1 Xcʼulmataj cʼut chi ri Samuel xukʼalajisaj chi quepe na qʼui tak jastak ri man cuyaʼ taj quetzʼibaxic.

2 Xubij cʼut chque: Chiwilampeʼ, quinbij chiwe chi cʼo na jun retal. Quecʼow na job junab, are jewaʼ, cʼäte cʼu riʼ, cäpe na ri u Cʼojol ri Dios rech cäresaj qui mac conojel ri cäquicojo che ri u biʼ.

3 Chiwilampeʼ cʼut, are waʼ quinyaʼ chiwe je jun retal che ri u petic. Are cʼu riʼ, quilitajic na qʼui tak chäj chicaj, rumal waʼ, man cʼo tä na kʼekumal pa ri jun akʼab nabe che ri u petic. Cʼu ri achijab cäquichomaj na chi xak pa kʼij e cʼo wi.

4 Rumal riʼ, cʼo na jun kʼij, y coc na ri akʼab y jun kʼij chic, waʼ cäcaʼyic na je jas xak jun kʼij, y man coc tä ri akʼab. Quiwil na waʼ je jas jun retal, rumal rech chi quiwil na chi quel ri kʼij, y chi cäkaj ri kʼij xukujeʼ. Je cʼu riʼ, kastzij quetaʼm na chi cʼo quieb kʼij y jumul coc na ri akʼab, pune man cʼo tä na ri kʼekumal pa ri roquibal ri akʼab, y waʼ ri jun akʼab nabe che ri ralaxibal.

5 Chiwilampeʼ cʼut, cäcʼutatajic jun cʼacʼ chʼimil, ri mawi jumul iwilom. Waʼ cuban na jun retal chiwe xukujeʼ.

6 Chiwilampeʼ cʼut, man ronojel tä waʼ, rumal quilitaj qʼui tak retal y mayibal chicaj.

7 Cäcʼulmataj na chi sibalaj quiwaj na quiwetamaj u cholaj, y quixmayinic na cʼä chi quixkaj na cho ri ulew.

8 Cäcʼulmataj cʼu na chi jachin cäcojonic che ri u Cʼojol ri Dios curik na ri junalic cʼaslemal.

9 Chiwilampeʼ, ri Ajawaxel xutak chwe rumal ri u ángel chi quinpe na iwucʼ che u bixic we jastak. Jeʼ, xutak chwe chi quinkʼalajisaj chiwe ri jastak riʼ ri quepe na. Jeʼ u bim lok chwe: Chasiqʼuij che we tinimit chi cäquiqʼuex qui cʼux, chi cäquisucʼumaj ri be rech ri Ajawaxel.

10 Areʼ cʼu waʼ chi ri in jun chque ri aj Lamanitas, y xinbij chiwe ri tzij ri xutak ri Ajawaxel chwe, y rumal areʼ co ri tzij chiwe, ix xpe iwoyowal wucʼ, y quiwaj quinicämisaj, y xiniwesaj cʼut chixol.

11 Y kas quita na ri nu tzij, rumal waʼ xinpakiʼc puwiʼ we nimalaj tapia re waʼ tinimit, rech jeriʼ quita, y quiwetamaj na chi ri u kʼatbal tzij ri Dios quixqueyej na rumal ri i macaj, y xukujeʼ rech quiwetamaj jas cäraj ri qʼuexbal cʼuxaj

12 Xukujeʼ rech quiwetamaj chrij ri u petic ri Jesucristo, ri u Cʼojol ri Dios, ri Tat re ri caj y ri ulew, ri Banal que conojel ri jastak tzpa ri tiquiribal, rech cʼut quiwetamaj chrij ri retal je ri u petic, rech quixcuin quixcojon che ri u biʼ.

13 We quixcojon cʼut che u biʼ, quiqʼuex na i cʼux che ronojel ri i mac, rech jeriʼ quesatajic rumal ri cuban areʼ.

14 Chiwilampeʼ cʼut, quinbij na chiwe chi cʼo na jun retal chic, jeʼ, jun retal re ri u cämical.

15 Are cʼu jewaʼ, rajwaxic chi cäcämic rech cäpe ri cʼolotajibal. Jeʼ, are riʼ rajwaxic chi cäcämic rech cäbantajic ri cʼastajibal que ri cäminakib, rech jeriʼ cuyaʼ chi quetzelej ri achijab chuwäch ri Ajawaxel.

16 Je cʼu waʼ, we cämical cuban chi cäbantajic ri cʼastajibal, y queresaj cʼut conojel winak pa ri nabe cämical, are ri cämical rech ri uxlabal ri petinak chque conojel winak. Conojel quebesatajinak pa ri cʼolibal re ri Ajawaxel rumal ri u kajic ri Adán, jeriʼ, xak je jas e cäminak pa ri jastak rech ri ulew, xukujeʼ rech ri uxlabal.

17 Xane chiwilampeʼ, ri u cʼastajibal ri Cristo cäresaj ri qui mac conojel ri winak, jeʼ, kas conojel ri winak, y quebucʼam bic jumul chic chuwäch ri Ajawaxel.

