Scriptures
Helaman 16


U tas 16

Jujun tak winak ri e aj Nefitas queboc cucʼ ri u winakil ri Cristo; xak jubikʼ cäraj chi ronojel cäquixutuj ri u kʼalajisabal ri Samuel; cäcaj cäquiriko rech cäquichʼap y cäquiximo; areʼ canimajic chquiwäch y cätzelej cho ri rulew; takem ri lokʼalaj chac rech ri Nefi; cʼo sibalaj winak ri man quecojon taj.

1 Xcʼulmataj cʼut, cʼo jujun chque ri winak ri xquita ri u tzij ri Samuel, ri jun cucʼ ri aj Lamanitas, ri xubaij areʼ pa ri nimalaj tapia ri cusutij ri tinimit. Y conojel ri xquicojo ri u tzij xebec che u tzucuxic ri Nefi. Jampa cʼut xquriko, xquibij che ri qui mac, man cʼo tä ri man xquiqʼueqʼuej taj che ri u bixic. Xquirayij chi cäquiban ri kasbal xeʼ jaʼ rucʼ ri Ajawaxel.

2 Xane ri areʼ ri man xquicoj taj ri u tzij ri Samuel, xpe coyowal cucʼ. Xquiqʼuiak abäj che puwiʼ ri tapia, y xukujeʼ e qʼui xquiqʼuiak chʼab che are cʼo wi ri areʼ puwiʼ ri nimalaj tapia. Xane ri Ruxlabal ri Ajawaxel xcʼojiʼc rucʼ cʼä man xecuin taj cäquisocotaj cucʼ ri abäj mawi cucʼ ri qui chʼab.

3 Aretak xquilo chi man xecuin taj chusocotaxic, e cʼo qʼui ri xquicojo ri u tzij. Jeriʼ xebec rucʼ ri Nefi rech quebukasaj chuxeʼ ri jaʼ.

4 Rumal chiwilampeʼ, ri Nefi cätajin cukasaj ri winak xeʼ jeʼ, cukʼalajisaj che ri cäpe na, cätzijon cʼut chrij ri qʼuexbal cʼuxaj, tajin cucʼutu ri retal ri mayibal chquixol ri winak rech cäquicojo chi chanim cäpe na ri Cristo.

5 Xubij cʼu chque chi chanim cäbantaj na riʼ, rech cäquetamaj y cänataj chque aretak cäcʼulmataj na, chi bitajinak can nabe chquech. Waʼ xbantaj rech quecojonic. Rumal riʼ, conojel ri xquicojo ri u tzij ri Samuel xebec rucʼ ri Nefi rech quebukasaj xeʼ jaʼ, e petinak ri e areʼ rumal qui qʼuexom qui cʼux y xquikʼalajisaj cʼut ri qui mac.

6 Xane, xaʼ quieb oxib xecojonic. Ri nicʼaj chic e qʼui man xquicoj taj ri u tzij ri Samuel. Rumal riʼ, aretak xquilo chi man quecuin taj che u socotajic cucʼ ri abäj, mawi ri qui chʼab, xquirak qui chiʼ, xquibij chque ri cʼamal tak be que ri ajchʼoʼjab: Chichapaʼ, chiximaʼ ri jun achi. Are cʼo jun itzel rucʼ, man cuyaʼ taj chi cäkaban cʼäx che rumal ri u cuinem ri itzel ri cʼo rucʼ. Man cuyaʼ taj chi cäkaban cʼäx che cucʼ ri ka chʼab ri abäj kech. Rumal riʼ, chichapaʼ y chiximaʼ, y chiqʼuisaʼ ri u wäch.

7 Aretak cʼut xepetic rech cäquichapo, chiwilampeʼ, xkaj bic areʼ pa ri nimalaj tapia, xanimaj cʼut chquiwäch pa ri qui tinimit, jeʼ, cʼä xopanic pa ri rulew, y chilaʼ xuchaplej u tzijobexic ri u tzij ri Dios. Xukʼalajisaj cʼut che ri cäpe na chquixol ri u winak.

8 Y chiwilampeʼ, man xtzelej tä chic cucʼ ri aj Nefitas, y mi jumul xtataj chic chquixol ri aj Nefitas. Y jeriʼ xcʼulmataj ri jastak que ri winak.

9 Jeʼ cʼu riʼ, xqʼuis ri junab ochenta y seis rech ri qui takanic ri kʼatbal tak tzij paquiwiʼ ri winak rech ri Nefi.

10 Jeʼ cʼu riʼ, xqʼuis xukujeʼ ri junab ochenta y siete rech ri qui takanic ri kʼatbal tak tzij. Xak jubikʼ cäraj rech conojel ri winak xecanaj pa ri qui mac, y xquinimarisaj ri canimaʼ. Xak xuwi quieb oxib e sucʼ xebinic chuwäch ri Dios.

