2019
Pinmuur eo an Jisōs Kraist
Māe 2019


Pinmuur eo an Jisōs Kraist

Pinmuur eo an Jisōs Kraist ejjab ejjeļo̧k jem̧ļo̧kin wōt ilo maron̄ ak ej barāinwōt n̄an kajjojo armej.

Ilo jijen in ijtō ilo iiō in jej lukkuun m̧ōņōņō im kejōkļo̧kjeņ kōn Pinmuur eo an Rilo̧mo̧o̧r. Ilo m̧ool elukkuun ekwojarjar, ej kōļapļo̧k kōļmenļo̧kjeņ, ej katak eo ekaitoktoklimo me laļ in ak aolep laļ ejeļā kake. Ej letok kōjatdikdik im un n̄an mour ko ad.

Innem ta in Pinmuur eo an Jisōs Kraist? Ilo juon meļeļe ealikkar, ej juon tōprak in elōn̄ m̧akūtkūt ko rekwojarjar me rekar bōk jikier ilo Jikin Kallip Getsemane, wōnm̧aanļo̧k wōt ilo debwāāl eo, im āliktata kōn Jerkakbeje eo an Rilo̧mo̧o̧r jān lōb. Kar kōm̧m̧ane menin kōn iakwe in jeban kōmeļeļeiki n̄an kōj kajjojo. Emenin aikuj bwe juon armej eo ekar ejjeļo̧k an jerawiwi; eo ewōr an kajoor ejjeļo̧k jem̧ļo̧kin ioon men otemjej an laļ—em̧ool mej; eaar wōr an maron̄ n̄an en̄taan kōn oktan jerawiwi ko ad im nan̄inmej ko; im eo ilo m̧ool, ekar wanlaļtak ium̧in aolep men otemjeļo̧k.1 En̄in kar mijen eo an Jisōs Kraist—en̄in kar Pinmuur eo An.

Innem kar ta kōttōbar eo an? Ekar kōm̧m̧an bwe aolep men ren bōk jikin n̄an kōj bwe jen jepļaak n̄an im̧aan mejān Anij, erom̧ āinwōt E, im bōk juon dipio in lan̄lōn̄. Menin ekar dedeļo̧k ilo an kar eļļā ioon emān apan̄ ko:

  1. Mej ilo kanniōk

  2. Mej ilo jetōb kar waļo̧k kōn Adam im jān jerawiwi ko ad

  3. Kaen̄tanaan im m̧ōjno̧ ko ad

  4. M̧ōjno̧ im jab wānōk ko ad

Ak ewi wāween an Rilo̧mo̧o̧r kadedeikļo̧k menin ilo an kar jab kakkure kien ko an jim̧we?

Pija
Kelo̧k ilo ejjeļo̧k uwōta jān baluun

Ļōmņak kōn juon iien juon em̧m̧aan ej ļōmņake limoin skydiving im ej kōm̧m̧an juon kālōt enana im iien eo wōt ekajju kelo̧k jān baļuun jidikdik eo. Ālkin an kōm̧m̧ane menin, ekar kajju kile ke kōm̧m̧an ko an rejakapeel. Ekōņaan bwe en jo̧k ilo ejjeļo̧k uwōta, ak ekar wōr juon apan̄—law of gravity. Ej kam̧akūtkūt pein ilo an lukkuun ium̧, kōjatdikdik n̄an kelak, ak ekar jab em̧m̧an. Ej kakonkone make n̄an epeepe ak jikeet bwe en karumūj an walaļļo̧k, ak law of gravity ejjab bōjrak im ejjeļo̧k an tūriam̧o. Ej kajjieon̄ in jum̧ae law of nature: “Ekar juon men ebōd. Ijamin bar kōm̧m̧ane.” Ak ejjeļo̧k ej ron̄jake. Law of gravity ejjab jeļā kōn tūriam̧o; ejjab oktak. Jeram̧m̧an, aaet, em̧m̧aan eo ekar kajju en̄jake juon men ilo likin. Eo m̧ōttan ilo baļuun eo, ekar en̄jake iien jakapeel in, im ekar likūt juon rakka likin m̧okta jān an kar kelo̧k. Ekar loe to in rakka eo im kaņōke. Ekar pelļo̧k ubōn, ej jo̧k laļ ilo ejjeļo̧k uwōta. Jemaron̄ kajjitōk, “Ekar ke anjo̧ ioon Law of gravity, ak rakka eo ekar ke jerbal ekkar n̄an law eo me kar letok bwe en jo̧k laļ ilo ejjeļo̧k uwōta?”

