Kōmoururi M̧aajōļ in Jetōb ko Ad
Baj riit im ekkatak wōt kōn m̧ajōļ ko ejjab bwe n̄an ejaak m̧ajōļ, riit im ekkatak kōn tōmak ilo jab kobaiktok jerbal ejjab bwe n̄an kalōk tōmak.
Ij kam̧m̧oolol kōn kōjeraam̧m̧an eo kōn juon āinbwin kanniōk, eo ej juon menin letok ekabwilōn̄lōn̄ jān Jemedwōj Ilan̄. Āinbwinid ewōr elōn̄ļo̧k jān 600 m̧ajōļ ko ie.1 Elōn̄ m̧ajōļ ko rej aikuj kōmourur n̄an maron̄ bwe ren pād ilo jekjek eo ememourur n̄an kōm̧m̧ani m̧akūtkūt ko ad raan otemjej. Jej aikuj kōļapļo̧k eļap kijejeto in kōļmenļo̧kjeņ riit im ekkatak kōn m̧ajōļ ko ad, bōtaab eļan̄n̄e jej ļōmņak menin enaaj kōm̧m̧an aer kajoorļo̧k, jenaaj lukkuun in inepata. M̧ajōļ ko ad rej eddōkļo̧k n̄e wōt jej kōjerbali.
Iaar itok n̄an kile bwe menin letok ko ilo jetōb rej jerbal ilo ejja wāween in wōt. Rej barāinwōt aikuj in kōm̧akūtkūti n̄an aer eddōkļo̧k. Menin letok eo an tōmak ilo jetōb, n̄an waanjon̄ak, ejjab baj juon en̄jake ak juon tam̧m̧ūn; ej juon pedped in katak an jerbal me emakijkij an waļo̧k ilo jeje ko rekwojarjar ej ekkejeļo̧k n̄an verb eo kōmourur.2 Baj riit im ekkatak wōt kōn m̧ajōļ ko ejjab bwe n̄an ejaak m̧ajōļ, riit im ekkatak kōn tōmak ilo jabkobaiktok jerbal ejjab bwe n̄an kalōk tōmak.
Ke iaar 16 iiō detta, ļaddik eo jiū, Ivan, eo eaar 22 an iiō ilo tōre eo, eaar itok n̄an m̧weo juon raan im kwaļo̧k jet ennaan ko ippān baam̧le eo. Eaar jokāālet n̄an kar peptaij ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ro jinem im jemām raar kalimjōke kōn pere, im ij keememej jab kanooj meļeļe ta eo eaar waļo̧k. Juon iiō ak lōn̄ļo̧k tokālik, eaar letok n̄an kōm elōn̄ļo̧k ennaan ko rōkailbōkbōk: eaar jokāālet n̄an jerbal āinwōt juon mijenede an Kabun̄ in, eo kar meļeļe in bwe kōm ban naaj kar loe ium̧win ruo iiō ko. Ro jinō im jema raar jab m̧ōņōņō kōn ennaan in; mekarta, iaar lo ilo e juon kije ealikkar me eaar kōļapļo̧k aō nōbar e im jokāālet eo eaar kōm̧m̧ane.
Allōn̄ ko tokālik, ke Ivan eaar jerbale mijen eo an, eaar wōr aō iien em̧m̧an n̄an ļōmņak juon iien kakkije ippān rijikuuļ ro m̧ōtta. Kōm kar kōņaan kam̧ōņōņōik jem̧ļo̧k in iiō in high school ko am im joļo̧k jet raan ko ilo lojet.
Iaar je juon leta n̄an mijenede eo jeiū, kwaļo̧k kōn karōk ko aō n̄an iien kakkije eo ilo jōm̧ar eo. Eaar bar jejetok bwe jikin eo eaar jerbal ie eaar pād ilo iaļ eo n̄an ijo ij jibadōkļo̧k. Iaar ļōmņak enaaj kar juon ļōmņak em̧m̧an n̄an bōjrakļo̧k im loļo̧k e. Eaar jab m̧ae tokālik me iaar ekkatak bwe mijenede ro rejjjab aikuj in loļo̧k er jān baam̧le.
Iaar kōm̧m̧ani aolep karōk ko. Ij keememej jijet ilo baj eo ļōmņak kōn aolep limo ko Ivan im n̄a naaj kar kōm̧m̧ani ippān doon ilo rainin eaiboojo edet. Kōm kōn m̧ōn̄ā in jibbon̄, bwebwenato, ikkure ilo bok, aļ kōjeje—enaaj wōr juon iien am em̧m̧an ippān doon!
