Uwaak ko n̄an Jar
Eo Jemed ejeļā kōn kōj, ejeļā aikuj ko ad, im enaaj jipan̄ kōj ilo weppān.
Katak eo eaorōk im ekaenōm̧m̧an an gospel eo an Jisōs Kraist ej bwe iakwe eo an Jemedwōj Ilan̄ eweppān n̄an ajri ro Nejin. Kōnke kōn iakwe eo eweppān, Ej kōjeraam̧m̧an kōj ejjab ekkar wōt n̄an ikdeelel ko ad im aikuj ko ak barāinwōt ekkar n̄an māletlet eo An indeeo. Āinwōt eļam waan kar kwaļo̧k jān rikanaan Nipai, “Ijeļā bwe [Anij] ej iakwe aolep ro neji.”1
Juon m̧ōttan an iakwe eo eweppān ej an Jemedwōj Ilan̄ bōk kūņaan ilo m̧ōttan ko an mour ko ad, jekdo̧o̧n n̄e jemaron̄ jab jeļā kake ak meļeļe kake. Jej pukōt tōk ekwojarjar eo an Jemed im jipan̄ eo kōn jar em̧ool, epen. N̄e jej kautiej bujen ko ad im kajjion̄ in eromļo̧k āinwōt ad Rilo̧mo̧o̧r, jej maron̄ bōk jiōbtok eo ejjab bōjrak2 an tōl eo ekwojarjar kōn kareel im im̧weo eo an Jetōb Kwojarjar.
Jeje ko Rekwojarjar rej katakin kōj, “Bwe Jememwōj e jeļā men ko kom̧ij aikuj m̧okta jān ami kajjitōk ippān,”3 im E “ejeļā aolep men otemjeļo̧k, bwe aolep men otemjeļo̧k rej pād kiiō im̧aan [Meja].”4
Rikanaan Mormon ej juon waanjon̄ak kōn menin. Eaar jab mour n̄an lo tōprak ko an jerbal eo an. Jekdo̧o̧n eaar meļeļe bwe Irooj eaar kanooj kōjparok an tōlļo̧ke. Ke eaar en̄jake im̧we n̄an kadedeļo̧k pileij ko reddik an Nipai kōn ļo̧o̧k eo an, Mormon eaar je: “Im ij kōm̧m̧an men in kōn juon un emālōtlōt; bwe āindein e ej unoojdikdik n̄an eō, ekkar n̄an jerbal ko an Jetōb in Irooj eo ej ilo n̄a. Im kiiō, ij jab jeļā men otemjej; a Irooj ejeļā men otemjej ko rej itok; kōn menin, e ej jerbal ilo n̄a n̄an kōm̧m̧an ekkar n̄an ankilaan.”5 Men̄e Mormon eaar jab jeļā kōn jako eo an 116 peij ko ilo iien ko rej itok, Irooj eaar im kar kōpooj juon wāween n̄an anjo̧ ioon kabbōjrak jab in m̧oktļo̧k jān an waļo̧k.
Eo Jemed ejeļā kōn kōj, ejeļā aikuj ko ad, im enaaj jipan̄ kōj ilo weppān. Jet iien jipan̄ jab in ej letok ilo lukkuun iien eo ak n̄e jaab ālkin wōt ad kajjitōk kōn jipan̄ eo ekwojarjar. Jet iien ikdeelel ko ad rem̧ool tata im ļap tokjāer rejjab uwaak ilo wāween eo jej kōjatdikdik ie, bōtaab jej lo bwe Anij ewōr an kōjeraam̧man ko reļļapļo̧k rej kōttar kōj. Im jet iien ikdeelel ko ad rejim̧we rejjab letok n̄an kōj ilo mour in. Inaaj kwaļo̧k, jilu bwebwenato ko roktak, me rej waanjon̄ak in wāween ko Jemed ilo Lan̄ emaron̄ uwaaki kajjitōk ko ad rem̧ool tata n̄an E.
