Vahe 32
Ko e Siasi ‘o Sīsū Kalaisí ‘i Ketilani
(Mā‘asi—Sune 1833)
Ko e palōfita ‘o e Siasi ‘o Sīsū Kalaisí ‘a Siosefa Sāmita. Na‘e tala ange ‘e he ‘Eiki kia Siosefa ‘oku totonu ke ‘i ai ha kau tangata ke tokoni kiate ia. ‘Oku totonu ke na hoko ko hono ongo tokoní. ‘Oku totonu ke hoko ‘a Sitenei Likitoni mo Feletiliki G. Uiliāmisi ko h ono ongo tokoní. Ko Siosefa pea mo hono ongo tokoní ko e kau Palesiteni ‘Uluaki ia ‘o e Siasí.
‘Oku hoko leva ‘a e palōfita mo‘ui ‘o e ‘ahÓ ni koe taki ia ‘o e Siasí. Pea ‘oku ui ia pea mo hono ongo tokoni ko e kau Palesiteni ‘Uluakí.
Na‘e fakanofo ‘a Siosefa Sāmita mo hono ongo tokoní ‘i ha fakataha na‘e fai ‘i Ketilani, Ohaiō. Ko ha fakataha toputapu ia. Na‘e ma‘u kotoa ‘e he kakai na‘e ‘i he fakatahá ‘a e sākalamēnití.
Hili ha ngaahi uike si‘i, na‘e hanga ‘e Siosefa Sāmita ‘o fokotu‘u ‘a e fuofua siteiki ‘i he Siasí. Ko e siteikí ko e kāingalotu tokolahi ia ‘o e Siasí ‘oku nau nofo vāofi. Na‘e kau ki he ‘uluaki siteikí ‘a e Kāingalotu kotoa pē na‘e ‘i Ketilaní. ‘Oku lahi ‘aupito ‘a e ngaahi siteiki ‘i he Siasí ‘i he ‘ahÓ ni.
Na‘e pehē ‘e Sīsū ‘oku totonu ke hanga ‘e he Kāingalotu ‘o langa ke toe lahi ange ‘a e ngaahi falelotú. ‘Oku totonu ke nau langa ha temipale ‘i Ketilani. ‘Oku totonu ke nau langa ha feitu‘u ke ngāue ai ‘a e Kau Palesiteni ‘Uluakí. Na‘e toe fiema‘u foki ‘e he Siasí ha fale paaki.
Na‘e talangofua ‘a e Kāingalotu ki he ‘Eikí. Pea na‘a nau kamata ke langa ‘a e temipale ‘i Ketilaní. Ko e ngāue lahi mo mamafa ke langa ha temipale. Na‘e fiema‘u ‘e he Kāingalotu kotoa ha tokoni.
Na‘e tokolahi ‘a e kakai na‘a nau kau mai ki he Siasí. Na‘e tala ange ‘e Sīsū kia Siosefa ke ne hanga ‘o fili ke toe tokolahi ange ‘a e kau taki ki he Kāingalotu. Na‘á Ne tala ange foki ke hoko ‘a e tamai ‘a Siosefa ko e Pēteliake ia ‘o e Siasí. ‘Oku hanga ‘e he Pēteliaké ‘o foaki ‘a e ngaahi tāpuaki ma‘á e Kāingalotu. ‘Oku ne ma‘u ‘a e Puletapu Melekisēteki.
Na‘e tala ange ‘e Sīsū kia Siosefa ke fili ha kau tangata ‘e toko hongofulu-mā-ua ke nau hoko ko e kau alēlea mā ‘olunga. ‘Oku totonu ke ma‘u ‘e he kau tangata ko ‘ení ‘a e Puletapu Melekisēteki. ‘Oku nau tokoni‘i ‘a e Kāingalotu ke nau ‘ilo‘i ‘a e me‘a ko ia ‘oku totonú pea mo e me‘a ‘oku halá.