Ako ʻo e Tokāteliné
ʻAukaí mo e Ngaahi Foaki ʻAukaí
Ko e ʻaukaí mo e ngaahi foaki ʻaukaí ko e founga ia ʻe taha ke tokoniʻi ai ʻa e masivá mo e faingataʻaʻiá. Naʻe akoʻi ʻe he Fakamoʻui ko Sīsū Kalaisí ʻoku totonu ke tau ʻofa ki hotau ngaahi kaungāʻapí ʻo hangē pē ko kitautolú. ʻI heʻetau feilaulau mo tokoniʻi e niʻihi kehé ʻo hangē ko e Fakamoʻuí, ʻoku fakatou tāpuekina ʻa e kau foakí mo kinautolu ʻoku foaki ki aí ʻaki ʻa e manavaʻofa, angaʻofa, mo e ʻofa ʻoku fakatau ki he hakeakiʻí mo e moʻui taʻengatá.
Vakai Fakalūkufuá
Naʻe akoʻi ʻe he Fakamoʻui ko Sīsū Kalaisí ʻoku totonu ke tau ʻofa ki hotau ngaahi kaungāʻapí ʻo hangē pē ko kitautolú. ʻI heʻetau feilaulau mo tokoniʻi e niʻihi kehé ʻo hangē ko e Fakamoʻuí, ʻoku fakatou tāpuekina ʻa e kau foakí mo kinautolu ʻoku foaki ki aí ʻaki ʻa e manavaʻofa, angaʻofa, mo e ʻofa ʻoku fakatau ki he hakeakiʻí mo e moʻui taʻengatá.
Naʻe akoʻi mai ʻe Pīsope Tiini A. Teivisi “ko e tokoni ki he masivá mo e faingatāʻiá ko ha tefitoʻi tokāteline mahuʻinga ia pea ko ha tefitoʻi konga mahuʻinga ia ʻo e palani ʻo e fakamoʻuí” (“Ko e Fono ʻo e ʻAukaí: Ko ha Fatongia Fakatāutaha ke Tokangaʻi ʻa e Masivá mo e Faingataʻaʻiá,” konifelenisi lahi ʻo ʻOkatopa 2014).
ʻOku fonu ʻa e folofolá ʻi he ngaahi fekau ko ʻeni ke tokoni ki he niʻihi kehé.
“Koeʻuhi ʻe ʻikai ʻaupito ngata ʻa e masivá mei ho fonuá: ko ia ʻoku ou fekauʻi koe, ʻo pehē, Ke ke mafola ho nimá ʻo lahi ki ho tokouá, ki he masivá, mo ia ʻoku tuʻutāmaki, ʻi ho fonuá” (Teutalōnome 15:11).
Ko e ʻaukaí mo e ngaahi foaki ʻaukaí ko e founga ia ʻe taha ke tokoniʻi ai ʻa e masivá mo e faingataʻaʻiá.
“Kuo fokotuʻu ʻe he ʻEikí ʻa e fono ʻo e ʻaukaí mo e paʻanga ʻaukaí ke tāpuekina ai Hono kakaí mo ʻomi ha founga ke nau tokoniʻi ai ʻa e kakai faingataʻaʻiá (vakai, ʻĪsaia 58:6–12Malakai 3:8–12) Ko e taimi ʻoku ʻaukai ai ʻa e kāingalotú, ʻoku kole ke nau foaki ki he Siasí ha foaki ʻaukai ʻoku tatau mo e mahuʻinga ʻo e meʻatokoni naʻa nau mei maʻú. Kapau ʻe lava, ʻoku totonu ke nau manavaʻofa mo foaki ke lahi ange. ʻOku kau ʻi he ngaahi tāpuaki fekauʻaki mo e fono ʻo e ʻaukaí ʻa e ofi ki he ʻEikí, tupulaki e ivi fakalaumālié, tuʻunga lelei fakatuʻasinó, manavaʻofa lahi ange, pea mo ha holi lahi ange ke tokoni” (Tohi Tuʻutuʻuni Fika 2, 6.1.2).