Ļaddik eo nejim edik tata kar kūre n̄an jerbal āinwōt juon mijenede ilo France Paris Mijen. Ilo kōppopo n̄an jerbal, kōm kar etal ippān n̄an wia jedo̧jij ko, kopa ko, tae ko, im jito̧kin ko ekkā kōņaki, im juon kopā aitok im mijel. Ejerata, kopā aitok im mijel eo eaar kōņaan ilo iien eo eaar ejjeļo̧k jaij eo ekar kōņaan ilo m̧ōn wia eo ilo iien eo. Mekarta, rilale m̧ōn wia eo eaar kwaļo̧k bwe enaaj kar wōr kopā eo jet wiik ko im naaj bōkļo̧k n̄an jikin kaminene eo an mijenede ilo Provo m̧okta jān an ļaddik eo nejim em̧m̧akūt n̄an France. Kōm kar kōļļā wōņāān kopā eo im kar jab bar ļōmņak kake.
Ļaddik eo nejim eaar deļo̧n̄e jikin kaminene eo an mijenede ilo Juun, im kopā aitok im mijel eo kar bōkļo̧k jejjo raan ko m̧okta jān kar iien eo kar karōk bwe en em̧m̧akūt ilo O̧kwōj eo. Eaar jab kajjion̄ jon̄e kopā eo bōtaab eaar ekairir in āte ilo nien nuknuk eo an ippān nuknuk ko an im m̧weiuk ko jet.
Ke iien m̧ōļo eaar epaaktok ilo Paris, ijo ļaddik eo nejim eaar jerbal ie, eaar jejetok n̄an kōm bwe eaar kwaļo̧ktok kopā aitok im mijel eo im kajjion̄ kōņake bōtaab kar lo bwe eaar kanooj in dik. Kōn menin kōm kar aikuj in kadeļo̧n̄ eļapļo̧k jāān ilo akkaun in bāān̄ eo an bwe en maron̄ wiaiki bar juon kopā ilo Paris, eo ekar. Kōn jet ienapta, iaar jeje n̄an e im jiron̄ e n̄an ajeļo̧k kopā eo m̧okta, kōnke eban maron̄ kōjerbale.
Tokālik kōm kar bōk email in jān e: “Elukkuun, lukkuun in m̧ōļo̧ ije. … Kōto eo āinwōt ej debļo̧ke kōm, men̄e kopā kāāl eo aō em̧m̧an im ebwe an eddo. … Iaar leļo̧k kopā eo aō em̧or n̄an [bar juon mijenede ilo abatmen eo am] eo eaar ba bwe ekar jar kōn juon wāween n̄an bōk juon kopā em̧m̧anļo̧k. E ej juon rioktak in jet iiō ko im jinen wōt … im mijenede eo eaar peptiaji rej ro wōt rej jipan̄ e ilo mijen eo an im kōn menin kopā eo eaar juon uwaak n̄an jar eo, kōn menin iaar kanooj en̄jake m̧ōņōņō kake.”6
Jemedwōj Ilan̄ eaar jeļā bwe mijenede in eo eaar jerbal ilo France jet 6,200 m̧aiļ ko (10,000 km) ettoļo̧k jān m̧weo im̧ōn, enaaj lukkuun aikuji juon kopā aitok im mijel kāāl n̄an iien m̧ōļo eo m̧ōļo ilo Paris bōtaab bwe mijenede in enaaj kar ejjeļo̧k wāween an wiaik juon. Jemedwōj Ilan̄ eaar barāinwōt jeļā bwe ļaddik eo nejim enaaj kar bōk jān m̧ōn wia nuknuk eo ilo Provo, Utah, juon kopā aitok im mijel me enaaj kar kanooj in dik. Eaar jeļā bwe mijenede rein ruo renaaj kar jerbal ippān doon ilo Paris im bwe kopā eo enaaj kar uwaak eo n̄an jar eo ettā im m̧ool an juon mijenede eo me eaar wōr juon an aikuj ilo iien eo em̧ōkaj tata.
Rilo̧mo̧o̧r eo eaar katakin:
“Re jab wia ruo bao sparro kōn juon penni ke? im juon iaer e jāmin wōtlo̧k ioon bwidej im Jeemami ej jab lale.
“A em̧ōj bwini kooļan bōrami otemjeļo̧k.
