Ako ʻo e Tokāteliné
Talangofuá
Ko e ʻuhinga ʻe taha ʻoku tau ʻi heni ai ʻi he māmaní, ke tau fakahaaʻi ʻetau loto-fiemālie ke talangofua ki he ngaahi fekau ʻa e Tamai Hēvaní. ʻOku tuku mai ʻe he ʻOtuá ʻa e ngaahi fekaú ke tau lelei ai. ʻOku iku e talangofua ki he ngaahi fekaú ki ha ngaahi tāpuaki mei he ʻOtuá pea mo fakahaaʻi ʻetau ʻofa kiate Iá.
Vakai Fakalūkufuá
ʻOku ongoʻi ʻe ha kakai ʻe niʻihi ʻoku fakakavenga ʻa e ngaahi fekaú pea ʻoku nau fakangatangata ʻa e tauʻatāiná mo e tupulaki fakatāutahá. Ka naʻe akoʻi mai ʻe he Fakamoʻuí, ʻoku toki maʻu pē ʻa e tauʻatāina moʻoní mei he muimui kiate Iá: “Kapau te mou nofo maʻu ʻi heʻeku leá, pea ko ʻeku kau ākonga moʻoni ʻa kimoutolu; pea te mou ʻilo ʻa e moʻoní, pea ʻe fakatauʻatāinaʻi ʻa kimoutolu” (Sione 8:31–32). ʻOku tuku mai ʻe he ʻOtuá ʻa e ngaahi fekaú ke tau lelei ai. Ko ha ngaahi fakahinohino ʻofa kinautolu maʻa ʻetau fiefiá pea mo ʻetau lelei fakatuʻasino mo fakalaumālié.
ʻI he maama fakalaumālié, naʻe puleʻi ʻe he Tamai Hēvaní ha Fakataha Alēlea lahi ʻi he Langí. Naʻa tau ako ai kau ki Heʻene palani maʻa hotau fakamoʻuí, ʻa ia ne kau ai ha vahaʻataimi ʻo e siviʻi ʻi he māmaní: “Te tau ngaohi ha māmani ʻa ia ʻe lava ke nofo ai ʻa kinautolú ni; pea te tau siviʻi ʻa kinautolu ʻi he meʻá ni, ke vakai pe te nau fai ʻa e ngaahi meʻa kotoa pē ʻe fekau ʻe he ʻEiki ko honau ʻOtuá kiate kinautolú” (ʻĒpalahame 3:24–25). Ko e ʻuhinga ʻe taha ʻoku tau ʻi heni ai ʻi he māmaní, ke tau fakahaaʻi ʻetau loto-fiemālie ke talangofua ki he ngaahi fekau ʻa e Tamai Hēvaní.
Naʻe akoʻi mai ʻe he Palōfita ko Siosefa Sāmitá, ʻoku iku ʻa e talangofua ki he ngaahi fekaú, ki ha ngaahi tāpuaki mei he ʻOtuá. Naʻá ne pehē: “ʻOku ʻi ai ha fono naʻe tuʻutuʻuni pau ʻi he langí kimuʻa ʻi he teʻeki ai ke ʻai ʻa e ngaahi tuʻunga ʻo e māmaní, ʻa ia ʻoku makatuʻunga ki ai ʻa e ngaahi tāpuaki kotoa pē—pea ʻo ka tau ka maʻu ha tāpuaki mei he ʻOtuá, ʻoku tupunga ia ʻi he talangofua ki he fono ʻa ia ʻoku makatuʻunga ia ki aí” (Tokāteline mo e Ngaahi Fuakava 130:20–21). Naʻe akoʻi foki ʻe he Tuʻi ko Penisimaní ʻa e tefitoʻi moʻoni ko ʻení. Naʻá ne akonaki mai, “ʻOku ou loto ke mou fakakaukau ki he tuʻunga monūʻia mo fakafiefia ʻo kinautolu ʻoku tauhi ʻa e ngaahi fekau ʻa e ʻOtuá. He vakai, ʻoku nau monūʻia ʻi he meʻa kotoa pē, ʻa e meʻa fakamāmaní mo e fakalaumālié fakatouʻosi; pea kapau te nau kātaki ʻi he tui faivelenga ʻo aʻu ki he ngataʻangá ʻe maʻu hake ʻa kinautolu ki he langí, koeʻuhi ke nau nofo mo e ʻOtuá ʻi he tuʻunga fiefia ʻoku ʻikai hano ngataʻanga. ʻOiauē manatu, manatu ʻoku moʻoni ʻa e ngaahi meʻá ni; he kuo folofola ʻaki ia ʻe he ʻEiki ko e ʻOtuá” (Mōsaia 2:41).
Ko ʻetau talangofua ki he ngaahi fekaú, ko hano fakahaaʻi ia ʻo ʻetau ʻofa ki he Tamai Hēvaní mo Sīsū Kalaisi. Naʻe folofola ʻe he Fakamoʻuí, “Kapau ʻoku mou ʻofa kiate au, fai ʻeku ngaahi fekaú” (Sione 14:15). Naʻá Ne folofola kimui ange: “Kapau ʻoku mou fai ʻeku ngaahi fekaú, te mou nofo ʻi heʻeku ʻofá; ʻo hangē ko ʻeku fai ʻa e ngaahi fekau ʻa ʻeku Tamaí, peá u nofo ʻi heʻene ʻofá” (Sione 15:10).
Lekooti e Ngaahi Ongo ʻOkú ke Maʻú
Ngaahi Tefito Fekauʻakí
Ngaahi Folofolá
Ngaahi Fakamoʻoni Fakafolofolá
Ngaahi Maʻuʻanga Tokoni Ako Folofolá
-
-
Fakahinohino ki he Ngaahi Folofolá, “Talangofuá”
-
Ngaahi Pōpoaki mei he Kau Taki ʻo e Siasí
Ngaahi Vitioó
“Ko e Tauʻatāiná ʻa e Talangofua ki he Fonó”
Ngaahi Vitiō ʻa e Kuaea Tāpanekalé
Ngaahi Maʻuʻanga Tokoni Fakaakó
ʻŪ Makasini ʻa e Siasí
Isaias Vargas Chavarria, “Tui Veiveiuá, Mohu Tāpuekiná,” Liahona, Māʻasi 2017
“Ko e Sīpinga ʻo e Talangofua ʻa e Fakamoʻuí,” Liahona, ʻEpeleli 2015
Russell M. Nelson, “Ko e hā ʻoku mātuʻaki mahuʻinga ai ʻa e talangofuá?” Liahona, ʻEpeleli 2015
“Ko e Ngaahi ʻUlungaanga ʻo Sīsū Kalaisí: ʻAlo Talangofua,” Liahona, Sānuali 2015
“Feeling the Love of the Lord through Obedience,” Liahona, Māʻasi 2004
Ngaahi Tohi Lēsoni Akó
Ngaahi Akonaki ʻa e Kau Palesiteni ʻo e Siasí
Ngaahi Talanoá
Ngaahi Maʻuʻanga Tokoni Ki Hono Akoʻí
Ngaahi Fokotuʻutuʻu Ki Hono Akoʻí