“Si Jose sa Egipto,” Mga Sugilanon sa Daan nga Katipan (2022)
“Si Jose sa Egipto,” Mga Sugilanon sa Daan nga Katipan
Si Jose sa Egipto
Ang ulipon nangin isa ka lider
Ginbaligya si Jose bilang ulipon sa tawo nga gin-ngalanan Potifar. Nagatrabaho si Potifar kay Faraon, ang manuggahom sang Egipto. Nasat-uman ni Potifar nga ginabuligan sang Ginuo si Jose. Ginsaligan niya si Jose kag ginhimo sia nga enkargado sang iya panimalay kag sang tanan niya nga ginapanag-iyahan.
Nanamian ang asawa ni Potifar kay Jose. Gusto niya nga supakon ni Jose ang mga kasuguan sang Ginuo upod sa iya. Ginbalibaran sia ni Jose.
Indi mamati ang asawa ni Potifar, gani nagdalagan palayo si Jose. Nangakig sia kay Jose.
Ginpakita niya kay Potifar ang bahin sang bayo ni Jose. Nagbinutig sia kay Potifar parte kay Jose. Ginpapriso ni Potifar si Jose.
Naseparar si Jose sa iya pamilya. Nahimo sia nga ulipon, kag karon napriso sia. Pero ginbuligan gihapon sang Ginuo si Jose. Wala nagpangampo si Jose. Ginbugayan sang Ginuo ang gwardya sang prisohan para makita ang kaayo ni Jose. Amat-amat nga nagsalig ang gwardya sa iya, gani ginhimo niya si Jose nga salaligan sa iban nga mga priso.
Nakilala ni Jose ang duha ka priso, isa ka manugtinapay kag isa ka manugtagay, nga nagtrabaho sadto kay Faraon. Pareho sila nga may indi kinaandan nga mga damgo. Paagi sa gahum sang Ginuo, ginpaathag ni Jose kon ano ang buot silingon sang ila mga damgo. Ang damgo sang manugtagay nagakahulugan nga pagahilwayon ang manugtagay. Tatlo ka adlaw ang nagligad, ginpagwa sia para mag-obra liwat kay Faraon.
Isa ka adlaw indi mahim-os si Faraon sa iya mga damgo. Wala sang makasugid sa iya kon ano ang buot silingon sang iya mga damgo.
Dayon nadumduman sang manugtagay nga makapaathag si Jose sang mga damgo.
Ginpagwa si Jose sa prisohan para ipaathag ang mga damgo ni Faraon. Siling ni Jose nga ginapakita sa mga damgo nga ang Egipto makaangkon sang pito ka tuig nga bugana sa pagkaon kag pagasundan sang pito ka tuig sang tiggulutom nga diutay lang kaayo ang pagkaon. Ginhambalan ni Jose si Faraon nga dapat magtipon ang Egipto sang sobra nga pagkaon sa tinuig nga bugana.
Nahibal-an ni Faraon nga ang ginsiling ni Jose parte sa iya mga damgo matuod. Ginpagwa niya si Jose sa prisohan kag ginhimo si Jose nga dako nga lider sa Egipto. Sa sulod sang pito ka tuig, ginbuligan ni Jose ang Egipto nga magtipon sang sobra nga pagkaon.
Dayon nag-abot ang tiggulutom. Sa sini nga tion, wala sing makatanom sing kalan-on. Ang mga tawo nagpanglakaton pakadto sa Egipto sa pagbakal sang pagkaon nga gintipon ni Jose. Bangud kay Jose, ang mga Egiptohanon nakatipon sang bastante nga pagkaon para mabuligan sila kag ang iban nga malampuwasan ang tiggulutom.