11 Are waʼ ri xbantajic xukujeʼ pa ri junab ochenta y ocho rech ri qui takanic ri kʼatbal tak tzij.

12 Pa ri junab ochenta y nueve rech ri qui takanic ri kʼatbal tak tzij, cʼo xak jubikʼ xqʼuexic ri jastak que ri winak, xak xuwi chi ri winak xquicowirisaj ri canimaʼ pa ri macaj, y xquiban nicʼaj jastak chic ri man e junam taj rucʼ ri u takbal ri Dios.

13 Xane xcʼulmatajic chi pa ri junab noventa rech ri qui takanic ri kʼatbal tak tzij, xecʼutatajic qʼui tak retal y mayibal chquiwäch ri winak. Xchaplex qui tzʼakatisaxic ri qui tzij ri kʼalajisanelab che ri cäpe na.

14 Xquicʼut quib angelib chquiwäch ri achijab, chquiwäch achijab ri cʼo jun nimalaj qui noʼjibal, xquibij cʼut chque ri cʼacʼ tak utzalaj tzij ri cuyaʼ quicotemal. Jeriʼ pa waʼ junab xchapletajic ri qui tzʼakatisaxic ri lokʼalaj tak tzʼib.

15 Ri winak man xquil tä waʼ, xquichaplej cäquicowirisaj ri canimaʼ. Xbantaj waʼ chquixol ri aj Nefitas, xukujeʼ chquixol ri aj Lamanitas. Tzare ri cojonelab man xquicowirisaj tä ri canimaʼ. Cʼu ri nicʼaj chic xquichaplej xquicuʼbisaj qui cʼux che ri qui chukʼab, rucʼ cʼu ri quetamabal, xquibij:

16 We ne cʼo jujun jastak pa tak sibalaj ri xekʼijinic, xane chiwilampeʼ, ketaʼm chi man cuyaʼ taj chi quecʼulmataj conojel we jastak y mayibal ri bitajinak.

17 Xquichaplej quechomanic, xquichʼaw quib y xechʼuʼjaric, xquibij:

18 Are man rech tä ri jun sucʼ chomanic chi cäpe na jun Cristo. We tä jeriʼ, we tä cʼu areʼ ri u Cʼojol ri Dios, ri u Tat ri caj y ri uwächulew je jas ri bim canok, ¿jasche man cucʼut tä rib chkawäch je jas cucʼut na rib chquiwäch ri e cʼo na pa Jerusalén?

19 Jeʼ, ¿jasche man cucʼut tä rib pa we ulew, je jas cucʼut na rib pa ri ulew re Jerusalén?

20 Xane are jewaʼ, uj ketaʼm chi are xak jasäch, xak re wi petinak wi, ri xbitaj can chke cumal ka tat rech cäkacoj ka chukʼab rech cäkacojo che jun nimalaj mayibal jasäch ri cänbantaj na. Man are taj chkaxol, xak cäbantajic pa jun najalaj ulew, ri man ketaʼm tä u wäch. Rumal riʼ, cujquichap pa ri man kastzij taj, are man cujcuin taj cäkilo rucʼ ri ka bokʼwäch chi kastzij.

21 Cʼu ri e areʼ cäquiban na jastak re ri itzel ri man esam tä sak, ri man cujcuin taj cäkachʼobo. Waʼ rumal ri subunic ri cänawaxic y ri man esam tä chi sak rech ri itzel. Rucʼ cʼu waʼ, cäquicoj na qui takanic pakawiʼ rech cäkanimaj ri qui tzij, rumal cʼut xak xuwi ri e areʼ cujquitijoj che ri tzij. Jeʼ cʼu riʼ cujcanajic cumal pa ri man kastzij taj. Waʼ cäbantajic we cujoquic chuxeʼ ri qui takanic.

22 Y qʼui tak jastak ri man cʼo tä qui patan, xukujeʼ moxalaj tak jastak xquichomaj pa ri canimaʼ. Y sibalaj oquinak il rumal rech ri Satanás amakʼel quebutakchij rech cäquiban macaj. Jeʼ, xuyaʼ qui bixical ri winak, y xechʼoʼjinic pa ronojel ri ulew, rech cäcowirisaj ri canimaʼ ri winak chrij ri utz y chrij ri cäpe na.

23 Cʼo sibalaj ri u cuinem ri itzel pa canimaʼ cho ronojel ri ulew, pune sibalaj retal y mayibal xbantajic chquixol ri u winakil ri Ajawaxel.

24 Jeriʼ xqʼuis ri junab noventa rech ri qui takanic ri kʼatbal tak tzij paquiwiʼ ri winak ri aj Nefitas.

25 Jeʼ cʼu riʼ, xqʼuis ri wuj re ri Helamán, je jas ri cubij ri tzij ri Helamán cʼu ri ralcʼualab.