1 Wachanim cʼut, lokʼokʼem tak wachalal, chiwilampeʼ, quinbij chiwe: We tä man quiqʼuex taj i cʼux, ri iwachoch quecanajic e tzʼinowinak.

2 Jeʼ, we tä man quiqʼuex tä i cʼux, cʼo na jun cʼäx rech chʼekowem cucʼ ri iwixokilal pa ri kʼij ri cäquiyaʼ tuʼ. Rumal rech quitzucuj na chi quixanimajic, xane man cʼo tä na cʼolibal rech quiwawaj iwib. Jeʼ, tokʼob qui wäch ri yawab tak ixokib are cʼu al cäquinaʼ na, rumal riʼ, man quecuin tä na quebanimajic. Jeriʼ, quetacʼalex na, quecanajic na qui tuquiel rech quecämic.

3 Tokʼob qui wäch we winak, ri qui biʼ ri winak re ri Nefi, we man cäquiqʼuex tä qui cʼux aretak cäquil we tak retal y mayibal ri cäcʼutatajic na chquiwäch. Chiwilampeʼ, waʼ jun winak e u chaʼom ri Ajawaxel, jeʼ, areʼ e u lokʼokʼem ri winak rech ri Nefi. Xukujeʼ u yojom qui wäch. Jeʼ, rumal chi quebulokʼokʼej u yojom qui wäch pa ri kʼij ri xquiban qui mac.

4 Xane chiwilampeʼ wachalal, xretzelaj ri qui wäch ri aj Lamanitas, rumal rech chi amakʼel qui banom itzel tak chac, waʼ rumal ri retzelal ri qui banom jas que wi ri qui tat. Xane opaninak cucʼ ri colotajibal rumal ri qui tzijobexic ri aj Nefitas. Rumal waʼ, ri Ajawaxel cʼut u banom naj ri qui kʼij.

5 Quinwaj cʼut chi quiwilo chi are xak jubikʼ cäraj rech conojel ri aj Lamanitas cäquiterenej amakʼel ri be, y cäquichajij quib chuwäch ri Dios. Cäquicoj qui chukʼab che u nimaxic ri u takbal, ri u pixab, y ri u sucʼumabal je jas ri cubij ri takbal tzij rech ri Moisés.

6 Jeʼ, quinbij chi xak jubikʼ cäraj rech conojel ri winak cäquiban jas u beyal waʼ. Sibalaj quesacʼajinic y cäquicoj qui chukʼab che u cʼam bic ri nicʼaj chic cachalal rech cäquetamaj ri kastzij. Rumal riʼ, e qʼui ri queboc cucʼ conojel kʼij.

7 Chiwilampeʼ, ix iwetaʼm riʼ iwumal, rumal rech iwilom y i kʼalajisam chi conojel chque ri quecʼamtaj ulok chupam ri etamabal rech ri kastzij, y cäquetamaj cʼut chi itzel ri qui banom jas que wi ri qui tat, quecʼamtaj ulok che u cojic ri lokʼalaj tak tzʼibatalic, je, ri kʼalajisabal che ri cäpe na ri e tzʼibam cumal ri lokʼalaj tak kʼalajisanelab che ri cäpe na, cäquicʼam qui be pa ri cojobal che ri Ajawaxel y pa ri qʼuexbal cʼuxaj. Cumal we cojobal y ri qʼuexbal cʼuxaj che ri mac, cäbantajic jun qʼuexbal qui cʼux che ri utz.

8 Rumal riʼ, conojel ri e ulinak chic, ix iwetaʼm iwumal chi co quecanajic, man quesalabax taj pa ri cojobal, mawi pa ri jasäch ri cuban chi e tzokopitalic.

9 Xukujeʼ iwetaʼm chi qui mukum ri qui chʼichʼ re chʼoʼjibal, y man cʼo tä ri qui chomanic che qui chapic chic rumal ri xen ib ri cʼo cucʼ chi we ne quemacunic. Jeʼ, cuyaʼ chi quiwilo chi cäquixej quib che ri u banic macaj. Are je cʼu waʼ, man cäquiwalajisaj tä qui chʼichʼ chquij ri qui cʼulel aretak quetacʼalex y quecämisax cumal, y waʼ rumal ri qui cojobal che ri Cristo.

10 Y wachanim, rumal areʼ amakʼel cäquicoj qui chukʼab che ri qui cojobal aretak quecojonic, y rumal areʼ sibalaj co aretak cäyaʼic ri sakil chque, rumal ronojel waʼ, ri Ajawaxel quebutewichij na, y cuban na naj qui kʼij, pune cʼo ri qui mac.

11 Jeʼ, we quekaj pa ri macaj, ri Ajawaxel cuban na chi naj ri qui kʼij, cʼä copan ri kʼij ri bitajinak cumal ri ka tat, xukujeʼ rumal ri kʼalajisanel che ri cäpe na, areʼ Zenos u biʼ, y xukujeʼ ri nicʼaj kʼalajisanelab che ri cäpe na, ri quechʼawic chrij ri qui tzelejic ri aj Lamanitas jumul chic pa ri retamabal ri kastzij.

12 Jeʼ, quinbij chiwe chi ri yabal tzij rech ri Ajawaxel copan na cucʼ ri kachalal, ri aj Lamanitas, pa ri qʼuisbal tak kʼij. We ne cäquirik na qʼui tak cʼäxcʼolil, xukujeʼ quebesatajic na pa tak ri cʼolibal cho uwächulew, quecocotaj na, quesocotaj na, quejabutaj na, y man cʼo tä cʼolibal rech cäquicʼuʼ quib we cäbantaj waʼ, xane ri Dios quel na u cʼux chque.

13 Waʼ je jas ri cubij ri kʼalajisabal che ri cäban na, cubij chi cäcʼam na qui be che ri kastzijalaj etamabal rech ri Quesanel ri qui mac, areʼ ri kas nimalaj ajyukʼ quech. Cʼäte cʼu riʼ, quebajilataj na cucʼ ri u chij.

14 Rumal riʼ, quinbij chiwe, we tä man quiqʼuex tä i cʼux, quirik na ix mas cʼäx na chuwäch ri cäquirik areʼ.

15 Chiwilampeʼ, we tä e cʼutum chquiwäch ri areʼ ri sibalaj tak jastak ri xcʼutic chiwäch, jeʼ, ri areʼ ri e kajinak rumal rech man quecojon taj rumal ri xquiban jas que wi ri qui tat, cuyaʼ baʼ chi quiwilo iwumal chi mawi jumul quekaj na areʼ rumal rech man quecojon taj.

16 Rumal riʼ, ri Ajawaxel cubij: Man quinsach tä na ri qui wäch, xane quinban na chi quetzelej wucʼ in pa ri kʼij ri quinchomaj chi takal chi quetzelejic.

17 Are jeʼ cʼu waʼ, cächa ri Ajawaxel chrij we winak, ri aj Nefitas: We tä man cäquiqʼuex taj qui cʼux, we tä cʼu man cäquicoj tä ri qui chukʼab rech cäquinimaj ri nu rayibal, kas tzʼakat quinsach na ri qui wäch rumal rech man quecojon taj, cächa ri Ajawaxel, pune tä ri nimalaj tak nu banom chquixol. Je jas cʼaslic cʼut ri Ajawaxel, cätzʼakatisax na we jastak, cächa ri Ajawaxel.