Ekōjkan Aō Maron̄ Meļeļe?
N̄e jej ilo kijin̄en̄e, ilo bōro, ilo dim, im ilo m̧ool kappukōt n̄an ekkatak gospel eo an Jisōs Kraist im katakin doon kake, katak kein remaron̄ ukōt bōro ko.
Ro jeiū im jatū jitōn bōro, ej juon lan̄lōn̄ eļap n̄an pād ijin ippān doon bar juon alen ilo kweilo̧k in eļap n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata ium̧win tōl eo an rikanaan eo ad ejitōnbōro, Būreejtōn Russell M. Nelson. Ij kam̧ool n̄an kom̧ bwe enaaj wōr iien em̧m̧an kōn ron̄ ainikien ad Rilo̧mo̧o̧r, Jisōs Kraist, jān katak ko an ro me rej jar, al, im ekōnono ikkijien aikuj ko ad tōre in ad ilo kweilo̧k in.
Āinwōt kar an jeje ilo bok in Jerbal, Pilip rievanglis eo eaar katakin gospel eo n̄an juon eo em̧ōj bōk jān an neji eo ej bōk eddo in aolepān m̧weiuk aorōk ko n̄an lerooj in Ethiopia eo.1 Ke eaar ro̧o̧lļo̧k jān kabun̄jar ilo Jerusalem, eaar riiti bok in Aiseia. Tōl jān kar Jetōb, Pilip eaar kepaakeļo̧k im kar kajjitōk, “Kwoj ke meļeļe ta eo kwoj riiti?
“Im [eo bōk jān an neji] e ba, Ekōjkan aō maron̄, eļan̄n̄e ejjeļo̧k en ej tōl eō? …
“Innām Pilip ej walan̄i lo̧n̄iin, im jino jān jeje in, im kwaļo̧k Jisōs n̄an e.”2
Kajjitōk eo kar kajjitōk kake jān em̧m̧an in Ethiopia in ej juon kakeememej kōn kean̄ in ekwojarjar ewōr ippād aolep n̄an kappukōt ekkatak im n̄an katakin doon gospel eo an Jisōs Kraist.3 Ilo m̧ool, ilo jekjek eo an ekkatak im katakin gospel eo, jej jet iien āinwōt Riethiopia eo—jej aikuji jipan̄ eo an rūkaki etiljek im eim̧we; im jej jet iien āinwōt Pilip—jej aikuj in katakin im kōkajoorļo̧k ro jet ilo oktak eo aer.
Jibadbad eo ad ilo ad kappukōt ekkatak im n̄an katakin gospel eo an Jisōs Kraist aikuj kōļapļo̧k tōmak ilo Anij im ilo karōk in m̧ōņōņō eo An ekwojarjar im ilo Jisōs Kraist im en̄taan in pinmuur eo An im n̄an bōk oktaktok eo aitok kitien. Kain ļapļo̧k in tōmak im oktaktok in enaaj jipan̄ kōj kōm̧m̧an im kōjparok bujen ko ippān Anij, kōn menin kōkajoorļok ad ikdeelel n̄an ļoor Jisōs im kwaļo̧k juon oktak ilo jetōb em̧ool ilo kōj—ilo ro jet, ukōt kōj n̄an juon menin kōm̧anm̧an kāāl, āinwōt kar katakin jān Rijilōk Paul ilo leta eo an n̄an Rikorint ro.4 Oktak in enaaj bōktok n̄an kōj juon m̧ōņōņō eļapļo̧k, ejeraam̧m̧an, im mour ājmour im jipan̄ kōj dāpij wōt juon kōļmenļo̧kjeņ indeeo. Ejjab lukkuun men eo in ekar waļo̧k n̄an Riethiopia eo bōk jān an neje in ke ālkin an kar ekkatak kōn Rilo̧mo̧o̧r eo im kar oktaktok n̄an gospel eo An? Jeje ko Rekwojajrar rej ba bwe eaar “lan̄lōn̄ im ilo̧k ilo iaļ eo an.”5
Kien eo n̄an ekkatak im katakin gospel eo n̄an doon ejjab kāāl; eļakkar jokkuun wōt juon an āliji jān jino in bwebwenato an armej.6 Ilo juon iien ejeno̧lok, ke Moses im armej ro doon raar pād ilo jikin an Moab m̧okta jān aer deļo̧n̄eļo̧k ānen kallim̧ur, Irooj eaar im̧we e n̄an katakin armej ro doon ikkijien eddo eo aer n̄an ekkatak kien ko im bujen ko raar būki jān Irooj im n̄an katakin er n̄an ro ineer,7 elōn̄ iaer raar jab en̄jake er make kijoon Lom̧alo Ekiūlbūr ak revelesōn eo kar leļo̧k ioon Toļ Sinai.