Lekooti e Ngaahi Ongo ʻOkú ke Maʻú
Ko e hā ʻa e ʻaukai?
Ko e ʻaukaí ko ha fekau ia mei he ʻEikí ʻa ia ʻoku tau fakavaivaiʻi ai kitautolu ʻi Hono ʻaó ʻaki ʻetau fili tauʻatāina ke ʻoua ʻe kai mo inu (vakai, Tokāteline mo e Ngaahi Fuakava 88:76).
ʻI he Siasí he ʻahó ni, ʻoku tuku taha ʻa e ʻaho Sāpate ʻe taha ʻi he māhina ko e fakataumuʻa ki he ʻaukaí. ʻOku taʻekai mo taʻeinu ʻa e kau mēmipa ʻo e Siasí ʻi ha houa kai hokohoko ʻe ua ʻi ha vahaʻataimi ko e houa ʻe 24 pea tānaki leva ʻa e paʻanga naʻe mei fakamoleki ki he meʻakai ko iá ke ʻave maʻá e faingataʻaʻiá (vakai, ʻAlamā 34:28).
Naʻe fakahoko ʻa e ʻaukaí ʻe he kau palōfita ʻa e ʻOtuá mo e kau mēmipa ʻo Hono Siasí talu mei he kuonga muʻá. ʻI he kuonga ʻo e Fuakava Motuʻá, naʻe ʻaukai ʻa Mōsese mo ʻIlaisiā (vakai, ʻEkesōtosi 34:28; 1 Ngaahi Tuʻi 19:8). Naʻe faʻa ngāue ʻaki ʻe he kau ʻIsilelí ʻa e ʻaukaí ki ha ngaahi kātoanga pau pe ki ha tokoni fakalangi. ʻI he kuonga ʻo e Fuakava Foʻoú, naʻe ʻaukai ʻa Sīsū Kalaisi ʻi he ʻaho ʻe 40 mo e pō ʻe 40 ko e teuteu ki Heʻene ngāué (vakai, Mātiu 4:1–4). Naʻá Ne akoʻi ʻEne kau ākongá fekauʻaki mo e mālohi pea mo e mahuʻinga ʻo e ʻaukaí. ʻOku hokohoko atu ʻa e fekau ko ʻeni ke ʻaukaí ʻi hotau kuongá ni.
Te u ngaohi fēfē nai ke hoko ʻeku ʻaukaí ko ha foaki ʻoku taau ki he ʻEikí?
Naʻe akoʻi mai ʻe Siosefa B. Uefilini: “Ka ʻikai e lotú, ʻoku ʻikai kakato e ʻaukaí; ko ha taʻekai pē ia. Kapau ʻoku tau fie maʻu ke mahulu hake ʻetau ʻaukaí ʻi he taʻekaí pē, kuo pau ke tau ʻohake hotau lotó, ʻatamaí, pea mo e leʻó ʻi he fehokotaki mo ʻetau Tamai Hēvaní. Ko e ʻaukaí ʻi hono fakatahaʻi mo e lotu lahí, ʻoku mālohi ia. Te ne lava ʻo fakafonu hotau ʻatamaí ʻaki e ngaahi fakahā ʻo e Laumālié. Te ne lava ke fakamālohia kitautolu ʻi he ngaahi taimi ʻo e ʻahiʻahí” (”The Law of the Fast,” konifelenisi lahi ʻo ʻEpeleli 2001).
Naʻe pehē ʻe ʻEletā L. Tomu Peuli: “Ko e lōloa ange ʻeku moʻuí, ko e lahi ange ia ʻeku mālieʻia ʻi he founga ʻoku tauhi ʻaki ʻe he ʻEikí ʻa e masivá mo e faingataʻaʻiá. Ko e moʻoni he ʻikai fakakaukau ha tangata ki ha founga faingofua kae loloto ʻaupito ki hono feau e ngaahi fiemaʻu ʻa e tangatá—ke tupulaki fakalaumālie mo fakatuʻasino ʻo fakafou ʻi ha ʻaukai fakataimi kae ʻave e paʻanga ne fakahaofi mei he ngaahi houa kai ko iá ki he pīsopé ke fakaʻaongaʻi ki hono tauhi e ngaahi fiemaʻu ʻa e masivá, ko e mahakí, mo e liʻekiná, ʻa ia ʻoku nau fie maʻu e tokoni mo e poupou ke nau lavaʻi ʻa e fonongaʻanga ʻo e moʻuí” (”The Law of the Fast,” konifelenisi lahi ʻo ʻEpeleli 1986).