Pija
Rakka n̄an jo̧k laļ ilo ejjeļo̧k uwōta

N̄e jej jerawiwi, jej āinwōt em̧m̧aan eo ejakapeel eo ekar kelo̧k jān baluun eo. Jekdo̧o̧n ta eo jej kōm̧m̧ane ippād make, jenaaj en̄jake oktak in jerawiwi ko ad. Jej aikuj ļoor kien jim̧we, eo me, ej āinwōt law of gravity, emenin aikuj, im epen. Jemaron̄ bōk lo̧mo̧o̧r kōn Rilo̧mo̧o̧r wōt, kōn Pinmuur eo An, ilo an tūriam̧o ej letok n̄an kōj juon men eo me epaakeļo̧k rakka ilo jetōb. Eļan̄n̄e ewōr ad tōmak ilo Jisōs Kraist im ukweļo̧k (meļeļein jej kōm̧m̧ane ijo koņaad im kaņōk to in rakka eo), innem kajoor in kōjparok eo an Rilo̧mo̧o̧r ej erakrak n̄an kōj, im jemaron̄ jo̧k ilo an ejjeļo̧k jorreen ilo mour in jetōb.

Menin emaron̄ bōk jikin, ijoke, kōnke Rilo̧mo̧o̧r wōt ekar aņjo̧ ioon apan̄ kein emān me remaron̄ bōbrae ad eddōkļo̧k ilo mour in jetōb.

1. Mej. Ej aņjo̧ ioon mej kōn Jerkakpeje eo An eaibojooj. Rijilōk Paul ekar katakin, “Bwe āinwōt ilo Adam ro otemjej rej mej, āindein barāinwōt ilo Kraist ro otemjej re naaj mour.”2

2. Jerawiwi. Rilo̧mo̧o̧r eo ekar eļļā ioon jerawiwi im būromōj kōn aolep ro me rej ukweļo̧k. Eļap an kajoor im depakpak kajoor in karreo eo An me Aisea ekar kallim̧ur kake, “Men̄e bōd ko ami rej āinwōt būrōrō, renaaj mouj āinwōt sno.”3

Jet iien, ikar ioon jet Armej ro Rekwojarjar rem̧m̧an ro me epen aer jeorlo̧k aer bōd, ro me ejjeļo̧k aer jeļā ak rebōd ilo aer ļōmņake bwe kajoor in lo̧mo̧o̧r an Rilo̧mo̧o̧r ejabwe n̄an lo̧mo̧o̧ren er. Ilo jab jeļā kake, em̧ōj aer ukōt ilo kōļmenļo̧kjeņ ko aer kōn juon Pinmuur eo ejjeļo̧k jem̧ļo̧kin n̄an juon men eo ewōr jem̧ļo̧kin me reban maron̄ aņjo̧ ioon jerawiwi ak m̧ōjņo ko aer. Ak ej juon Pinmuur eo ejjeļo̧k jem̧ļo̧kin kōnke ej kobaik im epād ie aolep jerawiwi im m̧ōjņo, barāinwōt aolep kakkure im metak ko rej waļo̧k jān ro jet.

Truman Madsen ekar kōm̧m̧ane etale in kaenōm̧m̧an in:

“Eļan̄n̄e jejjo iaami em̧ōj m̧oņe n̄an tōmak bwe em̧ōj am̧ kōm̧m̧ane eļap ijo koņaam, … bwe em̧ōj am̧ kar en̄jake jidik jerawiwi eo me ej kōm̧m̧an bwe en pen am̧ bar kōm̧m̧ane ta eo kokar maron̄ kōm̧m̧ane—innem ron̄jake n̄a.

“Ij kwaļo̧k aō kam̧ool bwe kojjab maron̄ wōtļo̧k ettoļo̧k jān meram eo im pen am̧ tōpar mālōtlōt an Jisōs Kraist. Ij kwaļo̧k aō kam̧ool bwe toon wōt an wōr jidikin ikdelel n̄an ukweļo̧k im n̄an tōpar, e ej pād ijeņ. Ekar jab wanlaļtak n̄an jekjek eo kopād ie; ekar wanlaļtak iumin aolep men ko otemjeļo̧k, ‘bwe En maron̄ pād ilo aolep im kōn aolep men, ej meram in m̧ool eo.’ [Katak im Bujen ko 88:6.]”4

Juon un elukkun aorōk n̄an meļeļe Pinmuur eo an Rilo̧mo̧o̧r im kajoor in ejjeļo̧k jem̧ļo̧kin ej bwe kōn jeļāļo̧kjeņ in eļap ej itok juon ikdelel eļap n̄an jeorļo̧k ad make bōd im ro jet.

