Veita hirðisþjónustu með meiri þekkingu

Þið þurfið ekki að hafa svör við öllu, en að þekkja hann betur mun hjálpa ykkur að þjóna eins og frelsarinn þjónaði.

Ljósmynd

Jesús í musterinu sem drengur

Hluti af Kristur í musterinu, eftir Heinrich Hofmann

Jesús sýndi okkur lærdómsmynstur

Þegar frelsarinn fullorðnaðist, „óx [hann] og styrktist, [fylltist] visku, og náð Guðs var yfir honum“ (Lúkas 2:40). Hugtakið óx þýðir að vaxa smám saman, eins og tunglið verður fyllra yfir mánuðinn. Lúkas segir líka: „Jesús þroskaðist að visku og vexti og náð hjá Guði og mönnum“ (Lúkas 2:52). Jesús hlaut ekki skyndilega fyllingu þekkingar – hann hlaut hana með tímanum (sjá Kenning og sáttmálar 93:12–14).

Þegar Jesús var 12 ára gamall, fundu foreldrar hans hann í musterinu – megin tilbeiðslustað Jerúsalem. „Þar sat hann mitt á meðal lærifeðranna, og þeir hlustuðu á hann og spurðu hann spurninga“ (Þýðing Josephs Smith, Lúkas 2:46 [í Lúkas 2:46, neðanmálstilvísun c]). Þar sem lærdómur hafði verið mikilvægur þáttur í vexti hans, var hann undirbúinn þegar tækifæri gafst til að kenna þeim sem voru í musterinu. Kennsla hans þar hafði undraverð áhrif á þá og foreldra hans.

Nota þekkingu í þjónustu

Hér eru þrjár leiðir til að þróa hinn kristilega eiginleika þekkingar sem getur hjálpað okkur í hirðisþjónustu okkar:

Þegar við förum að þekkja frelsarann og lærum um eiginleika hans, munum við vita betur hvað hann myndi gera ef hann þjónaði í okkar stað.
Þegar þekking okkar og skilningur verður meiri á fagnaðarerindinu, mun heilagur andi eiga betur með að minna okkur á allt nauðsynlegt þegar við þurfum á því að halda (sjá Jóhannes 14:26). Þetta getur hjálpað okkur að skilja þarfir þeirra sem við þjónum og svara spurningum þeirra eða áhyggjumálum.
Eftir því sem við aukum hæfni okkar til að læra, verðum við betur í stakk búin til að tengjast eða þjóna öðrum. Við gætum lært meira um ákveðið efni til að tengjast vini sem hefur áhuga á því eða við gætum lært ákveðna færni sem gæti hjálpað við að uppfylla þörf.

Að afla sér þekkingar, getur hjálpað við margs konar þjónustu. Að auki: „Hvert það vitsmunastig, sem við öðlumst í þessu lífi, mun fylgja okkur í upprisunni“ (Kenning og sáttmálar 130:18).

Ljósmynd

ungur fullorðinn lærir ritningarnar

Þróun þekkingar

Hvernig getum við þróað kristilegan eiginleika þekkingar? Hér eru nokkrar hugmyndir:

Munið að meira að segja Jesús lærði smám saman með tímanum. Verið kostgæfin, en verið þolinmóð við ykkur sjálf. Þekking veitist „orð á orð ofan og setning á setning ofan“ (2. Nefí 28:30).
Lærðu að þekkja áreiðanlegar heimildir upplýsinga. (Sjá „Finding Truth in the Misinformation Age [Finna sannleikann á tíma misvísandi upplýsinga]“ í stafrænni grein í Liahona, október 2022.)
Verið forvitin. Lærið af því sem er að gerast í kringum ykkur á hverjum degi. Spyrjið spurninga. Lesið góðar bækur og verið upplýst. (Sjá Kenning og sáttmálar 88:79, 118; 90:15.)
Sækist eftir fræðslu með námi og einnig með trú (sjá Kenning og sáttmálar 88:118). Hæfni ykkar til að skilja sannleikann um hvaða efni sem er, verður meiri með því að samtvinna ykkar bestu vitsmunalegu viðleitni og ykkar bestu andlegu viðleitni. Lifið á þann hátt að þið getið notið hjálpar heilags anda.