Moses eaar katakin armej ro doon:
“O Israel, kwōn eo̧ron̄ kein ko im ekajet ko ij katakin kom̧, bwe kom̧win kōm̧m̧ani, im deļo̧n̄ļo̧k im bōk āneo Jeova, Anij an ro jim̧m̧ami ej lewōj. …
“… Kwon kwaļo̧k n̄an ro nejim̧ im n̄an ro jibwōm̧.”8
Innām Moses eaar kōjjem̧ļo̧k, ba “Im kwōn kōjparok kein ko An, ko Ej jiron̄ eok kaki rainin, bwe en em̧m̧an ippam̧, im bwe kwōn kaetokļo̧k raan ko am̧ ioon āneo Jeova am̧ Anij ej lewōj eok, n̄an indeeo.”9
Rikanaan ro an Anij raar jab m̧wijkōk ilo aer katakin bwe jej aikuj in karrūtoļo̧k baam̧le ko ad “ilo naajdik im katakin kōn Irooj”10 im “ilo meram im m̧ool.”11 Ejjab to Būreejtōn Nelson eaar ba, “Ilo tōre in kōn ajeeded in mour nana im an̄ūrlep in pija nana, ro jinen im jemen ewōr juon aer eddo ekwojarjar n̄an katakin ajri ro nejier aorōk eo an Anij [im Jisōs Kraist] ilo mour ko aer.”12
Ro jeiū im jatū, kakkōl eo an rikanaan eo ad ej kōļapļo̧k an kakeememej kōn eddo eo ad kajjojo n̄an kappukōt ekkatak gosepl eo an Jisōs Kraist im n̄an katakin baam̧le ko ad bwe ewōr juon Jemed ilo Lan̄ eo ej iakwe kōj im eo ekar ejake juon karōk in m̧ōņōņō ekwojarjar n̄an ajri ro Nejin; bwe Jisōs Kraist, Eo Nejin, ej Rilo̧mo̧o̧r eo an laļ in; im bwe lo̧mo̧o̧r ej itok jān tōmak ilo Etan.13 Mour ko ad raikuj ejaak ioon ejm̧aan in ad Ripinmuur, Jisōs Kraist, eo emaron̄ jipan̄ kōj kajjojo im āinwōt baam̧le ko n̄an bōk im̧we ko ad make ilo jetōb itulowa tata in būruwōd, jipan̄ kōj niknik n̄an jem̧ļo̧kin ilo ad tōmak.14
Komaron̄ keememej bwe rikaļoor ro ruo an Jon Ripeptaij eaar ļoor Jisōs Kraist ālkin an ron̄ an Jon kam̧ool bwe Jisōs eaar Ļaam̧ an Anij, Mejjeia eo. Em̧m̧aan rein rem̧m̧an raar bōk kūr eo an Jisōs n̄an “itok im kom̧ naaj loe”15 im pād Ippān raan eo. Raar itok n̄an jeļā bwe Jisōs eaar Mejjeia eo, Nejin Anij, im kar ļoor E ilo aolepān mour ko aer.
Ilo wāween in wōt, n̄e jej bōk kūr eo an Rilo̧mo̧o̧r eo n̄an “itok im kom̧ naaj leo,” jej aikuj in pād ilo E, wujlepļo̧k ad make ilo jeje ko rekwojarjar, lem̧ōņōņō ilo er, ekkatak katak eo An, im mour ilo wāween eo Eaar mour ie. Ilo iien eo wōt jenaaj itok n̄an jeļā E, Jisōs Kraist, im kile Ainikien, jeļā bwe ilo ad itok n̄an E im tōmak ilo E, jejjamin naaj kole ak maro.16 Jenaaj maron̄ in kile m̧ool eo ilo aolep iien, āinwōt an kar waļo̧k n̄an rikaļoor rein ruo me raar pād ippān Jisōs ilo raan eo.
