u wäch tak cunanic chquixol. U walajisam jun achi chquixol ri cäminakib. U cʼutum apan ri u cuinem chquiwäch, pakinak cʼu chi rucʼ ri Tataxel.

16 Chiwilampeʼ, are banom chi ronojel waʼ, xcʼulmataj pa ri nim akʼab chi xquimulij quib ri qʼuialaj winak. Kas xequilo cʼu we acʼalab riʼ, xquitatabej qui tzij. Kas, ri acʼalab xquijak qui chiʼ, xquibij mayilaj tak tzij. Y ri qui bim ulok, cʼut man yatal tä chi mawi jun achi cutzʼibaj ne lo ri tzij ri xquibij ri e areʼ.

17 Xcʼulmataj cʼu riʼ chi ri tijoxelab, ri e u chaʼom ri Jesús, ri e areʼ xquijek u banic waʼ. Xquiban ri qui kasbal xeʼ jaʼ, y conojel ri xebopan cucʼ, xequitijoj cʼut. Conojel cʼu riʼ ri xban qui kasbal xeʼ jaʼ pa ri u biʼ ri Jesús, xenojisax rumal ri Lokʼalaj Uxlabixel.

18 E qʼui cʼut ri xquilo, y xquitatabej jastak ri man cuyaʼ taj cäbixic, ri man yatal tä rumal ri Dios chi cätzʼibax ne lo.

19 Xequitijoj cʼu cachbil quib, y xquibano ri lokʼalaj chac chque cachbil quib, y ri jastak ri e cʼo cucʼ juntir quech. Conojel winak xquiban sucʼ cachbil quib.

20 Xcʼulmataj cʼu riʼ chi xquiban ronojel jas ri u takom ri Jesús chque.

21 Ri winak cʼu ri xban ri qui kasbal xeʼ jaʼ pa ri u biʼ ri Jesucristo, cäbix ri u Winakil ri Cristo chque.