Seperd Em̧m̧an, Ļaam̧ an Anij
Jisōs Kraist ej kūr kōj ilo Anikien im ilo Etan. Ej pukot im kakobaiik kōj. Ej katakin kōj elmen jerbal in karejar ilo iakwe.
Ro jeiū im jatū rejitōn bōro, ewōr ke iien kwaar n̄ak kiki im kwaar kajjieon̄ bōnbōn jiip ilo kōļmenļo̧kijen eo am̧? Ilo an jiip ko kājoon oror eo, ko bōnbōn:1, 2, 3, … 245, 246, … 657, 658 …1
Ilo baj n̄a, bōnbōn jiip ejjab kōm̧m̧an men in aō kiki ļo̧k. Ij inepata eļan̄n̄e enaaj bōd kilen aō bōnbōn, menin ej kōm̧m̧an bwe in ruj wōt.
Kōn ļaddik eo ekar lale jiip ko ekar erom̧ kiin̄, jej kwaļo̧k:
“Jeova ao sepherd; ijamin aikuj.
“Ej kababu iō ilo meļaaj in wūjooj e maroro: Ej tōl iō ilo dān ko re ļae.
“Ej kakajoor eō.”2
Ilo iien Ijtō in, jej kemeemej Seperd eo Em̧m̧an, eo ej barāinwōt Laam̧ an Anij. Ilo aolepān taitōļ ko An rekwojarjar, ko jet rejjab eļapļo̧k aer pidodo ak ba. Eļap ad ekkatak jān Rilo̧mo̧o̧r eo eo ej make ba E ej Seperd eo Em̧m̧an im jān naan in kam̧ool an rikanaan ro ke E ej Ļaam an Anij. Jerbal im kakōllā kein relukkuun kajoor—wōn eo enaaj em̧m̧anļo̧k an kaenōm̧m̧an kōj jān Ļaam̧ eo jān Seperd eo, im wōn eo em̧m̧anļo̧k an nej ad Seperd jān Ļaam̧ an Anij?
“Bwe kōn an Anij yokwe laļ, Ear letok juon wōt Nejin Ear keotak,” im Nejin Anij emake wōt ekar letok mour eo an ilo an bokake Eo Jemen.3 Jisōs ekar kamool, “N̄a seperd em̧m̧an; seperd eo em̧m̧an ej leļo̧k mour eo an n̄an siip ko.4 Jisōs ewōr an kajoor n̄an letok mour eo an im kajoor n̄an bar barāinwōt boke.5 Ilo an pād Ippān Jemān rainin, Riļo̧mo̧o̧r eo ej kōjeraam̧m̧an kōj, jim̧or āinwōt ad seperd em̧m̧an im āinwōt Ļaam̧ an Anij.
Āinwōt ad Seperd em̧m̧an, Jisōs Kraist ej kūr ilo Anikien im etaer. Ej pukot im kakobaiik kōj. Ej katakin kōj elmen jerbal in karejar ilo iakwe. Jān ļōmņak kōn naan kein jilu, jinoin kōn E ej kūr kōj ilo Ainikien im ilo Etan.
M̧okta, ad Seperd em̧m̧an “ej kūr siip ko an make ilo etaer. … Rejeļā Ainikien.”6 Im “ilo etan make ej kūr eok, eo ej etan Kraist.”7 Ilo ad kapukōt ilo m̧ool n̄an ļoor Jisōs Kraist, ikdeelel ej itok ilo em̧m̧an, n̄an iakwe Anij, im n̄an jerbal n̄an E.8 Ilo ad ekkatak, linūri, im jar; ilo ad iien otemjej kōkāāl bujen ko ad ilo iien kwojkwoj im ilo tampeļ; im ilo ad karuwainene aolep n̄an gospel in An im katak ko, jej ron̄jake Ainikien.
Ilo raan kein ad, Būreejtōn Russell M. Nelson ej ko̧o̧njeļe kōj n̄an kūr Kabun̄ eo kōn et eo Jisōs Kraist ekar kwaļo̧ke: Kabun̄ eo an Jisōs Kraist im Armej ro Rekwojarjar ilo Raan-ko Āliktata.9 Irooj ej ba, “Jabdewōt men kom̧ naaj kōm̧m̧an, kom̧ naaj kōm̧m̧an ilo Eta; kōn menin kom̧ naaj ņa etan kabun̄ eo ilo Eta; im kom̧ naaj kajjitōk ippān Jemād ilo Eta bwe E en naaj kōjeraam̧m̧an kabun̄ eo kōn Eō.”10 Ilo aolepen laļ in, ilo būruer im ilo moko imōd, jej kur n̄an Jemād ilo etan Jisōs Kraist. Jej kam̧ooļol kōn kōjeraam̧m̧an kōn imoko im̧ōd, kabun̄jar eo rie jān Kabun̄ in, katak kōn gospel eo, im kōm̧m̧ani m̧akūtkūt ko an baam̧le.
