Vahe 57
Ko ha Taki Fo‘ou ki he Siasí
(Siulai — ‘Aokosi 1844)
Kuo mate ‘a e palōfita ko Siosefa Sāmitá. ‘Oku ‘ikai ke toe ‘i ai ha Palesiteni ‘o e Siasí. Na‘e ‘ikai ke ‘ilo‘i ‘e ha Kāingalotu pe ko hai hanau takí.
Ko e tokolahi ‘o e kau ‘Apósetolo na‘a nau mama‘o ‘i he‘enau ngaahi ngāue fakafaifekaú.
Na‘e hoko foki ‘a Sitenei Likitoni ko e tokoni ia ‘o Siosefa Sāmitá. Ka na‘e ‘ikai ke ne talangofua ki he ‘Eikí. He ne ‘osi hiki ia mei Nāvū.
Na‘e fanongo ‘a Sitenei Likitoni kuo mate ‘a e palōfitá. Ko ia na‘á ne foki mai ki Nāvū. He na‘e loto ia ke hoko ko e taki ‘o e Siasí.
Ne foki mai ‘a Pilikihami ‘Iongi pea mo e kau ‘Apōsetolo kehe meí he‘enau ngāue fakafaifekaú. Ko Pilikihami ‘Iongi ko e taki ‘i he kau ‘Apōsetoló. Na‘á ne pehē ‘oku totonu ke taki ‘e he kau ‘Apōsetolo ‘a e Siasí kae ‘oua leva ke fili ha Palesiteni fo‘ou.
Ko ia na‘e fai ha fakataha ‘a e kau mēmipa ‘o e Siasi. Na‘e lea ‘a Sitenei Likitoni kiate kinautolu. Na‘á ne tala ange te ne hoko koe taki ‘o e Siasí.
Na‘e hoko atu ‘o lea ‘a Pilikihami ‘longi. Na‘á ne pehē ‘oku totonu ke taki ‘e he kau ‘Apōsetolo ‘a e Siasí. Na‘e ‘iate ia ‘a e Laumālie Mā‘oni‘oní. Na‘e ongo ‘a hono le‘o ‘o hangē ko e le‘o ‘o Siosefa Sāmitá. ‘I ha ngaahi miniti si‘i, na‘e hangē tofu pē ‘a hono fōtunga ko Siosefa Sāmitá. Na‘e ‘ilo‘i ‘e he kakaí kuo fili ‘e he ‘Otuá ‘a e kau ‘Apōsetoló ke nau taki ‘a e Siasí. Na‘e ‘ita ‘a Sitenei Likitoni.Na‘e foki ia ki hono ‘apí. Na‘á ne fokotu‘u pē ‘e ia ‘a hono siasi. Na‘e ‘ikai ke toe mēmipa ia ‘i he Siasi ‘o Sīsū Kalaisi ‘o e Kau Mā‘oni‘oni ‘i he Ngaahi ‘Aho Kimui Ní.