ពាក្យចុងក្រោយ
សេចក្ដីសង្ឃឹមរបស់យើង ពន្លឺរបស់យើង កម្លាំងរបស់យើង
ដោយអែលឌើរ រ៉ូណល អេ រ៉ាសបាន
ក្នុងកូរ៉ុមនៃពួកសាវកដប់ពីរនាក់
ដកស្រង់ចេញពី ល្ងាចមួយជាមួយអ្នកមានសិទ្ធិអំណាចទូទៅ ការចាក់ផ្សាយសម្រាប់គ្រូអប់រំខាងសាសនា ដែលបានធ្វើឡើងនៅថ្ងៃទី ៨ ខែ កុម្ភៈ ឆ្នាំ ២០១៩ ។
នៅពេលខ្ញុំត្រូវបានតែងតាំងជាសាវក ប្រធាន ថូម៉ាស អេស ម៉នសុន ( ១៩២៧–២០១៨ ) ជាទីស្រឡាញ់ បានថ្លែងថា ខ្ញុំគឺជាសាក្សីពិសេសម្នាក់នៃព្រះនាមព្រះយេស៊ូវគ្រីស្ទនៅក្នុងពិភពលោកនេះទាំងមូល ។ ខ្ញុំពុំគួរធ្វេសប្រហែសចំពោះការទទួលខុសត្រូវនេះឡើយ ។ ខ្ញុំបានពិចារណាបទគម្ពីរដែលប្រាប់អំពីព្រះអម្ចាស់តាមព្រះនាម និងងាររបស់ទ្រង់ ។ អ្វីៗទាំងអស់នេះដែលខ្ញុំនឹងចែកចាយដល់បងប្អូនគឺមកពីបទគម្ពីរ ដែលរំឭកយើងអំពីក្ដីសង្ឃឹមរបស់យើងចំពោះទ្រង់ ។
ទ្រង់គឺជា ទីសង្ឃឹមនៃសាសន៍អ៊ីស្រាអែល ( យេរេមា ១៧:១៣ ) ផ្កាយព្រឹកដ៏ភ្លឺចិញ្ចែង ( វិវរណៈ ២២:១៦ ) អ្នកគង្វាលល្អ ( គោលលទ្ធិ និងសេចក្ដីសញ្ញា ៥០:៤៤ ) ព្រះដ៏ជួយគំនិត ( អេសាយ ៩:៦; នីហ្វៃទី២ ១៩:៦ ) ម្ចាស់នៃមេត្រីភាព ( អេសាយ ៩:៦; នីហ្វៃទី២ ១៩:៦) ព្រះដ៏ប្រោសឲ្យរួច ( រ៉ូម ១១:២៦ ) ពន្លឺលោកីយ៍ ( យ៉ូហាន ៨:១២ ) និង សម្តេចសង្ឃ ខាងឯសេចក្តីល្អដែលត្រូវមក ( ហេព្រើរ ៩:១១ ) ។ ទ្រង់មានឫទ្ធិនឹងសង្គ្រោះ ( អាលម៉ា ៣៤:១៨; គោលលទ្ធិ និងសេចក្ដីសញ្ញា ១៣៣:៤៧ ) និងជា អ្នកដែលមានអស់ទាំងព្រះចេស្ដា ( គោលលទ្ធិ និងសេចក្ដីសញ្ញា ៦១:១ ) ។
ឥទ្ធិពលរបស់ព្រះគ្រីស្ទគឺហ៊ុមព័ទ្ធទាំងស្រុង ។ ទ្រង់គង់នៅទីនោះ នៅពេលយើងពុះពារ និងព្យាយាមដើម្បីដើរឆ្ពោះទៅមុខ ។ ហើយបើយើងរអិលដួល « ពន្លឺរបស់ទ្រង់ដែលបំភ្លឺនៅក្នុងទីងងឹត » ( គោលលទ្ធិ និងសេចក្ដីសញ្ញា ៦:២១ ) គឺកាន់តែភ្លឺឡើង ។ ទ្រង់ស្រឡាញ់យើងទាំងនៅពេលល្អ និងពេលអាក្រក់របស់យើង ។
ការធ្វើជាសិស្សម្នាក់របស់ព្រះយេស៊ូវគ្រីស្ទ គឺពុំមែនជាការស្មានទេ ។ ផ្លូវរបស់ទ្រង់ត្រូវបានគូសយ៉ាងល្អដោយដានព្រះបាទារបស់ទ្រង់ ។ នៅពេលយើងធ្វើតាមទ្រង់ យើងកាន់តែស្រឡាញ់អ្វីដែលទ្រង់ស្រឡាញ់ ។ នៅពេលយើងរំឭកសេចក្ដីសញ្ញារបស់យើងជាមួយទ្រង់រាល់សប្ដាហ៍ ដោយការទទួលទានសាក្រាម៉ង់ដ៏បរិសុទ្ធ នោះយើងចម្រើននៅ ក្នុងការយល់ដឹងអំពីទ្រង់ ជាព្រះប្រោសលោះនៃពិភពលោក ( គោលលទ្ធិ និងសេចក្ដីសញ្ញា ៩៣:៩ ) ព្រះវិញ្ញាណនៃសេចក្ដីពិត ( គោលលទ្ធិ និងសេចក្ដីសញ្ញា ៩៣:៩ ) និងនៃពិភពលោក ( គោលលទ្ធិ និងសេចក្ដីសញ្ញា ៩៣:៨ ) ។
មិត្តជាទីស្រឡាញ់ នោះគឺជាព្រះអង្គសង្គ្រោះដែលខ្ញុំស្គាល់ ដែលខ្ញុំស្រឡាញ់ ហើយគោរពអស់ពីដួងចិត្ត ។ ចេញពីជម្រៅនៃព្រលឹងខ្ញុំ ខ្ញុំសូមថ្លែងទីបន្ទាល់អំពីទ្រង់ និងសេចក្ដីល្អ និងក្ដីមេត្តាករុណារបស់ទ្រង់ ។ ទ្រង់បានសន្យាថា « ដ្បិតអ្នកជាមិត្តរបស់យើង ហើយអ្នករាល់គ្នាមានកេរមរតកនៅជាមួយនឹងយើងដែរ » ( គោលលទ្ធិ និងសេចក្ដីសញ្ញា ៩៣:៤៥ ) ។
ព្រះយេស៊ូវគ្រីស្ទតែងតែឆ្លើយតបដល់បញ្ហា និងឧបសគ្គទាំងឡាយ ដែលជាផ្នែកនៃបទពិសោធន៍នៃជីវិតរមែងស្លាប់ ។ ពេលយល់ដឹងអំពីបេសកកម្ម និងដំណឹងល្អរបស់ទ្រង់ ក្ដីស្រឡាញ់របស់យើងចំពោះទ្រង់ ព្រមទាំងជំនឿរបស់យើង និងការពឹងផ្អែកទៅលើទ្រង់ ផ្ដល់ជាកម្លាំងដល់យើង ។