1 Xcʼulmataj cʼu riʼ chi cʼäte xubij ri Jesús we tzij che ri Nefi y chque ri cablajuj achijab u siqʼuim, ri qui cʼamom ri cuinem y ri takanic pa qui kʼab chubanic ri kasbal xeʼ jaʼ, xuyuk ri u kʼab chque ri qʼuialaj winak, xchʼaw chque, xubij: Utz iwe ix, we tä quitatabej tak ri qui tzij we cablajuj achijab riʼ, ri e nu chaʼom chixol, rech cäquiban ri lokʼalaj chac rumal iwech, rech quixquipatanij. In nu yaʼom cuinem pa qui kʼab rech quecuinic chubanic i kasbal xeʼ jaʼ. Are cʼu banom chic ri i kasbal chuxeʼ ri jaʼ, kastzij quinban ri kasbal xeʼ jaʼ chiwe rucʼ kʼakʼ y ri Uxlabixel piwiʼ. Rumal cʼu laʼ, quixtewichixic we quixcojon chwe y we quiban i kasbal xeʼ jaʼ, cʼäte ri in iwilom canok cʼu iwetaʼm chi in riʼ.

2 Xukujeʼ, e tewichim na mas ri quecojon na che tak i tzij rumal rech chi quikʼalajisaj chquiwäch chi in iwilom, y chi iwetaʼm chi in cʼaslic. Kastzij utz que ri e areʼ ri quecojon na che tak i tzij, ri kas sibalaj cäquimachʼachʼej quib, ri quekasax chuxeʼ ri jaʼ. Are cʼu riʼ, cäkasax na ri kʼakʼ y ri Uxlabixel paquiwiʼ, y quesax na tak ronojel ri qui mac.

3 Kas jeʼ cʼu riʼ, utz que ri mebayib pa canimaʼ, ri quepe wucʼ, rumal rech chi cäquechbej na ri rajawibal ri Dios ri cʼo chicaj.

4 Xukujeʼ, utz que conojel ri quebokʼic rumal rech chi cäcuʼbisax na qui cʼux.

5 Utz que ri man cäquinimarisaj tä quib rumal rech chi cäquechbej na ri ulew.

6 Utz que conojel ri quenumic, ri cächakiʼj qui chiʼ che u banic ri sucʼ, rumal rech chi quenojisax na che ri Uxlabixel.

7 Utz que ri quel qui cʼux chque nicʼaj winak chic rumal rech chi ri areʼ cäquirik na elbal cʼux xukujeʼ.

8 Utz que conojel ri sak canimaʼ, rumal rech chi cäquil na u wäch ri Dios.

9 Utz que conojel ri cäquijamarisaj ri chʼoʼj, rumal rech chi cäbix na e ralcʼual ri Dios chque.

10 Utz que ri quetzelax qui wäch cumal ri winak rumal rech ri nu biʼ rumal rech chi cäquechbej na ri rajawibal ri Dios ri cʼo chicaj.

11 Utz iwe aretak quixyokʼic, cäban cʼäx chiwe, cäbix na ronojel cʼäxalaj tak banow tzij chiwe, rumal wech ri in.

12 Quixquicot na rucʼ nimalaj quicotemal, rumal rech chi nim na ri tojbal iwe chicaj. Je cʼu waʼ xban chque ri kʼalajisanelab che ri cäpe na ri xecʼojiʼ can nabe chiwäch.

13 Kastzij, kastzij, quinbij chiwe chi ix je tä ne atzʼam chque ri winak cho ri uwächulew. Tzare we cʼu man cʼo chic ri u tzayil, ¿jas tä cʼu rucʼ catzʼamix wi ri uwächulew? Ri atzʼam riʼ man cʼo tä chic jas cupatanij. Xane cäqʼuiak apanok, cätacʼalex cʼu cumal ri winak.

14 Kastzij, kastzij, quinbij chiwe, yatal chiwe ix qui chäj winak. Jun tinimit ri cʼo puwiʼ jun juyub man cäcuin taj cucʼuʼ rib.

