“Si Rut kag si Noemi,” Mga Sugilanon sa Daan nga Katipan (2022)
“Si Rut kag si Noemi,” Mga Sugilanon sa Daan nga Katipan
Rut 1–4
Si Rut kag si Noemi
Paglampuwas sa mga pagtilaw nga may paghigugma kag katampad
Si Noemi kag ang iya pamilya nagsaylo sa Moab tungod indi bastante ang pagkaon sa duta sang Juda. Dayon napatay ang bana ni Noemi. Ang mga anak nga lalaki ni Noemi nagpangasawa sang mga babayi sa Moab nga Orpa kag Rut ang ngalan. Gin-atipan nila si Noemi sang 10 ka tuig.
Dayon nagkalamatay ang mga bana nanday Orpa kag Rut. Karon nagaisahanon na lang ang mga babayi. Indi na si Noemi makahatag sang pagkaon kay Orpa kag Rut.
Si Orpa nagpauli sa ila balay. Pero si Rut gusto magpabilin kag mag-atipan kay Noemi. Nabatian nanday Rut kag Noemi nga may patubas na liwat sa Juda, gani naglakat sila didto.
Nag-abot sila ni Rut kag Noemi sa Juda sa tion sang tig-alani. Kinahanglan nila sang pagkaon. Ang paryente ni Noemi nga si Boaz may ginapanag-iyahan nga kaumhan sa Juda. Gintugotan niya si Rut nga magpanigpot sang bilin nga mga uyas sa iya kaumhan. Mabudlay ato nga obra.
Ginrespeto ni Boaz si Rut tungod nag-obra sia sing todo kag tungod tampad sia kay Noemi kag sa Ginuo. Ginsingganan niya ang iya mga suluguon nga magbilin sing dugang ang mga uyas sa mga uma para kay Rut.
Gusto ni Noemi nga makaangkon si Rut sang pamilya. Ginpaisog niya si Rut nga pamanahon si Boaz. Nakahibalo si Rut nga kon pamanahon niya si Boaz, maatipan na nila nga duha si Noemi.
Nagdesisyon si Rut nga pangabayon si Boaz nga pangasaw-on sia. Nakahibalo si Boaz nga si Rut tampad kag matarong nga babayi. Nagsugot sia.
Si Rut kag Boaz nagpakasal. Wala madugayi si Rut nagbata sang lalaki. Sia ang nangin lolo ni David, ang palaabuton nga hari. Madamo nga tinuig ang nagligad, natawo si Jesucristo sa sining kaliwatan.