Kein karuo, Seperd eo em̧m̧an ej pukot im kobaik kōj ilo juon wōt oror. Ej kajjitōk, “Armej ot iaami jibukwi sip ippān, eļan̄n̄e juon iaer e jako, e jab likūt ruwatimjuonn̄oul im ruwatimjuon ilo āne jemaden, im ilo̧k ilo̧kōnļo̧k eo e jako, n̄an tōre eo enaaj lo e?”11
Ad Rilo̧mo̧o̧r ej pukōtļo̧k juon im n̄an ruwatimjounn̄oul im ruwatimjuon, ekkā ilo juon wōt iien. Ilo ad jerbal in karejar, jej kile ruwatimjounn̄oul im ruwatimjuon ko ro rej pen im jab em̧akūtkūt, men̄e alkin ad pukoteļo̧k eo em̧ōj an jako. Irooj ej pukote im kojpārok kōj “ilo aolep jikin ko,”12 “jān aolep kona ko emān ilo laļ in.”13 Ej kakobaik koj ilo bujen ko rekwojarjar im ilo en̄taan in bōtōtōk in.14
Rilo̧mo̧o̧r eo ekar ba n̄an rikaļoor ro An ilo Kallim̧ur Ekāāl, “Bwe sip ko jet Aō, rejjab jān wōrwōr in.”15 Ilo Amedka, Irooj eo ekar jerkakpeje ekar kam̧ool n̄an ajri in bujen ro nejin Liai, “Kom̧ ej aō sip.”16 Im Jisōs ej ba sip ko jet renaaj ron̄ Ainikien.17 Ej juon kōjeraam̧m̧an bwe Bok in Mormon ej bar juon kallim̧ur eo ej kam̧ool ainikien Jisōs Kraist.
Jisōs Kraist ej karuwainene Kabun̄ in n̄an bōke aolep ro rej ron̄ Ainikien18 im kōjparok kien ko An. Katak ko an Kraist ekoba peptaij kōn dān im kōn kijeek im Jetōb Kwojarjar.19 Nipai ej kajjitōk, ”N̄e Lamb an Anij, E ekwōjarjar, Eaikuj kar peptaij kōn dān, n̄an kam̧ool em̧m̧an otemjej, O innām, ewi jon̄an ļapļo̧k in ad aikuj, ro rejjab ekwōjarjar, in peptaij, aaet, em̧ool kōn dān!”20
Rainin Rilo̧mo̧o̧r eo ad ekōņaan bwe ta ko jej kōm̧m̧ani im wōn eo jenaaj erom̧ enaaj karuwainene ro jet n̄an itok, ļoor E. Itok pukote iakwe, mour, ippān doon, im bujen ko rej An, ekoba tampeļ eo ekwojarjar mōn Anij, ijo katak ko rekwojarjar ilo lo̧mo̧o̧r emaron̄ kōjeraam̧m̧an aolep baam̧le ko, bwe kobaik tok im̧ōn Israel ilo laļ in ilo ijo rājet.21
Kein kajilu, āinwōt “Seperd an Israel,”22 Jisōs Kraist ej kwaļo̧k lukkuun wāween elmen an seperd ro an Israel jerbal in karejar ilo iakwe. Ne Irooj ej kajjitōk jej ke iakwe E, āinwōt An kar kōm̧m̧an ippān Simon Piter, Rilo̧mo̧o̧r eo ad ej akweļap: “Naajdik Ļaam ko Aō. … Naajdik Jiip ko Aō. … Naajdik jiip ko Aō.”23 Irooj ej kallim̧ur bwe eļan̄n̄e seperd ro An rōnaaj naajdik ļaam̧ ko an im sip , ro ilo wōrwōr eo An, “rejamin mijak, ak aiaea, barāinwōt reban likjab.”24
Seperd eo ad Em̧m̧an ej kakkōl bwe seperd in Isreal ren jab kiki,25 ejjab jeppļōkļōk ak kōm̧m̧an bwe sip ko ren jab pilo,26 ejjab reiļo̧k ilo iaļ ko ad make kōn kōttōbar ko ad make.27 Seperd ro an Anij rej aikuj kajoor, mour, pen bwe eo ej rup, ej bar boktok eo ekar jakoļo̧k, pukote eo ekar jabwebwe.28
Irooj ej barāinwōr kakkōl ro rej jerbal wōt n̄an kapok jeram̧m̧an, ro rej jab “kea kōn sip ko”29 im “rikanaan ro reriab, ro rej itok n̄an kom̧ kilin sip, ak ilowa rej kidu olip rellāj.”30
Seperd eo ad Em̧m̧an ej m̧ōņōņō ne jej ekkatak kōn kajjojo anemkwoj in kālet ippān kōņaan im tōmak. Ro ilo wōrwōr eo An rej reiļo̧k n̄an ad Rilo̧mo̧o̧r ilo kam̧m̧oolol kōn en̄taan eo An. Jej kōm̧m̧an bujen n̄an ļoor E, ejjab ilo bajjōk, pilo, ak “ilo ejelļo̧k sip”, bōtaab ilo ikdeelel kōn aolepān būruweer im ļōmņak n̄an iakwe Anij im ro riturir, kotak doon ilo eddo ko an im em̧ōņōņō ippān doon. Ilo an Kraist letok aolepān An jān ankilaan eo Jemān, jej kauteej ilo ad bok ilo Etan. Jej em̧ōņōņō ilo jerbal in an n̄an kobaik im jerbal in karejar n̄an aolep ajri ro nejin Anij.