Men̄e jemaron̄ tōmak ilo kajoor in karreo eo an Kraist, kajjitōk in ekkā an waļo̧k: “Ewi wāween aō jeļā eļan̄n̄e em̧ōj jeorlo̧k jerawiwi ko aō?” Eļan̄n̄e jej en̄jake Jetōb, innem ej ad kam̧ool bwe em̧ōj jeorlo̧k ad bōd, ak bwe jerbal in karreo eo ej bōk jikin. Būreejtōn Henry B. Eyring eaar katakin, “Eļan̄n̄e kwaar en̄jake im̧we eo an Jetōb Kwojarjar … , komaron̄ bōke āinwōt juon kein kam̧ool bwe Pinmuur eo ej jerbal ilo mour eo am̧.”5

Pija
Iaļ eo ewor jemlokin

Jet rekar kajjitōk, “Ak eļan̄n̄e em̧ōj jeorļo̧k aō bōd, etke ij būromōj wōt?” Bōlen ilo tūriam̧o̧ an Anij, ememļo̧kjeņ eo kōn būromōj ej juon kakkōl, im juon kōkaļļe n̄an bōjrak im ļōmņak kōn ta ko jej kōm̧m̧ani, me jon̄an ej kakeememej n̄e elōn̄ļo̧k kapo ko jej jelm̧aeiki: “Jab kōm̧m̧an men ko me renaaj tōlļo̧k eok n̄an kōm̧m̧ani men ko jet renana. Kwojeļā kōn metak eo me komaron̄ en̄jake.” Ilo wāween in, ej jerbal āinwōt juon kein kōjparok, ejjab juon kaje.

Jemaron̄ ke, innām, kiiō keememej jerawiwi ko ad im jab en̄jake būromōj?

Alma ekar keememej jerawiwi ko an, jekdoon iiō ko ālkin an kar ukweļo̧k. Ak ke ej ļamōj n̄an Jisōs kōn tūriam̧o, ekar ba, “Iaar jab bar keememejļo̧k metak ko aō; aaet, iaar jab bar ikimmaļ kōn ememļo̧kjeņ kōn jero̧wiwi ko aō.”6

Ewi wāween an keememeje jerawiwi ko an ak ejjab metak ak būromōj? Kōnke n̄e jej ukweļo̧k, jej bar “ļotak ilo Anij.”7 Jej erom̧, āinwōt an jeje ko rekwojarjar ba, “armej ro rekāāl”8 ilo Kraist. Kōnke m̧ool in ewānōk jemaron̄ kiiō ba, “Ejjab n̄a em̧m̧aan ak kōrā eo me ekar kōm̧m̧ani jerawiwi ko m̧oktaļo̧k. N̄an juon armej kāāl im em̧ōj an oktak.

3. Kaen̄tanaan im M̧ōjņo̧ ko. Alma ekar kanaan bwe Kraist “enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k.” Etke? “Bwe būruōn en maron̄ obrak kōn tūriam̧o, … bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer.”9

Ewi wāween An kar kadedeikļo̧k menin? Jet iien Ej joļo̧k kaen̄tanaan, jet iien Ej kōkajoorļo̧k kōj n̄an niknik, im jet iien Ej letok juon kōļmenļo̧kjeņ an mour indeeo n̄an meļeļe kōn melejon̄ ko ad me rej an jidik wōt iien. Ālkin an Josep kar en̄taan ilo juon iien aeitok ilo an ejjeļo̧k tōprak im nana kōjeiien ilo jikin kalbuuj Liberty iumin 2 allōn̄, āliktata ej ļamōj lōn̄ļo̧k, “O Anij, kwo pād ia?”10 Ijjeļo̧kin an kajju joļo̧k aolep an eddo, Anij ekar uwaak, “Nejū m̧aan, aenōm̧m̧an en n̄an am; mennin jum̧ae kein am im en̄taan kein am renaaj n̄an jidik wōt iien.”11

Josep kiiō ekar jeļā bwe en̄jake in enana ekar jab lukkuun aorōk n̄e ej ļōmņak kōn mour indeeo. Kōn visōn in edepakpak, ekar jeje n̄an armej ro Rekwojarjar jān ejja lowaan wōt jikin kalbuuj eo, “Ro jeiū im jatū rejitenbōro, jen kōm̧m̧ani aolep men kein ilo m̧ōņōņō ko im rej pād ilo ad kajoor; innām jen jutak pen, kōn jeļā ekanooj dim, n̄an lo lo̧mo̧o̧r an Anij.”12 Kōn Pinmuur eo an Rilo̧mo̧o̧r, jemaron̄ bōk jeļā an mour indeeo me ej letok un n̄an melejon̄ ko ad im kōjatdikdik n̄an ad anjo̧.

4. Mōjno̧ im Jab wānōk ko ad. Kōn Pinmuur eo An, Rilo̧mo̧o̧r ewōr ippān kajoor ko n̄an kōkajoorļo̧k, jet iien ej ņa etan jouj,13 me emaron̄ jipan̄ kōj anjo̧ jān mōjno̧ ko im jab wānōk ko im bwe ej jipan̄ kōj ilo kōttōbar eo ad n̄an erom āinwōt E.

