Jerbal in Karejar eo an Būreejtōn Nelson ej Wōnm̧aanļo̧k wōt

Būreejtōn im Sister Nelson rej atbakwoj ajri ro

Būreejtōn Russell M. Nelson im Elder Enrique R. Falabella jān Jiljiljounn̄oul eo kar karuwaineneik er ilo juon iien nokon ilo Lima, Peru.

Jidik iien ālkin Oktoba 2018 kweilo̧k eo eļap, Būreejtōn Russell M. Nelson eaar ilo̧k n̄an Peru, Bolivia, Paraguay, Uruguay, im Chile, ijo eaar loļo̧k mem̧bōr im mijenede ro im kōm̧m̧an iien nokon ko, ekoba nokon an jodikdik ro ilo Chile im kar pād ie 1,500 im kar kadiwōjļo̧k imejatoto n̄an aolepān laļ en. Eaar kōnono n̄an membōr ro ilo kajin Spanish, kar aje Concepción Chile Tampeļ eo, im kar kweilo̧k ippān ritōl ro an kien ijo.

Taujin kōrā ro raar uwaak ilo social media n̄an kūr eo an Būreejtōn Nelson n̄an riboot kōn en̄jake ko aer kōn emen idajon̄jon̄ ko eaar kwaļo̧k ilo kweilo̧k eo eļap ilo Oktoba 2018 eo: (1) jitlo̧k 10 raan jān social media im media ko renana, (2) riiti Bok in Mormon eo m̧okta jān jem̧ļo̧kin 2018 eo, (3) kakutkut etal n̄an tampeļ eo, im (4) Lukkuun bōk kuņaan ilo Doulul eo an Kōrā ro. “Ikōņaan kam̧m̧oolol kom̧ aolep kōn ami uwaak in kūr ko aō,” Būreejtōn Nelson eaar ba, kwaļo̧k kōjatdikdik bwe “kajjojo kūr ko raar kepaakļo̧k kom̧ n̄an Rilo̧mo̧o̧r eo.”

Būreejtōn Nelson eaar tōl ilo iien ilomej eo an lio nejin, Wendy Nelson Maxfield, eo eaar jako ālkin an juon tariņae eperan ippān kāānjōr. “Dān in kōmejaaļaļ in būrom̧ōj ko ad renaaj oktak n̄an dān in kōmejaaļaļ in kōtmene ko ilo ad bōk juon kalimjōk indeeo,” eaar ba. Eaar kōnono kōn lio nejin ilo juon kweilo̧k n̄an mem̧bōr ro ilo Chico California Stake, eo ekoba ruo iunit ko jān Paradise ijo me ekar jakoļo̧k jān kijeek. “Kwoj jeļā bwe aolep ewōr aer apan̄ ko,” eaar ba. “Eļan̄n̄e kwoj kōņaan en̄jake em̧m̧anļo̧k, kaarmejjete eok im jipan̄ bar juon.”

Ilo Arizona, USA, Būreejtōn Nelson eaar kajjitōk ippān 65,000 membōr ro raar koba ilo juon jikin ikkure “n̄an jipan̄ aiintok Israel ilo turejet ko ruo an rōn̄ōl eo.” Būreejtōn Nelson eaar barāinwōt jeje ilo ijo jikin riloļo̧k ilo Arizona Republic nuuj peba eo kōketak armej ro “n̄an reilok n̄an [Irooj] im kōm̧m̧an bwe E en pedped in mour eo am̧.” Eaar bōk kuņaan ilo juon intōrpiu kadiwōjļo̧k imejatoto ilo tipi eo an state en; ekar wōr jet an iien ioon ritōl ro an jukjukin pād eo, jikin jeļāļo̧kjeņ, im kabun̄; im kar kōm̧m̧ane juon iien kajjitōk im uwaak ippān rūm̧m̧an ded ejjeļo̧k rejetaer.

Jān ke eaar ekkapit ilo Jānwōde 14, 2018, Būreejtōn Nelson ekar loļo̧k 5 laļ ko, 16 aelōn̄ ko im territory ko, im 24 jikin kweilo̧k ko, ilo̧k jet 55,000 m̧aiļ ko (88,515 km ko).