“Si Haring David,” Mga Sugilanon sa Daan nga Katipan (2022)
“Si Haring David,” Mga Sugilanon sa Daan nga Katipan
1 Samuel 18–19; 31; 2 Samuel 1; 5; 11–12
Si Haring David
Mga kabudlayan sang isa ka hari
Si Haring Saul, ang hari sang Israel, nagdayaw sa kadalag-an ni David kay Goliat. Ginhimo ni Saul si David nga lider sang iya mga soldado.
Palangga ni David ang Ginuo kag gusto niya pirme himuon ang husto. Palangga sang katawhan sang Israel si David.
Amat-amat nga nahisa si Saul kag gintinguhaan nga patyon si David. Si David nagsunod sa Ginuo, kag ang Ginuo nagprotekta sa Iya batok kay Saul.
Madamo nga giyera ang gin-away sang mga Israelnon. Isa ka adlaw si Saul kag ang iya mga anak napatay sa inaway. Palangga sila ni David kag nasuboan sia kaayo sang iya mahibal-an ang ila kamatayon. Karon kinahanglan sang Israel sang bag-o nga hari. Ginpili sang Ginuo si David nga mangin hari. Nalipay ang mga tawo.
1 Samuel 31:2–6; 2 Samuel 1:11–12; 5:1–5
Ginbugayan sang Ginuo si Haring David kag gingiyahan sia. Sa bulig sang Ginuo, ginpirde sang mga soldado ni David ang ila mga kaaway.
Isa ka adlaw sang dapat kuntani si David magkadto sa inaway, nagtiner sia sa balay. Nakakita sia sang isa ka matahum nga babayi. Batseba ang iya ngalan, kag gusto sia pangasaw-on ni David. Pero nakasal na sia kay Urias, isa ka soldado sa hangaway ni David.
Gusto nga pangasaw-on ni David si Batseba, gani iya ginpadala si Urias sa delikado nga inaway para mapatay si Urias.
Wala madugayi nabalitaan ni David nga napatay si Urias sa inaway. Ginpadala ni David ang iya mga suluguon para dalhon si Batseba sa iya balay, kag ginpangasawa niya sia.
Pero wala malipay ang Ginuo sa ginhimo ni David. Ginpadala sang Ginuo si Natan, isa ka propeta, para hambalon si David kon ano kaseryoso sang iya sala. Nasuboan kaayo si David sa iya ginhimo sa ila ni Urias kag Batseba. Nagpangamuyo sia kag nagpuasa para sa kapatawaran sang Ginuo.