Tokoni lahi ange mei he folofolá: ʻAmenai 1:26; Tokāteline mo e Ngaahi Fuakava 59:12–16; ʻAlamā 17:3
Te u fakaʻaongaʻi fēfē ʻa e faingamālie ʻo e ʻaukaí?
ʻE lava ke hoko ʻa e ʻaukaí ko ha aʻusia fakalaumālie ange pea tohoakiʻi koe ke ke ofi ange ai ki he ʻOtuá. Fakakaukau ki he ngaahi meʻa ko ʻení:
-
Kamata pea fakaʻosi ʻaki hoʻo ʻaukaí ha lotu.
-
ʻAukai mo ha taumuʻa (vakai Mātiu 17:18–21; Mōsaia 27:22–23; ʻAlamā 5:45–46; 28:4–6; Hilamani 3:35).
-
ʻAukai mo ha fofonga fiefia (vakai Mātiu 6:1–4, 16–18; 3 Nīfai 13:16–18).
-
Poupouʻi e kau mēmipa ho fāmilí ke nau ʻaukai, ʻo muimui maʻu pē ki he faleʻi fakapotopoto ʻa Palesiteni Siosefa F. Sāmitá:
“ʻOku tokolahi ha niʻihi ʻoku nau vaivai fakaesino, ko e niʻihi ʻoku nau mahamahaki, pea ko e niʻihi ʻoku nau toutama; ko e niʻihi peheé ʻoku ʻikai fie maʻu ia ke nau ʻaukai. ʻOku ʻikai foki totonu ke fakamālohiʻi ʻe he ngaahi mātuʻá ʻenau fānau īkí ke ʻaukai” (Gospel Doctrine, p. 244).
Naʻe akonaki mai foki ʻe Palesiteni Siosefa F. Sāmita ke tau fakapotopoto ʻi heʻetau ʻaukaí. “ʻOku ʻi ai e meʻa ko e tōtuʻa hono fakahokó. ʻE ala ʻaukai mo lotu ha tangata kae ʻoua kuó ne tamateʻi ia; pea ʻoku ʻikai hano ʻaonga; pe ha fakapotopoto ai. … ʻE lava ke fanongoa ʻe he ʻEikí ha lotu faingofua ʻoku fakahoko ʻi he tuí, ʻi ha kupuʻi lea siʻisiʻi, pea te ne ʻafioʻi ʻa e ʻaukai he ʻikai malava ʻo fakalaka ʻi he houa ʻe uofulu-mā-faá, ʻo lelei tatau pē mo ʻEne tali ha lotu ʻi ha kupuʻi lea ʻe lauiafe mo ha ʻaukai māhina ʻe taha. … ʻE tali ʻe he ʻEikí ʻa e meʻa ʻoku feʻungá, ʻaki ha finangalo lelei mo fakafiemālie ange ʻi he meʻa ko ia ʻoku fuʻu tōtuʻa mo taʻemahuʻingá” (ʻi he Conference Report, ʻOkatopa 1912, 133–34).
-
Kau atu mo ho fāmilí ki ha houalotu ʻaukai mo fakamoʻoni (vakai, ʻAlamā 6:6; Molonai 6:5).
-
ʻAukai ki ha ngaahi taumuʻa mahuʻinga ʻi ha taimi kehe mei he Sāpate ʻaukaí (vakai Mōsaia 27:22).