Ro jeiū im jatū, men jab in ejjab waļo̧k kōn jide. Kōm̧m̧an bwe jen make m̧ōņōņō in bōk kareel ko reutiej tata an em̧m̧an ejjab juon men eļem waan; ej aikuji kūr ioon Anij im ekkatak ekōjkan bōktok gospel eo an Jisōs Kraist n̄an ioļapļap in mour ko ad. Eļan̄n̄e jej kōm̧m̧ane āindein, ij kallim̧ur bwe kareel eo an Jetōb Kwojarjar enaaj bōktok m̧ool eo n̄an bōro im ļōmņak eo ad im naaj kwaļo̧k kam̧ool kake,17 katakin aolep men ko.18
Kajjitōk eo an Riethiopia eo, “Ekōjkan aō maron̄, [meļeļe], eļan̄n̄e ejjeļo̧k en ej tōl eō?” ebarāinwōt wōr juon meļeļe ejeno̧lok ilo jekjek eo kōn eddo eo ad kajjojo n̄an likūt pedped ko an katak ko an gospel eo jaar ekkatak n̄an kōjerbale ilo mour ko ad. Ilo jekjek eo an Riethiopia eo, n̄an waanjon̄ak, eaar jerbale m̧ool eo eaar ekkatak jān Pilip. Ekar kajjitōk n̄an an kar peptaij. Eaar itok n̄an jeļā bwe Jisōs Kraist eaar Nejin Anij.19
Ro jeiū im jatū, jerbal ko ad raikuj kwaļo̧k ta eo jej ekkatak im katakin. Jej aikuj kwaļo̧k n̄an er tōmak ko ad kōn wāween eo jej mour kake. Rūkaki eo em̧m̧an tata ej juon waanjon̄ak em̧m̧an. Katakin juon men me jej m̧ool in mour kake emaron̄ kōm̧m̧ane juon oktak ilo būruwōn ro jej katakin er. Eļan̄n̄e jej ikdeelel kōn ro jej katakin, men̄e rej baam̧le ak bar jabdewōt, n̄an ko̧koņi ilo lem̧ōņōņō jeje ko rekwojarjar im katak ko an rijilōk ro im rikanaan ro an tōre in ad, rej aikuj in lo jetōb ko ad lo̧udin̄din̄ ilo er. Ejja āinwōt, eļan̄n̄e jej kōņaan bwe ren jeļā bwe Būreejtōn Russell M. Nelson ej rikanaan, rilolo, im ribōk revelesōn ilo tōre in ad, rej aikuj lo ad kajutak peid n̄an rejtake e im kile bwe jej ļoor katak ko an reim̧we. Āinwōt jabōn kennaan an juon Riamedka eo ebun̄bun̄ ba, “Jerbal ko reļaaj jān naan ko.”
Bōlen jet iaami rej pād ilo lukkuun iien in kajjitikin eok make, “Elder Soares, Ikar kōm̧m̧ane aolep men kein im kar ļoor waanjon̄ak in jim̧or āinwōt kajjojo im āinwōt juon baam̧le, bōtaab ejerata, jet iaan ro m̧ōtta ak rejitōn bōro em̧ōj aer kōttoļo̧k er make jān Irooj. Ta Iaikuj In Kōm̧m̧ane?” N̄an kom̧ ro me kiiō rej ioon en̄jake kein an būrom̧ōj, metak, im bōlen ajļo̧k, jouj im jeļā bwe er rejjab lukkuun jōbwābwe kōnke Irooj ejeļā ia eo rej pād ie im ej mije er. Keememej, er rej barāinwōt ajri ro Nejin!
Epen n̄an meļeļe aolep un ko etke jet armej rej bōk bar juon iaļ. Ijo em̧m̧an tata jemaron̄ kōm̧m̧ane ilo jekjek kein ej baj n̄an iakwe im kautiej er, jar kōn jeraam̧m̧an eo aer, im pukōt jipan̄ eo an Irooj n̄an jeļā ta eo n̄an kōm̧m̧ane im ba. M̧ool in lem̧ōņōņō ippāer ilo tōprak ko aer; erom ro m̧ōttaer im pukōt em̧m̧an eo ilo er. Jejjab aikun in n̄an jidik ebbwer jān er ak kōjparok kadkad ko ad. Jamin kowaan ak bōd ekajete er. Baj iakwe wōt er! Būrabōļ eo kōn nejin eo jerwaan ej katakin kōj bwe n̄e ajri ro rej kile jekjek eo aer, emakijkij aer ikdeelel n̄an itok n̄an m̧weo. Eļan̄n̄e ej waļo̧k ippān ro rejitōn bōro ippāmi, kobrak būruwōmi kōn tenkwadik, ettōrļo̧k n̄an er, pitōk kōnwaer, im mejān maiki er, āinwōt eo jemen nejin eo ejerwaan eaar kōm̧m̧ane.20
Āliktata, dāpij mour kōn juon mour ewōr tokjān, erom juon waanjon̄ak em̧m̧an n̄an er kōn ta jej tōmak, im epaakeļo̧k ad Rilo̧mo̧o̧r Jisōs Kraist. E ejeļā im meļeļe m̧wilaļ in būrom̧ōj ko im metak ko ad, im E enaaj kōjeraam̧m̧an kijejeto ko im ajeļo̧k eo ami n̄an ro rejitōn bōro ippāmi eļan̄n̄e ejjab ilo mour in, ilo mour eo tok juon. Keememej, ro jeiū im jatū, iien otemjej bwe kōjatdikdik eo ej juon m̧ōttan aorōk an karōk an gospel eo.
