Karaki man Booki Aika Tabu
Iesu E Kamaiua Rataro—“Bon Ngai te mangauti, ao te maiu”

Ioane 11:1–46

Iesu E Kamaiua Rataro

“Bon Ngai te mangauti, ao te maiu”

Maria, Mareta, ao Rataro.

A maeka Maria, Mareta, ao Rataro n te kaawa ae arana Betania. A kakoaua Iesu, ao E tangiriia. Maria ao Mareta bon mwanen Rataro.

Ioane 11:1, 5

E rootaki Rataro n te aoraki.

E a rootaki Rataro n te aoraki ae korakora. Iesu e reirei n te kaawa teuana. A kanakoa aia rongorongo Maria ma Mareta Nakoina ni kaongoa ae aoraki Raoraona.

Ioane 11:1–3

E taku Iesu bwa E na kamaiua Rataro.

E tiku n tataninga Iesu inanon uabong te bong. Imwiina ao E tuangiia Ana reirei bwa a nako Betania. A raraoma Ana reirei bwa iai tabeman aomata irarikin Betania ae a iangoa kamwaruaan Iesu. Ma Iesu e tangiriia ni kan buoka Rataro. E kaotia Iesu bwa e a tia ni mate Rataro, ma E tangiria bwa e na Kamaiua.

Ioane 11:6–16

E kaitibo Mareta ma Iesu.

E kaitibo Mareta ma Iesu i tinanikun te kaawa. E tuanga Iesu bwa ngke arona bwa e a kaman roko, ao e na bon aki mate Rataro. E berita Iesu nakoina bwa e na manga maiu Rataro.

Ioane 11:17–24

E maroro Mareta ma Iesu.

E taku Iesu, “Bon Ngai te mangauti, ao te maiu.” E tuanga Mareta ngkana e Kakoauaa. E kaeka Mareta, “I kakoaua bwa bon Ngkoe te Kristo, Natin te Atua.”

Ioane 11:25–27

Mareta, Maria, ao Iesu.

E oki Mareta nakon mwengaia ao n tuanga Mareta ae e a roko Iesu. E nako Maria ao e bwaka i waen Iesu, ao n tang ibukin mwanena. E tang naba Iesu. E korakora ana tangira ibukiia Rataro, Maria ao Mareta.

Ioane 11:28–36

E nako Iesu nakon te bwanga are e taunaki iai Rataro.

A nako Iesu, Maria, Mareta, ao tabeman nakon te bwanga are taunaki iai Rataro. E rabunaki matana n te atiibu ae bubura. E tuatua Iesu bwa e na kanakoaki te atiibu.

Ioane 11:38-39

Iesu e tuanga Mareta bwa e na Onimakinna.

Ma Mareta e tuanga Iesu bwa ai abong ana bong ni mate Rataro. Iesu e kauringa Mareta taekan Ana berita. E tuangnga bwa e na Onimakinna.

Ioane 11:39–40

Iesu E tuanga Rataro bwa e na otinako.

Ao imwiina e tataro Iesu nakon Tamana. E kaitau nakon te Atua ngkai e a bon Ongoongo naba Irouna. Iesu e tangiria bwa a na kakoaua aomata ae bon te Atua ae kanakomaia bwa e na riki bwa te Tia Kamaiu. Ao imwiina e takarua Iesu, “Rataro, oti nako.”

Ioane 11:41–43

E oti nako Rataro mai inanon te bwanga.

E oti nako Rataro mai inanon te bwanga. E bon tiku niiran rabwatana te kabae ao rabunana te kunnikai ake taunaki iai. E tuatua Iesu bwa e na kanakoaki niirana. A mwaiti ibuakoia ake a noora te bwai are riki ao a kakouaa ngkai ae Iesu bon te Tia Kamaiu, ao Natin te Atua.

Ioane 11:44–45