M̧ool, Erreeo, im Ļam Waan eo an Gospel eo an Jisōs Kraist
Iakwe Anij im iakwe riturid ej pedped in katak eo an jerbal in karejar; pedped ilo m̧weeo, Kabun̄ ej rie; kabun̄jar ilo jetōb ilo raan in Jabōt; im jerbal in lo̧mo̧o̧r.
Ro jeiū im jatū, epen aō tōmak bwe 71 iiō remootļo̧k, ilo 1948, ikar juon mijenede ilo England im 44 iiō remootļo̧k kōrā eo ippa pāleeō, Barbara, im n̄a kar bōk baam̧le eo am̧ n̄an Canada ke iaar juon būreejtōn n̄an Canada Toronto Mission. Ke ij jerbal ijeņ ilo Eprōļ 1976, kar kūr eō n̄an Doulul eo Kein Kajuon ilo Jiljilimjuon̄ol eo, im kar jab kōtmene ilo 1985, kar kūr eō n̄an Doulul eo an Jon̄oulruo Rijilōk ro. Ejjab āinwōt kūr ko aō m̧oktaļo̧k, eo ekitbuuj kōtļo̧k ilju jeklaj, aō kōtļo̧k jān kūr eo n̄an Jon̄oulruo ejjab ļōmņak eo em̧m̧antata ilo tōre in; ijoke, ij jar bwe raan eo enaaj itok n̄e inaaj kadedeļo̧k aolep kūr eo Irooj eaar kūr eō n̄an kōm̧m̧ani.
N̄an ļōmņake iiō ko 43 in aō jerbal āinwōt juon Routiej an Kabun̄ in im jeraam̧m̧an eo bwe in maron̄ jerbal in karejar n̄an ro nejin Jemedwōj Ilan̄, iaar maron̄ in kile eļap bwe Ekōņaan bwe aolep ro Nejin ren lo aenōm̧m̧an, lan̄lōn̄, im m̧ōņōņō ilo mour ko aer.
Rikanaan Liai eaar kwaļo̧k, “Em̧m̧aan [im kōrā] ren, bwe ren maron̄ m̧ōņōņō.”1 Ekanooj lōn̄ un ko unin ad jab aenōm̧m̧an, lan̄lōn̄, im m̧ōņōņō ilo mour in, ekoba jeram̧ōļ, tariņae, jorrāān in laļ, im apan̄ ko jab jeļā kaki ilo jikin jerbal, ājmour, im jem̧doon ko an baam̧le.
Ak men̄e jeban dāpij apan̄ kein rejelet mour ko ad ioon laļ in, ilo ad kajjieon̄ in erom̧ rijilōk ro retiljek an Irooj Jisōs Kraist, jemaron̄ lo aenōm̧m̧an, lan̄lōn̄, im m̧ōņōņō men̄e inepata ko an laļ in rej jepooļ kōj.
Juon iaan ajri ro nejū eaar ba, “Baba, ij baj lale āinwōt iban tōprak.” Iaar uwaak, “Men eo Jemedwōj Ilan̄ ej kajjitōk ippād ej n̄an kōm̧m̧ane ijo em̧m̧antata jemaron̄e kajjojo raan.” Ro jeiū im jatū, kōm̧m̧ane ijo em̧m̧antata komaron̄e jen raan n̄an raan, im m̧okta jen am̧ jeļā, kwonaaj kile bwe Jemedwōj Ilan̄ ejeļā kajjiem̧ im bwe Ej iakwe eok. Im n̄e kwonaaj jeļā—lukkuun jeļā—mour eo am̧ enaaj wōr jibadbad im meļeļein im kwonaaj maron̄ in obrak kōn lan̄lōn̄ im aenōm̧m̧an.