-
Totongi ha foaki ʻaukai ʻoku lahí, poupouʻi hoʻo fānaú ke nau tokoni foki ki he foaki ʻaukaí (vakai, Tokāteline mo e Ngaahi Fuakava 104:14–18).
-
Akoʻi hoʻo fāmilí ke nau foaki loto-vēkeveke mo loto-fiefia (vakai, 2 Kolinitō 9:6–7; 3 Nīfai 13:16–18; Molonai 7:6–8).
Ko e hā ʻa e ngaahi tāpuaki ʻo hono tauhi e fono ʻo e ʻaukaí?
Naʻe akoʻi ʻe ʻEletā L. Tomu Peuli: “Ko e fono ʻo e ʻaukaí ʻoku ʻi ai hono ngaahi taumuʻa maʻongoʻonga ʻe tolu. ʻUluakí, ʻokú ne fai ha tokoni ki he masivá ʻo fakafou ʻi he ngaahi foaki ʻaukaí, ʻa ia ʻoku fakamahuʻingaʻi ki he ngaahi houa kai ʻa ia ne tau taʻekai aí. Uá, ʻoku ʻaonga fakatuʻasino kiate kitautolu ʻa e ʻaukaí. Tolú, ʻokú ne fakalahi ʻa e loto-fakatōkilalo mo e tuʻunga fakalaumālie ʻo e tokotaha takitaha” (“The Law of the Fast,” konifelenisi lahi ʻo ʻEpeleli 1986).
“ʻI he taimi ʻoku fiekaia ai ʻa e masivá, tuku kiate kinautolu ʻoku nau maʻu ʻa e meʻakaí ke nau ʻaukai ʻi ha ʻaho ʻe taha pea foaki ʻa e meʻakai naʻe totonu ke nau kai ʻi he ʻaho ko iá ki he pīsopé ke tokoniʻi ʻaki ʻa e masivá, pea ʻe faingamālie ʻa e tokotaha kotoa ʻo fuofuoloa. … Pea kapau ʻe tauhi ʻe he kāingalotú kotoa ʻa e tefitoʻi moʻoni ko ʻení ʻi he loto fiefia mo e fofonga fiefia, ʻe hulu maʻu ai pē ʻa e meʻa te nau maʻú” (Hisitōlia ʻo e Siasí, 7:413; vakai foki Joseph B. Wirthlin, “The Law of the Fast,” konifelenisi lahi ʻo ʻEpeleli 2001).
“Foaki ke lahi koeʻuhí ke tupulaki foki mo kimoutolu. ʻOua te ke foaki pē koeʻuhi ke lelei ki he masivá, ka ke foaki koeʻuhí ko hoʻo leleí. Foaki feʻunga koeʻuhí ka ke lava ʻo hū ki he puleʻanga ʻo e ʻOtuá ʻaki hoʻo fakatapui hoʻo koloá mo ho taimí. Totongi totonu ʻa e vahehongofulú pea mo e foaki ʻaukaí ʻo kapau ʻokú ke fie maʻu ʻa e ngaahi tāpuaki ʻo e langí. ʻOku ou palōmesi kiate kimoutolu kotoa pē te mou fai iá ʻe toe lahi ange hoʻomou tuʻumālié, ʻi he fakalaumālié mo e fakatuʻasinó fakatouʻosi. ʻE fakapaleʻi koe ʻe he ʻEikí ʻo fakatatau mo hoʻo ngaahi ngāue leleí” (Marion G. Romney, Welfare Agricultural Meeting, Sept. 30, 1967; vakai foki Marion G. Romney, “The Blessings of the Fast,” July 1982).
Tokoni lahi ange mei he folofolá: ʻĪsaia 58:6–12; Malakai 3:10; ʻAlamā 17:1–3
ʻOku vahevahe fēfē nai ʻa e ngaahi foaki ʻaukaí?
Naʻe akoʻi ʻe ʻEletā Siosefa B. Uefilini, “ʻOku fakaʻaongaʻi ʻa e foaki ʻaukaí ki he taumuʻa pē ʻe taha: ke tāpuekina e moʻui ʻa kinautolu ʻoku faingataʻaʻiá. Ko e paʻanga kotoa pē ʻoku ʻave ki he pīsopé ko ha foaki ʻaukai ʻoku fakaʻaongaʻi ia ke tokoni ki he masivá” (Konifelenisi lahi ʻo ʻEpeleli 2001).