18 Jeʼ, cutzʼakatisaj cʼut ri cäraj ri qʼuexbal cʼuxaj, chi jachin cuqʼuex u cʼux che ri u mac, man cätastaj taj y man cäqʼuiak tä na pa ri kʼakʼ. Xane jachin man cuqʼuex tä u cʼux cätastaj na, cäqʼuiak na pa ri kʼakʼ. Y cʼäte cʼu riʼ, cäpe na jun cämical rech ri uxlabal, jeʼ, jun ucab cämical, rumal ri e areʼ e tastajinak jumul chic che ri jastak rech ri suqʼuilal.

19 Rumal riʼ, chiqʼuexaʼ i cʼux, chiqʼuexaʼ i cʼux. Are cʼu we ix iwetaʼm we jastak, y man quinimaj taj, quirik na cʼäx pa jun cʼajisabal wächaj, chi quichararex na che we ucab cämical.

20 Tzare chiwilampeʼ, jas xinchʼaw iwucʼ chrij jun retal chic, ri retal re ri u cämical, chiwilampeʼ, pa ri jun kʼij curik u cʼäxcʼol pa u cämical, cäkʼekumar na ri kʼij, y man cuyaʼ tä ri u sakil chiwe, jeriʼ xukujeʼ ri icʼ, cʼu ri tak chʼimil. Man cʼo tä na sakil puwiʼ waʼ ulew pa oxib kʼij, tzpa ri kʼij re ri u cämical, cʼä pa ri kʼij re ri u cʼastajibal chquixol ri cäminakib.

21 Jeʼ, pa ri kʼij ri cujach ri ruxlabal, cʼo na cayapa y cäkuljaʼ cʼä sibalaj hor. Cʼu ri ulew cäsalabic na, y cäbirbitic na xukujeʼ. Y conojel ri abäj ri e cʼo cho ri uwächulew, ri e cʼo puwiʼ ri ulew y xukujeʼ ri e cʼo chuxeʼ, ri abäj ri iwetaʼm chi co e cʼo wiʼ o chi ri tzʼakatil mas nim are co ri qui banic, kas are cäpax na ronojel.

22 Jeʼ, cäpaxic na che nicʼaj, y cʼo na retal che junalic chi e rakininak rucʼ tak jul, tak pek, tzʼakatil paxim xak chʼakatak. Conojel waʼ cäriktajic na cho ronojel ri uwächulew, je puwiʼ ri ulew, xukujeʼ chuxeʼ.

23 Chiwilampeʼ cʼut, cʼo na nimalaj tak cayapa y cakʼikʼ, y qʼui tak juyub quebux na lianic. Qʼui tak cʼolibal, ri siwan cäbix che camic, quebux na nimalaj tak juyub.

24 Xukujeʼ quecʼajin na sibalaj nim tak be, xukujeʼ qʼui tak tinimit quecanaj na e tzʼinowinak.

25 Quejak na qʼui mukubal, y cäquijach na qʼui tak cäminakib. Xukujeʼ qʼui chʼajchʼojalaj tak winak cäquicʼut na quib chquiwäch nicʼaj chic.

26 Chiwilampeʼ, waʼ xubij ri ángel chwe. Xubij chwe chi cʼo na cayapa y cakuljaʼ sibalaj tak hor.

27 Xubij cʼut chwe chi are majaʼ ocʼowinak ri cayapaʼ ri cakuljaʼ y ri cakʼikʼ, cäcʼulmataj na we jastak, cʼo ri kʼekumal ri cuchʼuk na ri uwächulew pa oxib kʼij.

28 Y xubij cʼu ri ángel chi qʼui winak cäquil na nim tak jastak chquiwäch. Ronojel waʼ, rech cäquicojo chi kas cäquicʼulmaj ronojel we tak retal, y we tak mayibal cho ri uwächulew. Waʼ rech man cʼo taj chic jun jasäch ri cuban chi ri calcʼual ri winak man quecojon taj.

29 Jeriʼ rech cäbantajic chi ri e areʼ ri quecojonic cuyaʼ chi quecolotax na, y rech cäkaj jun sucʼalaj kʼatbal tzij paquiwiʼ ri areʼ ri man cäcaj tä quecojonic. Y xukujeʼ we quecʼajisax ri qui wäch, ri e areʼ cäquicʼam na paquiwiʼ ri cʼajisabal qui wäch.

30 Jeriʼ baʼ, cänataj chiwe, cänataj chiwe wachalal, jachin cäcäm, cäcäm rumal areʼ. Y jachin cuban u mac, cucʼululaj rib. Je ba waʼ, ix tzokopitalic, cäyaʼic chiwe chi quiban je jas i chomanic. Are ri Dios u yaʼom chiwe jun etamabal, y u banom chi ix tzokopitalic.

31 Areʼ u yaʼom chiwe chi quichʼobo jas na ri utz chuwäch ri man utz taj. U yaʼom chiwe rech quichaʼ ri cʼaslemal o ri cämical. Cuyaʼ cʼut chi quiban ri utz, rech quixtzelejic che ri utz, xukujeʼ chi cäyaʼic chiwe ri utz che u qʼuexbal ri utz, o we quiban ri man utz taj, cätzelejic ri man utz taj chiwe.