Āinwōt Meram eo an Laļ in, Rilo̧mo̧o̧r eaar ba, “Jabdewōt eo ej lōke Eō en jāmin pād ilo marok.”2
“Jisōs Kraist ej āt eo letok in Jemed, im ejjeļo̧k bar juon āt letok [jemaron̄] mour;
“Kōn menin, aolep em̧m̧aan [im kōrā] reaikuj bōk iooer etan eo ej letok in Jemed.”3
Jeje ko rekwojarjar rej katakin kōj bwe Setan ekōņaan tōlļo̧k armej ro n̄an maroklep. An aolep jibadbad ej n̄an kakkure meram im m̧ool eo kōn Jisōs Kraist im gospel eo An. Āinwōt an Liai kar katakin ajri ro nejin, bwe devil “ej kappukot bwe aolep armej ren en̄taan āinwōt e.”4 Eļan̄n̄e “jerbal im … aiboojoj” an Jemedwōj Ilan̄ ej “n̄an kakūrm̧ool jab wabanban im mour indeeo an [em̧m̧aan im kōrā],”5 Jerbal” eo an Lucifer ej n̄an kakūrm̧ool en̄taan im būrom̧ōj n̄an ajri ro nejin Anij. Jerawiwi im bōd rej kōmarokļo̧k Meram in Kraist ilo mour ko ad. En̄in unin kōttōbar eo ad ej n̄an bōk eļapļo̧k Meram in Kraist, eo ej bōktok aenōm̧m̧an lan̄lōn̄ im m̧ōņōņō.
Ilo 18 allōn̄ ko remootļo̧k, Irooj eaar im̧we rikanaan eo An im Rijilōk ro n̄an kōkm̧anm̧anļo̧k jet oktak ko rem̧m̧an. Ijoke, ij uwōta n̄e jetōbin jibadbad eo an oktak kein remaron̄ in jino kaitoktoklimo kōn oktak ko aer make.
Joseph F. Smith eaar ba: “M̧ool, erreeo, ļam waan eo an gospel eo an Jisōs Kraist em̧ōj an jepļaaktok. Jej eddoik n̄an kōjparoke ioon laļ in.”6 Eaar kobaik bwe m̧ool, erreeo, im ļam waan eo an gospel in ej “kōjparok katak ko an Kraist.”7
Ilo Laajrak in Tōmak ko, Rikanaan Josep Smith eaar kwaļo̧k bwe: “kōn Pinmuur eo an Kraist, aolep armej remaron̄ bōk lo̧mo̧o̧r, jān pokake kien ko im kain̄i ko an Gospel eo.”8
Pedped ko m̧oktata an gospel in rej tōmak ilo Irooj Jisōs Kraist, ukweļo̧k, peptaij, im menin letok eo an Jetōb Kwojarjar, im niknik n̄an jem̧ļo̧kin. Būratōr eo an Hyrum eaar kwaļo̧k: “Bar katakin er [im bar] katakin: kwonaaj lo jen raan n̄an raan ļōmņak ko rekāāl im meram in n̄ūrbōktak kōn er enaaj iwōj n̄an eok. Komaron̄ jeje ak kōnono kaki … n̄an lukkuun meļeļe kaki. Innām kiiō komaron̄ in kōm̧m̧an bwe ro [kwoj] katakin ren lukkuun jeļā kaki.”9
Wāween eo em̧m̧antata n̄an kōj n̄an lo jetōbin jibadbad ko an Kabun̄ in rej n̄an mour kōn m̧ool, erreeo, im ļam waan eo an katak ko an Kraist im n̄an mour kaki kien ko ruo reļļap an Rilo̧mo̧o̧r: “Kwōn yokwe Irooj am̧ Anij kōn aolepen būruwōm̧. … Kwōn yokwe riturum̧ āinwōt kwe.”10
Pokake kien kein ruo rej letok juon wāween n̄an en̄jake eļapļo̧k aenōm̧m̧an im lan̄lōn̄. N̄e jej iakwe im jerbal n̄an Irooj im iakwe im jerbal n̄an ro riturid, jenaaj lukkuun en̄jake eļapļo̧k m̧ōņōņō eo ej itok n̄an kōj ilo ejjeļo̧k wāween em̧m̧anļo̧k.
Iakwe Anij im iakwe riturid ej pedped in katak eo kōn jerbal in karejar, ekkatak eo ej pepded ilo m̧weeo, im Kabun̄ ej rie ; Raan in Jabōt en ejetōbtōb ilo iien kabun̄jar; im jerbal in lo̧mo̧o̧r ilo jim̧or roņōl eo n̄an jipan̄ Doulul eo an Kōrā im doulul ko an elder ro. Aolepen men kein rej pedped wōt ioon kien ko rekwojarjar n̄an iakwe Anij im n̄an iakwe ro riturid. Ewōr ke jabdewōt men epidodoļo̧k, eaorōkļo̧k, im ļam waan jen menin?