15 Chiwilampeʼ, ¿la cäquitzij ri winak jun chäj, cäquiyaʼ chuxeʼ jun caxon? Man jeʼ tä riʼ. Xane cäquiyaʼ pa ri u cʼolbal chäj, y cuyaʼ u sakil chque conojel ri e cʼo pa ja.

16 Rumal cʼu riʼ, jewaʼ chijuluwisaj ri i chäj chquiwäch we winak, rech quequil ri utzalaj tak i chac, cäquinimarisaj cʼu u kʼij ri i Tat ri cʼo chicaj.

17 Michomaj chi in petinak che resaxic ri u takbal tak tzij ri Moisés, mawi ri qui tijonic ri kʼalajisanelab che ri cäpe na. Man in petinak tä che quesaxic, xane che qui tzʼakatisaxic.

18 Kastzij quinbij chiwe, man cʼo tä u bokʼwäch tzij, mawi quieb u bokʼwäch tzij ri esatajinak che ri pixab, xane cʼu tzʼakatinak ronojel wumal in.

19 Chiwilampeʼ, e nu yaʼom chiwe ri pixab y ri u takbal ri in Tat, chi quixcojon chwe, chi quiqʼuex i cʼux che ri i mac, y chi quixpe wucʼ ri in, cäkutut ri iwanimaʼ rumal ri i banom che ri Dios y cäban nimanel i cʼux. Chiwilampeʼ, cʼo ri takbal chiwäch, tzʼakatinak cʼu ri pixab.

20 Je cʼu riʼ, chixpe lok wucʼ, quixcolotajic. Kastzij quinbij chiwe, man cʼo tä u beyal quixoquic pa ri rajawibal ri Dios ri cʼo chicaj, we man quinimaj ri nu takbal ri nu yaʼom chiwe wacamic.

21 I tom chi bitajinak cumal ojer tak winak y tzʼibatajinak nabe chiwäch: Mixcämisanic. Apachin ri cäcämisanic, kas cäpe na puwiʼ ri u kʼatbal tzij ri Dios.

22 Ri in cʼut quinbij chiwe chi ronojel jachin ri xak cäpe royowal che ri rachalal, ri areʼ cujach rib rech chi cäkʼat na tzij puwiʼ. Apachin ri cuyokʼ na ri rachalal, y cubij che, man cʼo tä a patan, cujach rib rech chi cäkʼat na tzij puwiʼ cumal ri tatayib ri quekʼatow tzij. Apachin ri cubij awaj che ri rachalal, cujach na rib pa ri kʼakʼ rech ri xibalba.

23 Rumal riʼ, we catpe na wucʼ, o we cawaj catpe na wucʼ y cänataj chwe chi ri awachalal cʼäx cunaʼ chawij,

24 Jat rucʼ ri awachalal, chasucʼumaj iwib nabe rucʼ. Cʼäte riʼ, tasaj wucʼ rucʼ jun tzʼakat rayibal pa ri awanimaʼ, catincʼulaj cʼut.

25 Chasucʼumaj awib chanim rucʼ ri a cʼulel, aretak cʼä at cʼo rucʼ pa ri be. We man caban jewaʼ, catuchap na, catuqʼuiak cʼu na pa cheʼ.

26 Kastzij, kastzij quinbij chawe, chi man catel tä na bic chilaʼ, cʼä a tojom chic tzʼakat a cʼas. Are cʼu ri at cʼo pa cheʼ, ¿la catcuinic chutojic xaʼ jubikʼ ri a cʼas? Kastzij, kastzij quinbij chawe: Man catcuin taj.

