1 Cäcʼulmataj cʼu na jas ri tzʼibatalic: Chatbixonok, at ri man catalcʼualan taj, y man cäcʼoj taj majun awalcʼual. Chachaplej cʼu riʼ ri a bixonic. Chabanaʼ jun quicotem tak bixonic, at ri man xarik taj ri cʼäx pa ri alcʼualinic. Rumal rech chi e qʼui ralcʼual ri ixok ri cʼo u tuquiel chquiwäch ri ralcʼual ri cʼulanic ixok, cächa ri Ajawaxel.

2 Chanimarisaj ri uwo ri ulew ja ri cʼo ri a panibal. Chayukuʼ cʼu ulok ri atzʼiak ri cʼo pa ri a wentana rech ri awachoch, ma at tä xuʼy. Chayukuʼ ri a colob. Chacowirisaj ri a cheʼyal, at chapowinak.

3 Rumal rech chi catqʼuiy na pa ri wiquiakʼab xukujeʼ pa ri moxkʼab. Ri awijaʼl cʼut quequechbej na ri nimak tak ulew, cäquiban na chi e cʼo winak pa ri tzʼinowinak tak tinimit.

4 Maxej awib, at man caqʼuix tä na cʼut, mawi cäsach na a cʼux, rumal man cʼo tä na ri a qʼuixibal. Rumal rech chi cäsach na pa a jolom jas ri qʼuixbal xaban pa ri awacʼalil. Man cänataj tä na chawe ri xatyokʼic pa ri awacʼalil. Man cänataj tä cʼu na chawe ri xatyokʼic pa ri a malcaʼnil.

5 Rumal rech chi ri banel awech, ri awachajil, ri Ajawaxel que ri ajchʼoʼjab u biʼ, xukujeʼ ri Tojol a mac, ri Lokʼalaxel re ri Israel. Ri Dios re ronojel ri uwächulew cäbix na che.

6 Rumal rech chi ri Ajawaxel xubij chawe chi ri at jun ixok ri tzakom canok, ri cäbisonic pa ruxlabal, y xukujeʼ je jas jun acʼal at ixokil ri xatyaʼic, y xatqʼuiakic aretak xatwonobax canok, cächa ri a Dios.

7 Xak quieb oxib kʼij xatintzako, tzare sibalaj quel nu cʼux chawe, catinsicʼ na.

8 Xpe jubikʼ woyowal chawij, xincʼuʼ ri nu palaj chawäch che jun xaʼ jubikʼ. Are cʼu riʼ, quinban na junalic wutzilal chawe, quintokʼobisaj cʼu na a wäch, cächa ri Ajawaxel ri Tojol a mac.

9 Quinwil cʼu na waʼ je jas ri nim jaʼ re ri Noé. rumal rech chi nu yaʼom nu biʼ che ri u bixic chi mawi jumul cänoj tä chic ri uwächulew che jaʼ. Jeriʼ xinban rucʼ ri Noé. Junam cʼu riʼ nu yaʼom nu tzij chawe chi man cäpe tä chic woyowal awucʼ.

10 Rumal rech quebel bi na ri nim tak juyub. Quesax cʼu na ri alaj tak juyub. Are cʼut man quinqʼuis tä na u basnic wutzilal chiwe, mawi quinwesaj bi na ri tzij ri xinyaʼo chque ri nu winak. Jewaʼ cubij ri Ajawaxel ri cutokʼobisaj a wäch.

11 ¡At cʼäx a rikom, at u sutim ri cakuljaʼ, y man a cuʼbisam tä a cʼux! Chawilampeʼ, quinnacʼ na ri a cʼolibal chque tak abäj re jeʼlalaj caʼyibal. Quinnacʼ na ri a tacʼalibal che abäj safiro u biʼ.

12 Quinban cʼu na ri a wentana che abäj ágata, quinban na ri tak u chiʼ ja ri a cʼolibal chque abäj rubíes. Quinban conojel tak ri a cʼulbat che utzalaj tak abäj.

13 Ri Ajawaxel cʼut quebutijoj na ri conojel awalcʼual. Cäbantaj cʼu na jun nimalaj utzil chquixol ri awalcʼual.

14 At cattacʼabax na rumal ri suqʼuilal. Naj cʼo na a xol cucʼ ri quebanow cʼäx chawe, rumal rech chi man caxej tä na awib. Naj cʼu cʼo na a xol cucʼ ri catuxibij, rumal rech chi man cäkeb tä na awucʼ.

15 Chawilampeʼ, kas cäquimulij na quib rech quechʼoʼjin chawij, man umal tä wech in. Conojel jachin ri quemulin quib rech quechʼoʼjin chawij, areʼ quetzak na rumal iwech.

16 Chawilampeʼ, nu banom ri chʼayol chʼichʼ ri cuxutij tak ri akʼal ri cʼo pa ri kʼakʼ, ri cäresaj cʼu ulok ri jun chacubal rech u chac. Nu banom cʼu xukujeʼ ri jun sachbal wächaj rech cusäch tak wächaj.

17 Man cʼo tä jun chʼoʼjibal ri cäbantajic ri cʼo na u patan chachʼequic at. Are cʼu riʼ, conojel jachin ri quewalaj na chawij chukʼatic tzij rucʼ ri rakʼ pawiʼ, ri at cakʼat na tzij paquiwiʼ. Are cʼu waʼ jas cäquechbej ri pataninelab re ri Ajawaxel. Petinak cʼu ri qui suqʼuilal wucʼ ri in, cächa ri Ajawaxel.