Mour kōn m̧ool, erreeo, im ļam waan an karōk in gospel in enaaj kōm̧m̧an bwe en ļapļo̧k ad loļo̧k kōrā ro emej pāleer, em̧m̧aan ro emej pāleer, ajri ro rejerata, ro rajimakeke, nan̄inmej, im jeram̧ōl. Jenaaj lo aenōm̧m̧an, lan̄lōn̄, im m̧ōņōņō ilo mour eo ad n̄e jej jerbal n̄an Irooj im ro riturid.
Oktak ko ilo Raan in Jabōt me kar kwaļo̧k pedped ilo m̧weeo, Kabun̄ ej rie ilo katak im ekkatak gospel in rej men ko n̄an kōkāāl mour in jetōb eo ad im ad wūjļepļo̧k n̄an Anij ilowaan wōt m̧oko im̧ōd. Ta eo enaaj pidodoļo̧k, aorōkļo̧k, im kōbōkakkak? Ro jeiū im jatū, kwoj loe ke bwe katak im kwaļo̧k gospel in n̄an baam̧le ko ad ej juon wāween eo eaorōk n̄an bōk lan̄lōn̄ im m̧ōņōņō ilo mour ko ad?
Kōnono kōn Raan in Jabōt, Rilo̧mo̧o̧r eaar ba, “Bwe em̧ool raan eo in jitōn̄ n̄an kwe n̄an kakkije jān jerbal ko am, im liļo̧k nebar ko am n̄an Eo Eutiejtata.”11 Eaar bar ba, “Bwe am lan̄lōn̄ en kanooj iio… [ilo] lan̄lōn̄ im jar… kwoj [aikuj] kōm̧m̧ani men kein kōn kam̧m̧oolol, kōn bōro ko im paotok ko rem̧ōņōņō … [im] kōn bōro eo elem̧ōņōņō im paotok ko rem̧ōņōņō.”12
Jouj im keememej jet iaan naan ko raorōk ilo m̧adenļo̧k in: lan̄lōn̄, mōņōņō, kam̧m̧oolol, bōro eo elem̧ōņōņō, em̧m̧an bōro, im paoktok ko rem̧ōņōņō. N̄an n̄a kōjparok Raan in Jabōt ej aikuj ettōn̄dikdik ko ilo mejer.
Ilo ad jerbal in karejar ilo juon wāween eo em̧m̧anļo̧k im ekwojarjarļo̧k, jouj ļōmņake ewi jon̄an an aorōk bwe jen karuwaineneik aolep ro rej itok n̄an kweilo̧k ko ad ilo Kabun̄ in, eļaptata membōr ro rekāāl im rilotok ro. Jej aikuj aolep m̧ōņōņō in al al in jar ko im ron̄jake naan ko ilo jar in kwojkwoj eo ilo bōro im ļōmņak.
Naan in kam̧ool ko kōn tōmak ilo kweilo̧k in jitlo̧k ko im naan in kam̧ool rej tōl jen eo uwaan bisoprik eo, eo ej kwaļo̧k jidik naan in kam̧ool pedped wōt ioon karōk in lem̧ōņōņō eo im kōn m̧ool, erreeo, im ļam waan eo an gospel eo an Kraist. Aolep rej aikuj ļoor waanjon̄ok in. Jej aikuj keememej bwe ewōr bar jet jikin ko n̄an kwaļo̧k bwebwenato ko ak kwaļo̧k iien ito-itak ko. Ilo ad dāpij naan in kam̧ool ko ad im mije wōt gospel eo an Kraist, Enaaj letok jetōbin kōkāāl ilo ad kwaļo̧k naan in kam̧ool ko ad n̄an doon.
Jerbal in karejar eo ejjejet ej waļo̧k n̄an iakwe Anij im iakwe riturid. Āinwōt kar kwaļo̧ke, jej jerbal in karejar kōnke jej iakwe Jemedwōj Ilan̄ im ro Nejin. Kijejeto ko ad kōn jerbal in karejar enaaj em̧m̧anļo̧k eļan̄n̄e jej kapidodoik ad jerbal in karejar. Lan̄lōn̄ ej itok jān men ko reddik an mour in, kōn menin jej aikuj in lukkuun lale n̄an jab ļōmņak in kobaiktok jabdewōt oktak kein jaar būki n̄an kalōk tōmak im naan in kam̧ool ko repen ilo bōro ko būroruwōn ro nejin Anij.