27 Chiwilampeʼ. Tzʼibatal cumal ri ojer tak winak: Maban macaj chquixol ri e cʼulanic.

28 Ri in cʼut quinbij chiwe chi ronojel jachin cucaʼyej jun ixok, curayij u wäch, areʼ xmacun rucʼ pa ranimaʼ.

29 Chiwilampeʼ. Quinyaʼ jun takbal chiwe: Miyaʼ cʼolbal che we jastak chi queboc pa iwanimaʼ.

30 Utz na we man quiban tä we jastak riʼ. Xane quicʼam jewaʼ bic ri i ripibal, rech chi man quixqʼuiak tä pa xibalba.

31 Xtzʼibax canok chi apachin ri cutzelej ri rixokil, chuyaʼ jun u wuj ri cubij wi chi tzelejinak ri ixok.

32 We jun achi cutzelej ri rixokil, we tä ri ixok man u banom tä u mac rucʼ jun chic, are ri rachajil cärekaj ri u mac ri ixok we cämacun rucʼ jun achi chic. Apachin cʼut ri cäcʼuliʼ rucʼ ri ixok ri tzelejinak bic, areʼ xukujeʼ cämacun rucʼ.

33 Xukujeʼ xtzʼibaxic ojer: Micoj u biʼ ri Dios chubixic chi quiban na jun jasäch. Xane, we quicoj ri u biʼ ri Dios che ri quibij, kastzij chibanaʼ.

34 Kastzij, kastzij quinbij chiwe: Micoj ri u biʼ ri Dios pa tak i tzij, xukujeʼ micoj ri u biʼ ri caj pa tak i tzij rumal chi are ri lokʼalaj u cuʼlibal ri Dios.

35 Micoj ri u biʼ ri uwächulew che ri quibij, rumal rech are ri u tacʼalibal ri rakän.

36 Micoj ri u biʼ ri i jolom che ri i quibij, rumal rech chi man quixcuin taj quiban sak mawi kʼek che jun wiʼaj.

37 Xane chibij jeʼ, o man jeʼ taj, che ri i tzij. We quiyaʼ u wiʼ we tzij riʼ, itzel cʼu riʼ.

38 Xukujeʼ tzʼibatal cʼu canok, bokʼwächaj che u qʼuexel bokʼwächaj wareyaj che u qʼuexel wareyaj.

39 Ri in cʼut quinbij chiwe: Miban chʼoʼj cucʼ itzel tak winak. Xane we cʼo jun quixuchʼay che ri i palaj re ri i wiquiakʼab, chayaʼ chic ri i chʼacap i palaj pa i mox.

40 We cʼo jun cäraj quixusiqʼuij pa kʼatbal tzij che u majic ri i camixa, chiyaʼ can xukujeʼ ri i chaquet che.

41 We cʼo jun cucoj chukʼab chiwe chi quiwachilaj bic jun legua, chiwachilaj bic quieb legua.

42 We cʼo jun cutaʼ jun jasäch chiwe, chiyaʼ che. We cʼo jun cäraj cäkajan iwucʼ, mitzolkʼomij iwib chuwäch.

43 Chiwilampeʼ cʼu riʼ, tzʼibatal xukujeʼ: Chilokʼokʼej ri iwaʼjil i tzʼakat, chixutuj u wäch ri i cʼulel.

44 Tzare in quinbij chiwe: Chebilokʼokʼej ri i cʼulel. Chitewichij ri cäquetzelaj i wäch. Chibanaʼ utzil chque ri cäquixutuj i wäch. Chibanaʼ chʼawem rucʼ ri Dios paquiwiʼ ri man quixcaj taj, y xukujeʼ ri quixcokotaj.

45 Chibanaʼ ronojel waʼ rech chi quixux ralcʼual ri i Tataxel ri cʼo chicaj. Areʼ cʼut cäresaj ulok ri kʼij paquiwiʼ ri winak chi e utz chi man e utz taj.

46 Rumal cʼu waʼ, quetzʼakatisax wucʼ in ri ojer tak jastak, ri xcʼojiʼ chuxeʼ ri pixab.

47 Ocʼowinak ri ojer tak jastak, bantajinak chi cʼacʼ chque conojel jastak.

48 Rumal cʼu riʼ, quinwaj chi quixux tzʼakat je jas ri in, je ri i Tataxel ri cʼo chilaʼ chicaj, are tzʼakat u banic.