“Innām kom̧win jab mijak, eļap ami aorōk jān elōn̄ sparro.”7
Ilo jekjek ko jet, n̄e ikdeelel ko ad raorōk rejjab litok ilo wāween eo jaar kōjatdikdik kake, ilo m̧ool emaron̄ n̄an jeraam̧m̧an eo ad āliktata. N̄an waanjon̄ak, Josep ļeo nejin Jekab kar ebanbane im dike jān ļōm̧aro jein n̄an jon̄an eo me raar ļōmņak in m̧an Josep. Ijello̧kin, raar wia kake e āinwōt juon rikōm̧akoko n̄an Egypt.8 Eļan̄n̄e ekar wōr juon armej eo emaron̄ in kar en̄jake bwe jar ko an raar jab uwaak ilo wāween eo eaar kōjatdikdik kake, enaaj kar Josep. Ilo m̧ool, alikkar in jerarta eo an eaar bōktok kōjeraam̧m̧an ko reļļap n̄an e im lo̧mo̧o̧ren baam̧le eo an jān kole. Tok ālik, ālkin an kar erom juon ritōl eo kar lōke ilo Egypt, kōn tōmak eļap im māletlet eaar ba n̄an ļōm̧aro jein:
“Innām kiiō kom̧win jab būrom̧ōj, im jab āliklik, kōn ami kar wiakake eō n̄an ijin: bwe Anij ear jilkintok eō im̧aami bwe in kōjparok mour.
“Bwe iiō kein ruo ear n̄ūta ānin, im m̧ōttan ļalem iiō, im ilo er enaaj ejjeļo̧k jeor ak m̧adm̧ōd.
“Im Anij ear jilkintok eō im̧aami bwe in kōjparok ineōmi i laļ, im bwe in lo̧mo̧o̧remi kōn lo̧mo̧o̧r eļap.
“Innām kiiō e ja kom̧eo kom̧ ar jilkintok eō, a Anij.”9
Ke ekar pād ilo kaļōj, ļaddik eo erūtto tata nejim kar kōjerbale ilo juon part-time jerbal an rijikuuuļ kōņaan me emaron̄ kar tōlļo̧k n̄an juon jerbal em̧m̧an, aitok kitien ālkin an kadiwōjļo̧k. Eaar buuļ jerbal ilo jerbal an rijikuuļ eo an ium̧win emen iiō ko, eaar lukkuun in jetjet n̄an e, im kar kanooj lōke jān rijerbal ro m̧ōttan im jubōrbaijōr ro. Ilo jem̧ļo̧k in iiō in senior eo an, enan̄in āinwōt eļan̄n̄e kar karōke jān lan̄, (ilo jekjek eo n̄an wāween an ļaddik eo nejim ļōmņak), jerbal eo aitok kitien kar peļļo̧k, im eaar e eo im̧aan tata n̄an bōke, kōn aolep kōkaļļe im kōtmene me, ilo m̧ool, enaaj kar bōk jerbal eo.
Ekwe, ekar jab bōk jerbal eo. Ejjeļo̧k iaam emaron̄ kar meļeļe. Eaar em̧m̧an an kōppopo, ekar em̧m̧an an kar intōrpiu, eaar e eo ejetjet tata, im eaar jar kōn eļap kōjatdikdik im kōtmene! Eaar ļo̧kjen an im ebbwer, im aolepān jekjek eo eaar kōm̧m̧an bwe kōmin kūriji bōram. Etke Anij eaar kōjojoļāār e ilo kōņaan eo an ejim̧we?
Eaar jab m̧ae jet iiō ko tok ālik me uwaak eo eaar kanooj alikkar. N̄e eaar bōk jerbal eo mej ļo̧kanļo̧k ālkin an kadiwōjļo̧k, enaaj kar likjab jān iien eo em̧m̧an eaorōk, naaj kar ukōt an mour me ej kiiō kwaļo̧k bwe ej n̄an jeraam̧m̧an indeeo eo an im kōjeraam̧m̧an. Anij eaar jeļā jem̧ļo̧k eo jān jinoin (āinwōt An iien otemjej kar jeļā), im ilo jekjek in uwaak eo n̄an elōn̄ jar ko rejim̧we eaar jaab, bwe ta enaaj kar waļo̧k eļap tata enaaj kar waļo̧k.
Im jet iien, uwaak ko n̄an jar eo me jej lukkuun kappukōte ilo jim̧we, lukkuun in, im m̧ool in ejjab letok ilo mour in.
