Ruwalitōk Tampeļ Ko Rekāāl, Jerbal in Kōkāāl ko Raorōk kar Kōjjeļļā kaki
Tampeļ ko ilo tōre eo an bainieer, ekoba Salt Lake Tampeļ, enaaj bar kōkāāle, im koba in ruwalitōk tampeļ ko rekāāl naaj kalūki.
Būreejtōn Russell M. Nelson eaar kōjjem̧ļo̧k kweilo̧k eo eļap an Eprōl 2019 kōn kean̄ kōn ruwalitōk tampeļ ko rekāāl im jerbal in kōkāāl eo an tampeļ ko emān jān tōre eo an bainieer, ekoba elōn̄ļo̧k tipdik in meļeļe ko kōn jerbal in kōkāāl eo an Salt Lake Tampeļ.
Tampeļ ko rekāāl naaj kalōki ilo Pago Pago, American Samoa; Okinawa City, Okinawa; Neiafu, Tonga; Tooele Valley, Utah; Moses Lake, Washington; San Pedro Sula, Honduras; Anfofagasta, Chile; im Budapest, Hungary.
Karōk ko kōn juon jerbal in kōkāāl eļap an Salt Lake Tampeļ eo enaaj koba kōkāāl eo an Tampeļ Square eo im eon̄ļo̧k eo an plaza eo iturin Church Office Building eo ilo Salt Lake City, Utah, USA. Tampeļ ko ilo St. George, Manti, im Logan, Utah, USA, naaj bar kōkāāli ejjab to ilju im jekļaj. “Jerbal in enaaj aikuj an kajjojo tampeļ kilōk ium̧win juon tōre,” Būreejtōn Nelson eaar ba. “Ro uwaan Kabun̄ in maron̄ wōnm̧aanļo̧k im lan̄lōn̄ ilo kabun̄jar ilo tampeļ im jerbal ko ilo tampeļ ko repaake e. N̄e kajjojo būroojāāk ej dedeļo̧k, kajjojo tampeļ renaaj aji.”
Jān ke eaar erom Būreejtōn an Kabun̄ in ilo Jānwōde 2018 eo, Būreejtōn Nelson eaar kōjjeļļā kōn 27 tampeļ ko rekāāl. Jān kweilo̧k eo eļap ilo Oktoba 2018 eo, tampeļ ko kar aji ilo Rome, Italy; Barranquilla, Colombia; im Concepción, Chile.