Ro jeiū im jatū, Jisōs Kraist ej Seperd eo ad Em̧m̧antata. Kōnke ekar likūt mour eo An n̄an kōj im kiiō em̧ōj an jerkakpeje, Jisōs Kraist ej barāinwōt Ļaam an Anij ewāppen.31
En̄taan in an Ļaam an Anij kar baj kwaļo̧k kake jān jinoin. Juon enjeļ kar ba n̄an Adam kōn en̄taan eo an “ejeļo̧k oktak en̄taan eo an Eo Emake Wōt Nejin Jemān,” eo ej karuwainene kōj n̄an “ukweļo̧k im kūr ioon Anij ilo etan Nejin jān kiiō n̄an indeo.”32
Jemed Ebream, eo ekar ejaake bujen in kōjeraam̧m̧an n̄an aolep laļ ilo laļ in, kar en̄jake ta meļeļe n̄an katok kōn nejin eo emake wōt.
“Im Aisek ekar kōņaan n̄an Ebream eo jemen, im ba Jema: im ekar ba, “Na e, nejū. Im ekar ba, Lo kijeek im kane: ak ewi ļaam eo…?
“Im Ebream ekar ba, Nejū, Anij enaaj make bōke ļaam eo.”33
Rikaļoor im rikanaan ro rekar loe m̧oktaļo̧k im m̧ōņōņō kōn katak in mijen eo an Ļaam̧ an Anij. Jon ilo Laļ eo M̧okta im Nipai ilo Laļ eo Ekāāl kar kam̧ool kōn “Ļaam̧ an Anij,”34 aaet, ejja eo Nejin Jemed Indeeo[,] … Rilo̧mo̧o̧r eo an laļ.”35
Abinadai ekar kam̧ool kōn en̄taan eo an Jisōs Kraist: “Aolep kōj, āinwōt sip, jaar jebwābwe; jaar jeorļo̧k jabdewōt iaad kajjojo n̄an iaļ eo an; im Irooj eaar likūt ioon [jero̧wiwi] ko ad aolep.”36 Alma ej ņae etan en̄taan eo aliktata im em̧m̧an tata an Nejin Anij “juon men eo eļap an aorōk jān aolep men.” Alma ej rōjan, “Tōmak ilo Ļaam̧ an Anij”; “itok im jab mijak.”37
Juon mōtta ekar kwaļo̧k elmen an kar bōk juon naan in kam̧ool aorōk kōn Pinmuur eo an Jisōs Kraist. Ekar rittoļo̧k ilo an tōmak bwe jarwiwi ej boktok eļap kaje, leak jān koj make. Ekar kajjitōk ippān Anij n̄an meļeļe kōn men in jeorļo̧k bōd. Ekar jar n̄an meļeļe im jeļā elmen an Jisōs Kraist jeorļo̧k bōd an ro rej ukweļo̧k, elmen an tiram̧o itok ilo kien.
Juon raan jar eo ekar uwaak ilo en̄jake eo an jetōb oktak. Juon ļaddik em̧m̧an dettan ekar ettōr jān lowaan juon m̧ōn wia kōn ruo pakij in m̧ōn̄ā ko ekar koote. Ekar ettōr ilowaan iaļ eo epoub, boss eo an m̧ōn wia eo ej kōpeļe, eo ekar jibwe e im jino lam̧ōj im ire ippān. Ilo an en̄jake im jab ekajet e ļaddik eo ekar koot emijak, in mōtta ekar loe an make obrak kōn būrom̧ōj kake. Ijeļo̧kin mijak im kea kōn an make kojbarok, ekar kaju etetal ļo̧k n̄an em̧m̧aan ro ruo rej illu. Ekar loe an make ba, “Inaaj kōļļāik m̧ōn̄ā kaņi. Jouj kōttōļo̧k e. Jouj kōttōļo̧k bwe in kōļļā wōņāān m̧ōn̄ā kani.”