Ke baj eo eaar itaakļo̧k ilo jikin baj eo, iaar lo Ivan ej jutak turin bar juon likao, jim̧or ilo jōōt mouj ko im tae ko. Iaar to jān baj eo, kōm kar atbakoj doon,im eaar kwaļo̧k kadkad in eo m̧ōttan. Kōn jab bar jerwane juon minit, iaar jiron̄ ļeo jeiū karōk ko aō n̄an raan eo, bōtaab ekar dik aō jeļā ta eo Ivan eaar jikejuuļi. Eaar reitok n̄an eō, kar ettōn̄, im kar ba, “Aaet! Ijowōt ke, jej aikuj kōm̧m̧ane jet jerbal ko m̧okta. Kwoj ke itok ippām tok?” Iaar errā, ļōmņak bwe enaaj kar bwe am iien n̄an lem̧ōņōņō ilo bok ko ālkin wōt.
Raan eo, elōn̄ļo̧k jān 10 awa ko, iaar etetal ilo aolepān iaļ ko an jikin eo ippān ļeo jeiū im eo m̧ōttan. Iaar ettōn̄ n̄an armej ro aolepān raan eo. Iaar iak-iakwe armej ro ijjan̄in kar lo er ilo mour e aō. Iaar kōnono n̄an aolep, kōļaļļaļ ilo kōjām ko an ruwaimejet ro, im kar loļo̧k armej ro ļeo jeiū im eo m̧ōttan raar katakin.
Ilo baj juon iien loļo̧k, ļeo jeiū im eo m̧ōttan raar katakin kōn Jisōs Kraist im karōk in lo̧mo̧o̧r. Ilo jidimkij, Ivan eaar bōjrak im reitok n̄an n̄a. N̄an aō bwilōn̄, eaar ilo mera kajjitōk ippa n̄an kwaļo̧k ļōmņak eo aō kōn ta eo kar katakin. Ruum̧ eo eaar ikōn̄, im aolep mej ko raar iooktok n̄a. Kōn jet apan̄ ko, āliktata iaar lo naan ko im kwaļo̧k en̄jake ko aō kōn Rilo̧mo̧o̧r eo. Iaar jab jeļā eļan̄n̄e ta eo iaar kwaļo̧k eaar jim̧we ak bōd. Ļeo jeiū eaar jab kajim̧we eō; ilo wāween eo juon, eaar kam̧m̧oolol eō kōn kwaļo̧k ļōmņak im en̄jake ko aō.
Ilo awa ko kōm kar pād ippān doon, ļeo jeiū im eo m̧ōttan raar jab joļo̧k juon iien katakin juon katak n̄an n̄a wōt, aaet iaar bōk eļapļo̧k jeļā jān aolep iien bwebwenato ko aō m̧oktļo̧k ippān. Iaar kam̧ool kōn ekōjkan an paotok ko kar oktak ke an armej ro bōk meram in jetōb eo ilo mour ko aer. Iaar lo ekōjkan an jet iaer lo kōjatdikdik eo ilo ennaan ko, im iaar ekkatak ekōjkan an jerbal n̄an ro jet im meļo̧kļo̧k eō make im ikdeelel ko aō make. Iaar kōm̧m̧ane ta eo Rilo̧mo̧o̧r eo eaar katakin: “Eļan̄n̄e jabdewōt armej e kōņaan ļoor eō, en make kaarmejjete.”3
Reilikļo̧k, ij kile bwe tōmak eo aō eaar eddōkļo̧k raan jab eo kōnke ļeo jeiū eaar letok n̄an eō iien eo em̧m̧an n̄an kōjerbale. Iaar kōjerbale ke kōm kar riit jān jeje ko rekwojarjar, kappukōt armej ro n̄an katakin, kar kwaļo̧k naan in kam̧ool, jerbal n̄an ro jet, im ko eierļo̧k. Ekar ejjeļo̧k am iien n̄an aļ kōjeje raan jab eo, bōtaab būruwō eaar obrak kōn meram eo jān lan̄. Iaar jab lo em̧ool juon bok edik ilo parijet eo, bōtaab iaar en̄jake an tōmak eo aō eddōk āinwōt juon ine in mustard edik.4 Iaar jab joļo̧k raan eo edet āinwōt juon turōj, bōtaab iaar bōk en̄jake ko rem̧m̧an, im kōn jab kile, iaar juon mijenede—em̧ool ilo aō kar jab juon membōr in Kabun̄ in!
