“Si Reyna Ester,” Mga Sugilanon sa Daan nga Katipan (2022)
“Si Reyna Ester,” Mga Sugilanon sa Daan nga Katipan
Ester 2–5; 7–9
Si Reyna Ester
Maisog sa panahon sang peligro
Ang iban nga mga Israelnon gintawag nga mga Judio. Si Ester isa ka Judio nga nag-istar sa Persia. Napatay na ang iya mga ginikanan, gani gin-atipan sia sang iya pakaisa nga si Mardoqueo. Gin-agda sia sa palasyo sang hari upod sa iban nga mga dalagita sa ginharian. Gusto sang hari sang bag-o nga reyna, kag iya ginpili si Ester.
May alagad ang hari nga ang ngalan Haman nga nakaangkon sang dako nga gahum. Ginbuligan ni Haman ang hari sa pagpamuno sa lugar. Ginsugo sang hari nga magduko ang tanan kay Haman.
Pero indi magduko si Mardoqueo kay Haman. Nagaduko lang si Mardoqueo sa Ginuo. Ginkaakig ini ni Haman. Gusto niya nga silutan si Mardoqueo kag ang tanan nga mga Judio.
Ginhambal ni Haman sa hari nga wala ginasunod sang mga Judio ang mga layi sang hari. Gani gintugotan sang hari si Haman nga maghimo sang bag-o nga layi: sa isa ka natalana nga adlaw, ang tanan nga mga Judio pamatyon.
Ginpangabay ni Mardoqueo si Ester nga makighambal sa hari. Pwede nga liwaton sang hari ang layi ni Haman kag luwason ang tanan nga Judio. Pero nahadlok si Ester. Kon kis-a ginapapatay sang hari ang mga tawo nga nagapalapit para makigsugilanon sa iya nga wala sang imbitasyon.
Ginpangabay ni Mardoqueo si Ester nga pamensaron ang mga Judio nga mahimo pamatyon. Siling ni Mardoqueo nga basi ginbutang sang Ginuo si Ester sa palasyo sang hari para luwason ang mga Judio.
Nahibaloan ni Ester nga kinahanglan niya nga makighambal sa hari, bisan pa nga pwede sia mapatay. Ginpangabay ni Ester ang tanan nga mga Judio kag ang iya mga suluguon nga magpuasa upod sa iya.
Pagkatapos nga magpuasa sang tatlo ka adlaw, ginhanda ni Ester ang iya kaugalingon kag nakigkita sa hari.
Sang magpalapit sia sa hari, gin-untay sang hari ang iya cetro. Buot silingon nga nalipay ang hari nga makita sia kag indi sia pagpatyon. Nagpamangkot sia kon ano ang iya gusto. Ginhambalan ni Ester ang hari nga ara sa peligro ang iya katawhan. Tungod sa layi ni Haman, sia kag ang tanan nga mga Judio sa ginharian pagapatyon.
Nangakig ang hari kay Haman kag ginpapatay ini. Naghimo ang hari sang bag-o nga layi nga nagprotekta sa mga Judio. Gintugotan na sila nga pangapinan nila ang ila mga kaugalingon kon may magsakit sa ila.
Ang pagtuo ni Ester sa Ginuo kag ang iya kaisog sa pagpakighambal sa hari nagluwas sang iya katawhan. Imbis nga kamatayon kag kasubo, naghiwat sila sang pista. Nagsinadya ang mga Judio.