Sister Patricia Parkinson eaar ļotaktok kōn an em̧man an erre, bōtaab ke eaar jijlimjuon iiō dettan eaar jino pilo. Ke kar ratimjuon iiō dettan, Pat eaar etal n̄an Utah Schools n̄an Deaf and Blind ilo Ogden, Utah, jet 90 m̧aiļ ko (145 km) jān m̧weo im̧ōn, eo ekar kōm̧m̧an bwe en aikuj jokwe ilo jikuuļ eo—eo eaar koba aolep on̄ otemjeļo̧k ko me juon ratimjuon iiō emaron̄ naaj kar iooni.
Ke eaar 11 iiō dettan, liin eaar lukkuun in jako an loļo̧kjeņ. Pat eaar lukkuun ro̧o̧lļo̧k n̄an m̧weo im̧ōn ke eaar 15 iiō dettan n̄an etal n̄an high school eo ijo jokwe ie. Liin eaar etal wōt kaļōj im kadiwōjļo̧k kōn juon undergraduate degree ilo communication disorders im psychology, im ālkin an kakkōt ilo peran ņae pere an rijerbal ro rej kaddeļo̧n̄ rijikuuļ n̄an univeristy, liin eaar deļo̧n̄e juon graduate university im kadedeļo̧k juon an master degree ilo speech language pathology. Pat kiiō ej jerbal ippān 53 rijikuuļ in elementry school ro im ej eddo in emen speech-lanugage technician ro ilo school district eo an. Liin ewōr make m̧ōn em̧ im waan make wa, eo ro m̧ōttan im ro uwaan baam̧le eo an rej ettōr kake n̄e Pat ej aikuj iaļ.
Ke eaar 10 iiō dettan, Pat ekar jikejuuļ n̄an bar kōm̧m̧ane juon medical procedure n̄an ņa mejļan an dikļo̧k an loļo̧kjeņ. Ro jinen im jemen kar iien otemjej jiron̄ e lukkuun ta eo eaar tōn waļo̧k ikkijen an taktō, bōtaab kōn jet un ko raar jab jiron̄ e kōn jekjek jab in eļap tata. Ke ro jinen im jemen raar jiron̄ e bwe jekjek eo em̧ōj kar jikejuuļi, Pat, ilo naan ko an jinen, “ekar juon inepata.” Pat eaar ettōrļo̧k n̄an ruum̧ eo juon bōtaab tok ālik bar jepļaakļo̧k im ba n̄an ro jinen im jemen kōn jet illu, “In jiron̄ kom̧ro ta. Ijeļā, Anij ejeļā, im kom̧ro maron̄ jeļā barāinwōt. Inaaj pilo ilo aolepān mour e aō!”
Jet iiō ko remootļo̧k, Pat ekar ilo̧k n̄an California n̄an loļo̧k ro uwaan baam̧le eo me raar jokwe ijōņ. Ke liin eaar pād inam̧ōj ippān ļaddik eo man̄den jilu iiō dettan , eaar jiron̄ e, “Anti Pat, etke kwojjab baj kajjitōk ippān Jemed Ilan̄ n̄an lewaj n̄an eok māj ko rekāāl? Kōnke eļan̄n̄e kwoj kajjitōk ippān Jemed Ilan̄, Enaaj lewaj n̄an eok jabdewōt kwoj kōņaan. Kwoj aikuj in baj kajjitōk Ippān.”
Pat eaar ba eaar bwilōn̄ kōn kajjitōk eo bōtaab kar uwaak, “Ekwe, jet iien Jemedwōj Ilan̄ ejjab jerbal āinwōt in. Jet iien Ej aikuji eok n̄an katak juon men, im kōn menin E ejjab lewaj n̄an eok aolep men kwoj aikuj. Jet iien kwoj aikuj kōttar. Jemedwōj Ilan̄ im Rilo̧mo̧o̧r eo rejeļā ta eo em̧m̧an tata n̄an kōj im ta eo jej aikuji. Kōn menin Rejjamin naaj lewaj n̄an kwe aolep men ko kwoj kōņaan ilo iien eo kwoj kōņaan.
