“Si Jacob kag ang Iya Pamilya,” Mga Sugilanon sa Daan nga Katipan (2022)
“Si Jacob kag ang Iya Pamilya,” Mga Sugilanon sa Daan nga Katipan
Genesis 27–33
Si Jacob kag ang Iya Pamilya
Paano ginatuman sang Ginuo ang Iya mga promisa
Naghalin si Jacob sa ila balay para magpalagyo sa iya akig nga utod nga si Esau. Ginbendisyunan si Jacob sang iya amay para makakita kag makapangasawa sang babayi nga nagapalangga sa Ginuo kag nagatuman sang Iya mga kasugoan.
Samtang nagapanglakaton si Jacob, ang Ginuo nagbisita sa iya sa isa ka panan-awon. Nagpromisa sia nga magaupod sia pirme kay Jacob. Nagpromisa si Jacob nga ihatag sa Ginuo sang ikapulo sang tanan nga iya nabaton.
Ang Ginuo nagpromisa kay Jacob nga makaangkon sia sang madamo nga kabataan. Paagi sa mga kabataan ni Jacob, pagabugayan ang mga pamilya sa kalibutan nga makilala ang Manluluwas. Ang panimalay ni Jacob sa ulihing mga adlaw ginatawag nga panimalay sang Israel.
Genesis 28:3–4, 14; 1 Nefi 10:14
Si Jacob naglakat sa lugar nga gintawag nga Haran. Didto naluyag sia sa isa ka matarong nga babayi nga gin-ngalanan Raquel.
Nagpasugot si Jacob nga magtrabaho sang pito ka tuig sa amay ni Raquel, nga si Laban, kon pasugtan sia ni Laban nga mapangasawa si Raquel. Nagpasugot si Laban. Si Jacob nagtrabaho sang pito ka tuig.
Pero gusto ni Laban nga si Lea, ang iya subang nga bata, ang mauna nga makapamana. Sa kasal, gin-into ni Laban si Jacob kag si Lea gale ang ginpapangasawa sa iya. Pero palangga ni Jacob si Raquel. Nagpromisa sia nga magtrabaho sang pito pa gid ka tuig kon pwede pa gid niya mapangasawa si Raquel. Nagpasugot si Laban, kag ang pamilya ni Jacob nagsugod sa pagdamo.
Genesis 29:28–35; 30:3–13, 17–24; Jacob 2:27–30
Wala ginbayaran ni Laban si Jacob sing husto. Pero ginbugayan sang Ginuo si Jacob sang madamo nga kasapatan kag ginhambalan si Jacob nga magpauli.
Genesis 30:31, 43; 31:1–7, 17–18
Samtang nagapapauli, nahibal-an ni Jacob nga ang iya utod nga si Esau kag 400 ka tawo ang nagasugata sa iya.
Ginapamensar ni Jacob nga basi akig pa gihapon si Esau sa iya. Ginkulbaan si Jacob sa seguridad sang iya pamilya, gani gindala niya sila sa luwas nga lugar kag nagpangamuyo.
Nagpangamuyo si Jacob bilog nga gab-i kag hasta mag-aga. Ginbisitahan sang Ginuo si Jacob kag ginbugayan. Ginhambalan sang Ginuo si Jacob nga mangin mabaskog sia nga lider sa madamo. Gin-islan sang Ginuo ang ngalan ni Jacob sang Israel.
Wala madugayi nakita ni Esau kag sang iya mga tawo si Jacob kag ang iya pamilya. Indi na akig si Esau kay Jacob. Nagdalagan sia para sugataon si Jacob kag ginhakos ini. Nalipay gid sia kaayo sang makita sia kag makilala ang iya pamilya. Nalipay man si Jacob nga makita liwat si Esau.
Gintuman sang Ginuo ang Iya mga promisa kay Jacob sa bilog niya nga kinabuhi. Nag-abot si Jacob sa ila puluy-an upod ang pamilya kag nangabuhi didto. Sugod sadto, gintawag na si Jacob nga Israel, kag ang iya pamilya gintawag nga mga Israelnon. Nagpadayon sia sa pagtuman sang mga kasuguan kag nagsimba sa Ginuo.