Jen jab kapen men ko ippān kweilo̧k ko, karōk ko, ak men ko rekkar. Kapidodoiki. Ej ilo men ko repidodo me kwonaaj lo aenōm̧m̧an, lan̄lōn̄, im m̧ōņōņō me iaar kōnono kake.
Ilo elōn̄ iiō ko jibadbad in tōl eo an Kabun̄ in, āinwōt an waļo̧k ilo Bok in Bōk Meļeļe 2, realikkar im repidodo, eo inaaj riiti:
“Ritōl ro rej kōketak aolep membōr ro n̄an bōk aolep kain̄i ko raorōk an priesthood eo, kōjparok bujen ko rej iookļo̧k wōt, im karbōb n̄an mour ijo eutiej tata im mour indeeo. …
“Rūtto ro: Kōketak kajjojo rūtto n̄an erreo n̄an bōk kain̄i ko an tampeļ eo. Katakin aolep rūtto ro n̄an kile rūtto ro jibuer im jim̧aer im kōm̧m̧ani kain̄i ko an tampeļ n̄an er.
“Jodidik ro: Jipan̄ kajjojo likao ro n̄an bōk Melkisedek Priesthood, n̄an bōk kain̄i ko an tampeļ, im n̄an erreo n̄an jerbale juon mijen elikieo. Jipan̄ kōpooj kajjojo jiron̄ ro n̄an erreo n̄an kōm̧m̧an im kōjparok bujen ko rekwojarjar im bōk kain̄i ko an tampeļ eo. Kōkajoorļo̧k jodikdik ro kōn bōk kuņaan ilo m̧akūtkūt ko eļap meļeļeier.
“Aolep Membōr: Jipan̄ ritōl ro an priesthood im radik ko, ward ko̧o̧njeļ, mijenede ro an ward im mijenede ro rej jerbal aolep raan, im membōr ro rej arean doon ilo jerbale juon kijejeto n̄an lo̧mo̧ren kajjojo armej, kōkajoorļo̧k baam̧le im iuniit ko an Kabun̄, kōļapļo̧k m̧akūtkūt an priesthood, im aiintok Israel kōn oktak, dāpiji wōt, im kōkajoor. Katakin membōr ro n̄an leļo̧k er make im baam̧le ko aer im n̄an jipan̄ rijeram̧ōl im riaikuj ilo wāween eo an Irooj.”13
Aō jerbal ilo Kabun̄ in eaar kōjeraam̧m̧an n̄a kōn elōn̄ kabwilōn̄lōn̄ kōn jetōbin en̄jake ko rejenoļo̧k. Ij juon rikam̧ool bwe Irooj ej tōl Kabun̄ in An n̄an kadedeļo̧k jibadbad ko An. Em̧ōj aō bōk tōl ekwojarjar eļap jān aō maron̄. Lan̄lōn̄ n̄an mour kake gospel in n̄an n̄a eaar pepded ioon m̧ool, erreeo, im ļam waan eo an katak im gospel eo an Jisōs Kraist.
Em̧ōj aō jerbal ium̧win kii im tōl ko an jiljino rikanaan ro im Būreejtōn ro an Kabun̄ jān Spencer W. Kimball n̄an Russell M. Nelson. Ij kam̧ool bwe kajjojo iaer raar im rikanaan ro kālet in Anij. Raar katakin kōj pedped in katak ko raorōk kōn Kabun̄ in im gospel eo im katak an Kraist. Būreejtōn Nelson ej bōk m̧aanļo̧k jerbal in an Irooj ilo wāween eo ekabwilōn̄lōn̄. Ij ba “kabwilōn̄lōn̄” bwe ej make wōt Rijilōk eo erūtto jen n̄a, im epen aō maron̄ tōpar e! Ij juon rikam̧ool bwe kii ko an priesthood im kūr āinwōt juon rikanaan an Anij repād ioon. Būreejtōn Nelson ej katakin kōn m̧ool, erreeo, im ļam waan eo an gospel eo an Jisōs Kraist. Ij kwaļo̧k aō kamool bwe Jisōs ej RiKraist eo im en̄in ej Kabun̄ eo An—eo ij kwaļo̧k naan in kam̧ool ilo etan Jisōs Kraist, amen.