Makuri 6–7

E Kakoaua Tetebano ibukin Iesu Kristo

E anga maiuna te toro ae kakaonimaki ibukin ana koaua

E waekoa n rikirake te Ekaretia. E a moanna ni kangaanga irouia Abotoro tararuakiia kaaina ni kabane.

Makuri 6:1–2

A baireia Abotoro bwa a na weteia itiman mwaane bwa a na ibuobuoki. A tuangiia kaain te ekaretia bwa a na karekeia mwaane aika a wanawana ao n kaonaki maiuia n te Tamnei ae Raoiroi.

Makuri 6:3

Temanna mai ibuakoia are a rineia bon Tetebano. A anganna te kakabwaia Abotoro. E bati ana onimaki Tetebano ao e karaoi kakai aika a korakora ibuakoia aomata.

Makuri 6:5–8

E reireia taekan Iesu Kristo Tetebano ma te wanawana ao te Tamnei. Ma aki kukurei taan kairiiri n te tinakaoke n are e reireia. A taku bwa e taetae ni kaitaraa Mote ao te Atua. A uota Tetebano nako matan te ibonga ae rietaata ao tabeman taan kairiiri.

Makuri 6:9–15; 7:1

E riki ubun Tetebano bwa kanga ubun te anera. E kauringiia taan kairiiri bwa e kanakoa Mote te Atua bwa e na kamaiuia Iteraera, ma a bon aki iriira Mote n taainako. E taku Tetebano bwa Mote kanga ai aron Iesu Kristo. E kanakoa Iesu te Atua bwa e na kamaiuia Ana aomata, ma taan kairiiri a rawa n iriiria. A un taan kairiiri nakon Tetebano.

Makuri 7:20–43, 51–54

Ma kaonakina n te Tamnei ae Raoiroi, e tararake n taraa karawa Tetebano. E noora Iesu n tei irarikin te Tama are i Karawa.

Mwakuri 7:55–56

Ngke e tuangiia te bwai are e a tia n nooria Tetebano, a rikirake riki uniia. A tatakarua n un ao n taua Tetebano. A katikitikia nako tinanikun te kaawa.

Makuri 7:57

A kawenei kunnikaia irarikin waen te mwaane ae arana Tauro. Imwiina ao a kareabanaa Tetebano n atiibu ao ni kamatea. E bootau ana iango Tauro n te bwai are a karaoia. E tataro Tetebano. E butiia te Uea bwa e na kabwarai aia bure aomata ake a kammarakia. E butiia naba te Uea bwa e na butimwaea tamneina i karawa.

Makuri 7:59–60; 8:1