IIen ko Rem̧m̧an n̄an Kōkajoorļo̧k M̧ājōļ in Jetōb ko
Kōnke kōn Jepļaaktok eo an gospel eo, jemaron̄ itok n̄an meļeļe ekōjkan an Jemedwōj Ilan̄ jipan̄ kōj kōļapļo̧k menin letok ko ilo jetōb. Enaaj āinwōt eļapļo̧k An naaj letok n̄an kōj iien ko rem̧m̧an n̄an kōļapļo̧k menin letok ko ijello̧kin baj litok wōt n̄an kōj ilo an ejjeļo̧k kijejeto ilo jetōb im kanniōk. Eļan̄n̄e jej jokkuun wōt juon ippān Jetōb eo An, jenaaj ekkatak n̄an kile iien ko rem̧m̧an innām jerbali.
Eļan̄n̄e jej pukōt eļapļo̧k kijenmej, jemaron̄ lo kōj make aikuj in kōjerbale ilo ad kōttar juon uwaak. Eļan̄n̄e jekōņaan bōk eļapļo̧k iakwe n̄an ro rūturid, jemaron̄ kalōke jān jijet turin juon eo ekāāl ilo m̧ōn jar eo. Kōn tōmak ejjeļo̧k oktak: n̄e pere ko rej itok n̄an ļōmņak ko ad, lōke ilo kallim̧ur ko an Irooj renaaj menin aikuj n̄an bun̄ m̧aanļo̧k. Ilo wāween in, jej kōmourur m̧ajōļ in jetōb ko im kōļapilo̧k n̄an un jān kajoor ko ilo mour ko ad.
Enaaj bōlen jab pidodo ilo jinoin, im ilo m̧ool emaron̄ erom juon idajon̄jon̄ eļap. Naan ko an Irooj, kōn rikanaan Moronai, rej jerbal n̄an kōj rainin: “im eļan̄n̄e armej rej itok n̄an Eō Inaaj kwaļo̧k n̄an er aer m̧ōjņo̧. Ij leļo̧k n̄an armej m̧ōjņo̧ bwe ren maron̄ ettā bōro; im Aō jouj ebwe n̄an aolep armej ro rej kōttāik er Im̧aō; bwe eļan̄n̄e rej kōttāik er Im̧aō, im wōr aer tōmak ilo N̄a, innām Inaaj kōm̧m̧an mennin m̧ōjņo̧ ko ren erom kajoor n̄an er.”5
Ij kam̧m̧oolol kōn ļeo jeiū Ivan, eo eaar jab kwaļo̧k wōt gospel eo ippa ak barāinwōt kajju kar kūr eō n̄an mour kake im kile m̧ōjņo̧ ko aō. Eaar jipan̄ eō bōk kūr eo an M̧aajta eo: “Kwōn itok im ļoor eō”6—n̄an etetal āinwōt an kar Rilo̧mo̧o̧r eo etetal, kappukōt āinwōt an Rilo̧mo̧o̧r eo kar kappukōt, im iakwe āinwōt an Rilo̧mo̧o̧r eo iakwe kōj. Allōn̄ ko tokālik, ālkin en̄jake in mijenede eo aō, iaar kāālet n̄an kar peptaij im n̄an jerbale mijen eo aō make.
Jen bōk kūr eo an Būreejtōn Russell M. Nelson im im lukkuun itok n̄an Rilo̧mo̧o̧r eo7 kōn kile m̧ajōļ ko me rej aikuj eļapļo̧k m̧akūtkūt ilo jetōb im jino kōmoururi. Menin ej juon ettōr aitok, juon marathon, ijello̧kin juon ettōr kadu, kōn menin jab meļo̧kļo̧k men ko reddik ak m̧akūtkūt ko ilo jetōb rejjab jem̧ļo̧k me renaaj kōkajoorļo̧k m̧ajōļ ko ilo jetōb raorōk. Eļan̄n̄e jej kōņaan kōļapļo̧k tōmak eo ad, innām jen kōm̧m̧ani men ko raikuji tōmak.
Ij kwaļo̧k aō kam̧ool bwe jej ajri ro nejin Jemedwōj Ilan̄ eo em̧m̧an. Nejin, Jisōs Kraist, ej iakwe kōj. Eaar itok n̄an laļ in n̄an kwalo̧k n̄an kōj iaļ eo innām kar letok An mour n̄an letok n̄an kōj kōjatdikdik. Rilo̧mo̧o̧r eo ej kūr kōj n̄an ļoor waanjon̄ak eo An eweppān, n̄an kōjerbal tōmak eo ad ilo E im Pinmuur eo An, im n̄an kōļapļo̧k aolep menin letok ko ilo jetōb me kar kōjeraam̧m̧an kōj kaki. E ej iaļ eo. En̄in ej aō naan in kam̧ool ilo etan Jisōs Kraist, amen.