“Papitaiso maʻá e Pekiá,” Ngaahi Tefitó mo e Ngaahi Fehuʻí (2023)
Vakai Fakalūkufuá
Papitaiso maʻá e Pekiá
Naʻe akoʻi ʻe Sīsū Kalaisi ʻoku mahuʻinga ʻa e papitaisó ki hono fakamoʻui ʻo e kakai kotoa pē kuo moʻui ʻi he māmaní. Ka neongo ia, kuo pekia ha kakai tokolahi kae teʻeki papitaiso kinautolu. Ko e niʻihi, ne papitaiso kinautolu taʻe maʻu e mafai totonú. Koeʻuhí ko e ʻaloʻofa ʻa e ʻOtuá, naʻá Ne teuteuʻi ha hala maʻá e kakai kotoa pē ke maʻu e ngaahi tāpuaki ʻo e papitaisó. ʻOku ʻoatu ʻe he kāingalotu ʻo e Siasí ʻa e ngaahi tāpuaki ko ʻení ki he ngaahi kui kuo pekiá ʻaki ʻenau fakahoko e papitaiso fakafofongá maʻanautolu kuo pekiá. ʻE lava leva e niʻihi fakafoʻituituí ʻo fili ke tali pe fakafisingaʻi e ngaahi ouau kuo fakahoko maʻanautolú.
Naʻe folofola ʻa Sīsū Kalaisi, “Kapau ʻe ʻikai fanauʻi ʻa e tangatá ʻi he vai pea mo e Laumālie, ʻe ʻikai ʻaupito faʻa hū ia ki he puleʻanga ʻo e ʻOtuá.” Naʻa mo Sīsū Kalaisi Tonu naʻá Ne papitaiso.
Kuo moʻui ha kakai tokolahi ʻi he māmaní kuo teʻeki ai ke nau fanongo ʻi he ongoongolelei ʻo Sīsū Kalaisí pea naʻe ʻikai papitaiso kinautolu. Ne moʻui ha niʻihi kehe ʻo ʻikai maʻu ha mahino kakato ki he mahuʻinga ʻo e ouau ʻo e papitaisó. Ka ko ha niʻihi naʻe papitaiso kinautolu taʻe maʻu e mafai totonú.
ʻOku ʻikai fakamalaʻiaʻi ʻe he ʻEikí e kakai naʻe teʻeki ai ke nau maʻu e faingamālie ke papitaisó, he naʻe ʻikai ko hanau foʻuí, koeʻuhí ko ha ʻOtua ʻofa Ia. Ko ia ai, kuó Ne fakamafaiʻi ke fakahoko e papitaiso fakafofongá maʻanautolu. ʻOku papitaiso ha tokotaha moʻui, ko e angamahení ko ha hako ʻo e pekiá kuó ne hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ke fakafofongaʻi ʻa e tokotaha pekiá. ʻOku fakahoko e ngāue ko ʻení ʻe he kāingalotu ʻo e Siasí ʻi he ngaahi temipale ʻi he funga ʻo e māmaní.
ʻOku maʻuhala ha kakai ʻe niʻihi ʻo pehē ko e taimi ʻoku fakahoko ai e papitaiso maʻá e kau pekiá ʻoku papitaiso kinautolu ki he Siasí taʻe te nau loto ki ai. ʻOku ʻikai ke pehē ia. ʻOku maʻu ʻe he tokotaha fakafoʻituitui takitaha ʻa e tauʻatāina ke filí, pe ko e totonu ke filí. ʻOku makatuʻunga e ʻaonga ha papitaiso fakafofonga ʻi hono tali ia ʻe he tokotaha kuo pekiá mo fili ke tali pea muimui ki he Fakamoʻuí lolotonga ʻene nofo ʻi he maama tataliʻanga ʻo e ngaahi laumālié. ʻOku ʻikai tānaki e ngaahi hingoa ʻo e kau pekiá ki he ngaahi lekooti mēmipasipi ʻo e Siasí.
ʻOku fakahaaʻi mai ʻe he Fuakava Foʻoú naʻe fakahoko e papitaiso maʻá e kau pekiá lolotonga e taimi ʻo e ʻAposetolo ko Paulá. Naʻe fakafoki mai e ouau ko ʻení fakataha mo hono fokotuʻu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Ngaahi Tefito Fekauʻakí
Kanotohi Fekauʻakí
Tohi fakahinohino ako ʻo e ongoongoleleí (Ngaahi Ouau Fakafofonga maʻá e Kau Pekiá)