Mataio 26; Ruka 22; Ioane 13–14

Te Kabanea n Amwarake

E Tibwa te Toa Iesu

Iesu ao Ana Abotoro i Ierutarem bwa a na bukamarua te Toa are te Riao. Aomata aika Iutaia a bukamarua te Toa are te Riao ni katoa ririki. E buokiia n uringnga bwa, n ririki aika a bwakanako, a riki aia utu bwa taian toro i Aikubita, ao e buokiia te Atua ni katauraoa te anga are a na birinako iai.

Te Otinako 12:27

Ngke a mena i Ierutarem, iai aia baka n amwarake ae e onoti Iesu ma Ana Abotoro. E a kaman kakariaria te tai aei Iesu ni kan tibwa te amwarake aei ma ngaiia.

Ruka 22:7–15

I mwiin tiaia n amwarake, e kanoaa te boora n te ran Iesu. E a moanna n teboki waeia Ana abotoro.

Ioane 13:4–5

Ngke ai ana tai Betero, e titirakina Iesu bukin tera ngkai e karaoa aei. Tebokan te wae bon te bwai ae a taneiai ni kakaraoia taian toro.

Ioane 13:6

E taku Iesu bwa e teboki waeia bwa e katea te banna ni kakairi ibukiia. E tangiriia bwa a na beku ao itangitangiri n aron ae E tangiriia. Ngkana a karaoa aei, a na ataia aomata bwa bon Ana reirei ngaiia.

Ioane 13:14–16, 34–35

Iesu e tuangiia Ana reirei ae e a kaan ana tai ni mate. E taku Betero bwa e tauraoi ni mate ibukin Iesu.

Ioane 13:36–38

Ma e ataia Iesu ae a nang kaoti taai aika a kangaanga. E tuanga Betero bwa i mwaain tangin te moa n te ingabong are i mwiina, e na taetae Betero teniua te tai ae E aki kinaa Iesu.

Ioane 13:38

E ataia Iesu ae a na raraoma ao ni maaku Ana Abotoro. E berita bwa te Atua e na kanakoa te Tamnei ae Raoiroi nakoia. E na karaui nanoia te Tamnei ae Raoiroi, n reireiniia, ao ni buokiia n uringa te bwai are a reireinaki iai iroun Iesu. E tuangiia bwa a na aki raraoma ke ni maaku. E taku, “Ngkana Kam Tangirai, ao kam na Tou Mwin Au Tua”

Ioane 14:1, 15–16, 26–27

Ngkanne Iesu e karaoa te bwai ae rangi n onoti ni buokiia Ana Abotoro bwa a na ururingnga n tainako. E anganiia te toa. Te moan, E kakabwaia te toa, e bwenauaia, ao n anganiia Ana Abotoro. E tuangiia Iesu bwa a na iangoa Rabwatana n te tai are a kana iai te kariki. E tuangiia bwa a na uringnga bwa E na mate ibukiia.

Mataio 26:26; Ruka 22:19

Iesu e kabwaroa te wain nako nanon te mwangko. E kakabwaiaa te wain ao e tuangiia Abotoro bwa a na nimma. E tuangiia Iesu bwa a na iangoa Raraana n te tai are a nimma iai te wain. E tuangiia bwa a na uringnga bwa E na korakai, wanako raraana, ao ni mate ibukin aia bure aomata ni kabane bwa ti aonga n rairinanora ao ni kabwaraaki ara bure.

Mataio 26:27–28; Ruka 22:20

E kabwarabwara ngkanne Iesu bwa Ngaia bon te kai ae te kureebe, ao Ana reirei bon tenaan mwaanga. Ngkana e teimatoa n nim te mwaanga nakon te kai ae te kureebe, e na kariki uaa. Te mwaanga are e aki nim nakon te kai ae te kureebe e na mate ao n aki kariki uaa. E tangiriia Ana Abotoro Iesu bwa a na teimatoa n nim Mangaia man itangitangiri ao ni kawakin Ana tua.

Ioane 15:4–12

I mwiin te angareirei i aon bwaai aikai, Iesu ma Ana Abotoro a anenea te kuna n taromauri. A rianna n nakon te onaroka are Ketetemwane.

Mataio 26:30