Moronai ekar katakin: “Aaet, itok n̄an Kraist, im weepān ilo E, … bwe jān An jouj kom̧ maron̄ weepān ilo E.”14 Ilo kalimjōkļo̧k ewōr tarrin in ruo wāween ak un ko n̄an kawōrtokjeer kōn kajoor ko me remaron̄ karreoiki—barāinwōt kōwāppenļo̧k—kōj.

M̧oktata, kain̄i ko rekwojarjar. Jeje ko rekwojarjar ej ba n̄an kōj, “Ilo kain̄i ko ie, kajoor in āinwōt anij ej waļo̧k.”15 Jet iien, jemaron̄ ļōmņak kōn kain̄i ko āinwōt juon checklist—emenin aikuj n̄an mour eo eutiejtata; ak ilo m̧ool kajjojo men kein rej kōtļo̧k bwe jen bōk juon kajoor an anij me ej jipan̄ kōj erom̧ eļapļo̧k āinwōt Kraist. N̄an waanjon̄ak:

  • N̄e jej peptaij, jej erreo—innem eļapļo̧k ad kwojarjar āinwōt Anij.

  • N̄an kakobaba, kōn Jetōb Kwojarjar, kōļmenļo̧kjeņ ko ad remaron̄ meramļo̧k im buruōd remaron̄ ettā bwe jen maron̄ ļōmņak im en̄jake eļapļo̧k āinwōt E.

  • Im n̄e jej liāp ippān ro pāleed, jej bōk maron̄ eo n̄an “tūroon ko, aelōn̄ in kiin̄ ko, tōln̄an ko, im kajoor ko”16 āinwōt menin letok ko jān Anij.

Wāween eo kein karuo n̄an bōk kajoor kein ej menin letok ko an Jetōb. Kōn Pinmuur eo an Kraist, jej maron̄ bōk menin letok eo an Jetōb Kwojarjar im ippān tok menin letok ko an jetōb. Menin letok kein rej m̧wil ko an mour kwojarjar; kōn menin, kajjojo iien jej bōk juon menin letok an Jetōb, jej erom̧ āinwōt Anij. Ejjeļo̧k pere en̄in unin an jeje ko rekwojarjar kapilōk kōn elōn̄ iien ko raorōk n̄an pukōt menin letok ko.17

Būreejtōn George Q. Cannon ekar katakin: “Ejjeļo̧k juon em̧m̧aan emaron̄ ba, “O, eban bōjrak aō kōm̧m̧ane menin, ej aō jerbal.” Ejjab errā ilo menin, bwe unin an Anij kar kallim̧ur n̄an … letok menin letok ko me renaaj kajimweik [mōjno̧ ko ad]. … Eļan̄n̄e elōn̄ iaad rej bōd, ej ad eddo n̄an jar kōn menin letok eo me enaaj kōm̧m̧an bwe jen wānōk.”18

N̄an kakaduikļo̧k, Pinmuur eo an Rilo̧mo̧o̧r ej letok n̄an kōj mour ijjeļo̧kin mej, “aibojooj jān bwidej in upaaj,”19 kōmour jān metak, kōwānōk jān mōjno̧. Ej uwaak jān lan̄ n̄an ņa mejļan men ko reppen im apan̄ ko ilo laļ in.

Ilo wiik eo āliktata an Rilo̧mo̧o̧r ioon laļ in, Ekar ba, “Ilo laļ kom̧ij en̄taan, a kom̧win m̧ōņōņō; N̄a Iar bōk anjo̧ ioon laļ.”20 Kōnke Rilo̧mo̧o̧r ekar kadedeikļo̧k Pinmuur eo An, ejjeļo̧k bar akweļap ko ak makūtkūt ak armej—ejjeļo̧k jerawiwi ak mej ak jepel—me emaron̄ bōbrae kōj jān ad bōk mour eo eutiejtata, eļan̄n̄e jej kōjparok kien ko an Anij. Kōn jelāļo̧kjeņ in, jemaron̄ bun̄ m̧aanļo̧k kōn lan̄lōn̄ im kam̧ool em̧ool bwe Anij ej jutak ilikid ilo kijejeto in ekwojarjar.

Ij kwaļo̧k aō kam̧ool bwe Pinmuur eo an Jisōs Kraist ejjab ejjeļo̧k jem̧ļo̧kin wōt ilo maron̄ ak ej barāinwōt n̄an kajjojo armej—bwe ejjab maron̄ wōt kōjepļaak kōj n̄an im̧aan mejān Anij ak ej kōm̧m̧an bwe jen maron̄ āinwōt E—ej kōttōpar eo eļaptata an Pinmuur eo an Kraist. Men kein ij kwaļo̧k aō kam̧m̧oolol im kam̧ool em̧ool ilo etan Jisōs Kraist, amen.