Kōn en̄jake eo an Jetōb Kwojarjar im kar obrak kōn iakwe kar janin̄ en̄jake m̧okta, in mōtta ekar ba, “Men eo de ikar kōņaan kōm̧m̧ane ej jipan̄ im lo̧mo̧o̧ren ļaddik in.” In mōtta ekar ba ekar jino meļeļe kōn Jisōs Kraist im Pinmuur eo an—elmen im etke kōn erreo im weppan iakwe Jisōs Kraist ekar maron̄ en̄taan bwe en an Rilo̧mo̧o̧r im Ripinmuur, im etke ekar kōņaan āinwōt E.38
Jej bōre ad al:
Lale, Seperd eo Em̧m̧an ej kapukot,
Pukote ļaam ko rejebwebwe,
Boktok er kōn lan̄lōn̄,
Lo̧mo̧o̧r ilo ejjeļo̧k wōņāān.39
Āinwōt Ļaam an Anij, Rilo̧mo̧o̧r eo ejeļā eļan̄n̄e jej en̄jake ke jej make iaad, apdik, jaje, ak mijak. Ilo ettōņak, Nipai ekar loe kajoor eo an Ļaam̧ an Anij “[itok]” ioon ro rekwojarjar ilo kabun̄ eo an Ļaam, im ioon armej in bujen ro an Irooj. Mene “jej jepeļo̧kļo̧k ilo aolepān mejān laļ … rekar kojparok kōn ekwojarjar im kōn kajoor eo an Anij ilo aiboojoj eo eļap.”40
Kallim̧ur in ej n̄an kōjatdikdik im aenōm̧m̧an ekoba raan ko ad.
Kwoj ke make wōt membōr in Kabun̄ in ilo baam̧le, jikuuļ, jikin jerbal, ak ijoko jikim. Branch eo am̧ ej ke jet iien dik ako ejjeļo̧k armej ie? Em̧ōj ke am̧ em̧m̧akūt n̄an juon jikin ekāāl, bōlen kōn bar juon kajin ako m̧anit ko reoktak? Ak wāween mour eo am em̧ōj an oktak, im men ko kwaar jab ļōmņak kake rej kiiō jelm̧ae eok? Rilo̧mo̧o̧r eo ej ba n̄an kōj, jekdoon jekjek rot ko ippād, wōn kōj, ilo naan ko an Aiseia: “Enaaj aitok aolep ļaam̧ ko an n̄an peiu, im kotak kōj ippān, im enaaj jipan̄ ro rej dik wōt.”41
Ro jeiū im jatū, Seperd eo ad Em̧m̧an ej kūr kōj ilo Ainikien im Etan. Ej pukote, aiintok, im itok n̄an armej ro An. Kōn rikanaan ro an rej mour im kōn koj, Ej karuwainene koj n̄an pukote aenōm̧m̧an, unin, mour, im m̧ōņōņō ilo tarlep in gospel eo em̧ōj an jepļaaktok im ilo iaļ in bujen eo An. Kōn waanjon̄ak, Ej katakin seperd ro an elmen jerbal ilo iakwe.
Āinwōt Ļaam̧ an Anij, jerbal eo an Jisōs ekwojarjar ekar ekkapit m̧okta im m̧ōņōņō kōn rikaļoor ro im rikanaan ro. Pinmuur eo an, ejjeļo̧k jemļo̧k in im n̄an indeeo, ej ioļap in karōk in m̧ōņōņō im unin kōm̧anm̧an eo. Ej ba n̄an kōj bwe ej kotak kōj itūrin menono eo an.
Ro jeiū im jatū, kōm̧m̧an bwe jen ikdeelel āinwōt “rikaļoor an Anij rej ettā im Ļaam,”42 bōlen juon raan etad en jeje ilo bok eo an Ļaam̧ eo n̄an mour,43 n̄an al al ko kōn Ļaam̧,44 n̄an ruwainene n̄an kōjota eo an Ļaam̧ eo.45
Āinwōt Seperd im Ļaam̧, Ej kūr, bar Itok “n̄an jeļāļo̧kjeņ eo em̧ool … an [ami] Rilo̧mo̧o̧r, … [am] seperd em̧m̧an im em̧ool.”46 Ej kallim̧ur bwe “kōn jouj [kōj] jemaron̄ [erom̧] weppan āinwōt Kraist.”47
Ilo Ijtō in, jej nebar E:
“Ekwojarjar ej Ļaam̧ eo!”48
“Hosanna n̄an Anij im Ļaam̧ eo!”49
Ij kam̧ool kōn E, Seperd eo ad Em̧m̧an tata, Ļaam̧ an Anij em̧m̧an tata. Ej kur koj ilo etad, ilo Etan—ilo et eo aorōk im ekwojarjar etan Jisōs Kraist—amen.