ʻOku uiuiʻi ʻe he ʻEikí ʻa e pīsope ʻo e uōtí ke tokangaʻi ʻa e ngaahi meʻa fakatuʻasino kotoa pē, kau ai ʻa hono tufaki ʻo e paʻanga foaki ʻaukaí (vakai, Tokāteline mo e Ngaahi Fuakava 107:68). Kuo hilifaki ki he pīsopé ʻa e ngaahi mālohi ʻo e faʻa ʻiloʻiló, ʻokú ne fili pe ko hai ʻoku totonu ke ne maʻu ha tokoni fakatuʻasinó pea ko e hā e founga ʻoku totonu ke foaki aí. ʻOku tākiekina ʻa e pīsopé ʻaki ha ngaahi tefitoʻi moʻoni mahuʻinga fakauelofea, fakataha mo e mahino moʻoni ki he falala toputapu ko ʻení. ʻOku kau ʻi he ngaahi tefitoʻi moʻoni ko ʻení ʻa hono faleʻi ʻi he ʻofa mo e manavaʻofá; poupouʻi ʻa e moʻui fakafalala ʻa e fāmilí kiate kinautolú; fakamālohia ʻa e kāingalotú ke nau moʻui fakafalala pē kiate kinautolu ʻi he fakalaumālié mo e fakatuʻasinó fakatouʻosi; feau e ngaahi fiemaʻu fakataimí; foaki ha ʻū koloa mo ha ngaahi tokoni ʻoku mahuʻingá ke poupouʻi ʻa e moʻui ʻoku angamaheni ki ai ʻa e kau mēmipa tokolahi ʻo e uōtí; pea ʻoatu ha ngaahi faingamālie ke ngāue ʻo fakatatau mo e malava ʻe he tokotaha ʻoku fai ki ai e tokoní ke ngāué.
Naʻe akoʻi ʻe Palesiteni Kōtoni B. Hingikelī: “ʻOku mau fakatauange ʻe feʻunga ʻa e totongi ha foaki ʻaukai ʻoku lahí ke feau ai e ngaahi fiemaʻu ʻa kinautolu ʻoku fusi-mo-ʻomó. Kapau ʻe tauhi ʻe he mēmipa kotoa pē ʻo e Siasí ni ki he ʻaukaí pea foaki lahi, ʻe faitāpuekina mo tauhi ʻa e masivá mo e faingataʻaʻiá—ʻo ʻikai ngata pē ʻiate kinautolu ʻi he Siasí ka ʻe kau ai foki mo ha tokolahi kehe. ʻE tāpuekina ʻi he sino mo e laumālie ʻa e tokotaha kotoa pē ʻokú ne fai e foakí, pea ʻe mākona ʻa e fiekaiá, ʻe fakakofuʻi mo e telefuá ʻo fakatatau mo e fiemaʻú” (“Rise to a Larger Vision of the Work,” konifelenisi lahi ʻo ʻEpeleli 1990).
Ki ha fakamatala kau ki hono ngāue ʻaki ʻo e ngaahi foaki ʻaukaí, ʻe lava ke vakai ʻa e pīsopé ki he Tohi Fakahinohino Fika 1, 5.2.4.
Te u tokoni fēfē nai ki he paʻanga foaki ʻaukaí?
ʻE lava ke fakahoko ʻa e ngaahi foaki ʻaukaí ʻaki hano fakafonu ha laʻipepa foaki pea ʻave ia ki ha mēmipa ʻo e kau pīsopelikí. ʻI he feituʻu ʻe fakangofua ai ʻení, ʻe lava ke fakahinohinoʻi ʻe he pīsopé ʻa e kau maʻu Lakanga Taulaʻeiki Faka-ʻĒloné ke nau tānaki ʻa e ngaahi foaki ʻaukaí mei he ngaahi ʻapi nofoʻanga ʻo e kāingalotú ʻi he māhina takitaha. ʻE lava foki ke kole ki he kau maʻu Lakanga Taulaʻeiki Faka-Melekisētekí ke nau tokoni.