Ilo aolepān iiō lōn̄lōn̄ in jerbal ko n̄an Kabun̄ in, em̧ōj aō kar lo membōr ro retiljek me raar kijin̄en̄e kōjerbal pedped in katak kein ilo mour ko aer. Menin em̧ool kōn juon m̧am̧a eo ejjeļo̧k rejtan me inaaj kōnono kake āinwōt Mary.” Ekabūrom̧ōjmōj, Mary eaar dibuk juon jepel ekabūrom̧ōjm̧ōj. Ilo tōre eo ilo iien eo, Mary eaar kile bwe jokāālet ko raorōk tata reiookļo̧k baam̧le eo an renaaj kar ilo jetōb. Jar, ekkatak jeje ko rekwojarjar, jitlo̧k, im wōnm̧aanļo̧k wōt in etal n̄an jar im tampeļ eo renaaj ke kar aorōk n̄an e?
Mary eaar aolep iien tijjek, im ilo iien eo eaorōk tata ilo mour eo an, liin eaar jokāālet n̄an wōnm̧aanļo̧k ilo tiljek n̄an ta eo eaar kadede jeļā em̧ool. Liin eaar lo kajoor ilo “Baam̧le Eo: Juon Naan In Kean̄ N̄an Laļ in,” eo, ibwilijin elōn̄ pedped in katak ko raiboojoj, ej katakin bwe “ro jinier im jemier ewōr juōn aer eddo ekwojarjar n̄an kōkkaajririik ajri ro ilo io̧kwe im jim̧we” im n̄an katakin er n̄an iien otemjej kōjparok kein ko an Anij.21 Liin eaar wōnm̧aanļo̧k wōt in pukōt uwaak ko jān Irooj im kwaļo̧ki ippān ajri ro emen nejin ilo aolep jekjek an baam̧le. Eaar emakijkij aer ekōnono kōn gospel eo im kwaļo̧k en̄jake ko aer im naan in kam̧ool ko ippān doon.
Jekdo̧o̧n būrom̧ōj ko raar dipuki, ajri ro nejin raar ejaake juon iakwe n̄an gospel eo an Kraist im juon ikdeelel n̄an jerbal im kwaļo̧ke ippān ro jet. Jilu iaer raar jerbali mijen ko redipio ilo tiljek, im kiiō eo edik tata ej jerbal ilo South America. Leddik eo nejin erūtto tata, eo ikanooj jeļā kajjien, eo ej kiiō m̧are im kajoor ilo tōmak eo an, eaar kwaļo̧k, “Ijjan̄in kar en̄jake āinwōt m̧am̧a eaar karūttoļo̧k kōm makeļo̧k kōnke Irooj eaar iien otemjej pād ilo m̧weo im̧ōm. Ke eaar kwaļo̧k kam̧ool eo an kōn E n̄an kōm, kōm kajjojo kar jino oktakļo̧k n̄an E kōn kajjitōk ko am make. Ij kanooj kam̧m̧oolol liin eaar kōm̧m̧an bwe gospel eo en ļap meļeļe in ilo kōm.
Ro jeiū im jatū, m̧am̧a in em̧man eaar maron̄ kōm̧m̧an bwe m̧weo im̧ōn en delepān jikin ekkatak eo ilo jetōb. Ejjeļo̧k oktak jān kajjitōk eo an Riethiopia eo , Mary eaar kajjitikin e make jet alen, “Ekōjkan an ajri ro nejū maron̄ ekkatak eļan̄n̄e ejjeļo̧k en ej tōl er?”
Ro m̧ōttan jitōn bōro ilo gospel eo, ij kam̧ool n̄an kom̧ bwe n̄e jej katakin gospel eo an Jisōs Kraist ilo m̧ool, kōn kajoor, ilo dim, im m̧ool pukot n̄an ekkatak gospel eo an Jisōs Kraist im katakin bar juon kōn lukkuun jibadbad im ium̧win kareel eo an Jetōb, katak kein remaron̄ ukōt bōro ko im im̧we juon ikdeelel n̄an mour ekkar n̄an m̧ool ko an Anij.
Ij kam̧ool bwe Jisōs Kraist eo ej Rilo̧mo̧o̧r eo an laļ. Ee ej Ripinmuur eo, im E ej mour. Ijeļā E ej tōl Kabun̄ eo An kōn rikanaan ro, rilolo ro, ribōk revelesōn ro An. Ij barāinwōt kam̧oool n̄an kom̧ bwe Anij emour, bwe Ej iakwe kōj. Ej kōņaan bwe jen jepļaaktokļo̧k n̄an im̧aan Mejān—aolepād wōj. Ej ron̄jake jar ko ad. Ij kwaļo̧k aō naan in kam̧ool kōn m̧ool kein ilo āt kwojarjar eo etan Jisōs Kraist, amen.