Ruka 4:16–31

Iesu e Kakoaua n Ana Mition

E aki butimwaeaki i Natareta

Iesu e nako Natareta, are a maeka iai ana utu ao raoraona. Bon te tabo are E ikawairake iai. Ni bongin te Tabati, E nakon te tinakoke, are a nako iai aomata ni kamatebwaia koroboki aika a tabu ao a taromauriia te Atua.

Ruka 4:16–17

N te tinakoke, Iesu e tei ao e wareki koroboki aika a tabu mairoun te burabeti are Itaia. N koroboki aika a tabu e taku bwa n te bong teuana ao e na roko te Tia Kamaiu E na taetaekina te euangkerio nakoia kainnano ao e na kamaoi nano aika a uruaki. E na buokiia matakii ao naake a korakai.

Itaia 61:1–2; Ruka 4:17–19

Ngke e bane ana wareware Iesu ao e tekateka. A bane n taraia aomata. E tuangiia bwa n te bong raoi anne, koroboki aika a tabu ake e wareki a na roko koauaia. Bon Ngaia te Tia Kamaiu.

Ruka 4:21

Kain Natareta a rangi ni miimi n te bwai are e taekinna Iesu. E na kanga Iesu n riki bwa te Tia Kamaiu? A taku bwa Ngaia bon ti natin Maria ao Iotebwa, tiaki natin te Atua. Irouia, Ngaia e taraa n ae bon te aomata ni kaangai.

Ruka 4:22

Iesu e ataia bwa aomata a tangiria bwa E na karaoi kakai ni kaotia bwa bon Ngaia te Tia Kamaiu. E taku bwa kakai bon ibukiia aomata ake a kakoaua, ao n tabetai te Atua e karaoi kakai ibukiia naake tiaki kain Iteraera ibukina bwa e korakora riki aia onimaki. Tabeman aomata ake n te tinakoke a un iroun Iesu.

Ruka 4:23–28

A kairoroa bwa e na otinako man te kaawa ao ni waerake nako taubukin te tabuki. A tangiria bwa a na karenakoa man te tabuki.

Ruka 4:28–29

Ma Iesu e rabanako mairouia aomata ake a un.

Ruka 4:30

Ibukina bwa aki tangiria i Natareta, Iesu e nakon te kaawa teuana bwa e na angareirei.

Ruka 4:31–32