Ikar jeļā kajjien Pat ium̧win elōn̄ iiō ko im ejjab to eaar jiron̄ e bwe iaar nōbar jekjek eo me liin ej iien otemjej em̧m̧an im m̧ōņōņō. Liin eaar uwaak, “Ekwe, kwojjan̄in pād ippa ilo m̧weo, kwonan̄in ke? Ewōr aō iien ko. Ekar bwe an wōr aō apan̄ ko kōn būrom̧ōj, im eaar ļap aō jan̄.” Mekarta, liin eaar kakobaba, “Jān iien n̄an iien iaar jino aō jab loļo̧kjeņ, eaar juon apan̄, bōtaa iaar jeļā bwe Jemed Ilan̄ im Rilo̧mo̧o̧r eo raar pād ippān baam̧le eo aō im n̄a. Kōm kar kōm̧m̧ane ilo wāween eo em̧m̧an tata kōm kar maron̄e, im ilo tōmak eo aō, kōm kar kōm̧m̧ane ilo wāween eo ejim̧we. Iaar erom juon armej eo ebwe an jeraam̧m̧an, im eļap tata iaar juon armej eo em̧ōņōņō. Ij keememej Pein ilo an pād ilo aolep men. N̄an ro me rej kajjitōk ippa eļan̄n̄e ij illu kōnke ipilo, ij uwaak, ‘Wōn eo inaaj illu ippān? Jemed Ilan̄ ej pād ippa ilo menin; ijjab make iaaō. E ej pād ippa aolep iien.’”
Ilo jekjek in, ikdeelel eo an Pat n̄an bar bōk loļo̧kjeņ eo an jamin naaj leļo̧k ilo mour in. Bōtaab m̧ato eo an, kar ekkatak jān jemen, ej “Menin barāinwōt enaaj jako.”10
Būreejtōn Henry B. Eyring eaar ba, “Jemed ej ilo iien in kile eok, enjake ko am̧, im aikuj ko ilo jetōb im kanniōk an aolep ro ipeļakūm̧.”11 M̧ool in eļap im ekaenōm̧m̧an maron̄ loe ilo en̄jake ko jilu iaar kwaļo̧ki.
Ro jeiū im jatū, jet iien jar ko ad em̧ōkaj aer uwaak kōn tōprak eo jej kōjatdikdik kake. Jet iien jar ko ad rejjab uwaak ilo wāween eo jej kōjatdikdik kake, aaet kōn iien eo jej ekkatak bwe Anij ewōr an kōjeraam̧m̧an ko reļļapļo̧k kar kōpooji n̄an kōj m̧okta jān ad kōtmene. Im jet iien kajjitōk ko ad rejim̧we n̄an Anij rejjamin naaj letok ilo mour in.12 Āinwōt an Elder Neal A. Maxwell kar ba, “Tōmak ej barāinwōt koba lōke ilo iien eo an Anij.”13
Ewōr ippād kallim̧ur eo bwe ilo wāween eo An make im ilo iien eo An make, Jemed Ilan̄ enaaj kōjeraam̧m̧an kōj im ņa mejļan aolep ipepata ko ad, kalijōkļo̧k ko, im inepata ko.
N̄an kouti Kiin̄ Benjamin: “Im eļapļo̧k, ikōņaan bwe kom̧in ļōmņak kōn jekjek eo ejeraam̧m̧an im ekōm̧ōņōņō an ro raar kōjparok kien ko an Anij. Bwe lo, rej jeraam̧m̧an ilo aolep men ko otemjeļo̧k, jim̧or ilo kanniōk im jetōb; im eļan̄n̄e renaaj dāpdep wōt ilo niknik n̄an jem̧ļo̧kin naaj bōk er ilo lan̄, bwe ren maron̄ jokwe ippān Anij ilo wāween m̧ōņōņō eo ejjeļo̧k jem̧ļo̧kin. O keememej, keememej bwe men kein rem̧ool; bwe Irooj Anij eaar kōnono e.”14
Ijeļā bwe Anij ej ron̄jake jar ko ad.15 Ijeļā bwe āinwōt juon eo jeļā kajjien, Jemed eo ej iakwe, Ej uwaake jar ko ad ilo weppān, ekkar n̄an māletlet eo An ejjeļo̧k jem̧ļo̧kin, im ilo wāween ko me renaaj n̄an jeraam̧m̧an im kōjeraam̧m̧an eo ad aorōk tata. Ij lukkuun in kam̧ool ilo etan Jisōs Kraist, amen.