ʻOku ʻikai ha mahuʻinga pau ki he lahi ʻo e paʻanga ki he foaki ʻaukaí. ʻI he taimi te ke tokoni lahi ai ki he ngaahi paʻanga ko ʻení, ʻe fakatou tāpuekina fakalaumālie mo fakatuʻasino koe ʻi hoʻo loto ke tokoni ki he niʻihi kehé (vakai, Tithing and Fast Offerings [2007], 1–14).
Te u akoʻi fēfē nai ki heʻeku fānaú ʻa e ngaahi foaki ʻaukaí?
ʻI he taimi ʻoku akoʻi ai ʻa e fānaú kau ki he ngaahi foaki ʻaukaí, fakakaukau ke ako ʻa e Mātiu 25:35–40 ke fakatātaaʻi ʻa e mahuʻinga ʻo hono tokangaʻi ʻo e masivá mo e faingataʻaʻiá. Fakamatalaʻi ange ko e taimi ʻoku nau ʻave ai ʻenau ngaahi foaki ʻaukaí ki he pīsopé, ʻoku fakaʻaongaʻi ʻa e paʻanga ko iá ke tokoni ki he mahakí mo e kau mēmipa faingataʻaʻia ʻi hoʻo uōtí pe koló. Kapau ʻoku ʻosi ʻiloʻi ʻe hoʻo fānaú ʻa e ngaahi fiemaʻú, hangē ko ha mēmipa ʻoku puke pe ko ha fāmili ʻoku nau faingataʻaʻia fakaengāue, te ke lava ʻo fakaʻaongaʻi ia ko ha sīpinga ʻo e meʻa ʻe ʻalu ki ai ʻenau ngaahi foakí. Fakaafeʻi hoʻo fānaú ke nau fakakaukau ki he founga te nau lava ai ʻo tokoni ki he paʻanga ʻaukaí. Laukonga lahi ange heni.
Ngaahi Tefito Fekauʻakí
-
Ngaahi Meʻa Fakapaʻanga ʻa e Fāmilí
Ngaahi Folofolá
Ngaahi Fakamoʻoni Fakafolofolá
Ngaahi Maʻuʻanga Tokoni Ako Folofolá
-
Fakahinohino ki he Ngaahi Folofolá, “ ʻAukaí”
Ngaahi Pōpoaki mei he Kau Taki ʻo e Siasí
Ngaahi Pōpoaki Lahi Angé
Ngaahi Maʻuʻanga Tokoni Fakaakó.
Ngaahi Maʻuʻanga Tokoni Fakalūkufuá
Tokoniʻi ʻi he Founga ʻa e ʻEikí: Fakanounouʻi ʻo e Tohi Fakahinohino maʻá e Taki Ki he Uelofeá
“Ngaahi Tefitoʻi Moʻoni ʻo e Uelofeá mo e Tuʻunga Fakatakimuʻá,” Tohi Tuʻutuʻuni Fika 2, 6
Ngaahi Makasini ʻa e Siasí
Cecilie Norrung, “Ko e ʻAukai mo e Lotu maʻa ʻEmá,” Liahona ʻOkatopa 2016
“Vahehongofulú mo e Ngaahi Foakí,” Liahona Sune 2014
“Ko e fē taimi ʻoku totonu ke u kamata totongi foaki ʻaukai ai mo fai e ngaahi foaki kehé?” Liahona, Sepitema 2013
“Ko e Mālohi ʻo e Tokolahí,” Liahona Sune 2011
Karen Ashton, “Sharing Time: Tithes and Offerings,” Liahona, November 1996
Larry E. Morris, “Fast Offerings: A Place for the Second Mile,” Liahona, Sānuali 1980
Ngaahi Tohi Lēsoni Akó
Ngaahi Talanoá