Tauhi ʻEku Ngaahi Fekaú
Kuó ke fakakaukau nai, “Te u fakahaaʻi fēfē ki he Tamai Hēvaní ʻoku ou loto moʻoni ke Ne tali ʻeku ngaahi lotú mo tāpuakiʻi au?” Naʻe tuku mai ʻe he Fakamoʻui ko Sīsū Kalaisí ʻa e kií ʻi Heʻene pehē, “Kapau ʻoku mou ʻofa kiate au, fai ʻeku ngaahi fekaú” (Sione 14:15).
ʻI hono fakalea ʻe tahá, ʻoku tau fakahaaʻi ʻetau ʻofa ki he Tamai Hēvaní ʻaki hono tauhi ʻEne ngaahi fekaú.
ʻI he taimi ʻe niʻihi ʻoku ʻikai maʻu e ngaahi talí ʻi he taimi pe founga ʻoku tau ʻamanaki ki aí, pea mahalo ʻe ʻahiʻahiʻi kitautolu ke tau loto foʻi pe taʻofi ʻetau talangofuá. Ka ʻo kapau ʻoku tau faʻa kātaki pea fakafanongo, ʻe tali ʻe he ʻEikí ʻi Heʻene taimi mo e founga pē ʻAʻana. ʻOkú Ne tali maʻu pē ʻa e ngaahi lotu māʻoniʻoní. ʻOkú Ne tāpuekina maʻu pē ʻa e talangofuá (vakai, Mōsaia 2:21–24).
ʻOku akoʻi ʻe he māmaní ʻoku ʻikai ha ngaahi fatongia ʻi he ʻofá. Ka ʻoku moʻoni hono fehangahangaí. ʻOku fakahaaʻi ʻetau ʻofa ki he ʻOtuá ʻi heʻetau loto fiemālie mo e faivelenga ʻi hono tauhi ʻEne ngaahi fekaú.
Naʻe akoʻi ʻe he Fakamoʻuí ʻo pehē, “ʻE fakatauʻatāinaʻi ʻa kimoutolu ʻe he moʻoní” (Sione 8:32). Naʻe toe pehē ʻe he palōfita ko ʻAlamaá “kuo teʻeki ai hoko ʻa e fai angahalá ko e fiefia” ( ʻAlamā 41:10). Pea naʻe akoʻi ʻe he ʻEikí ʻo fakafou he Palōfita ko Siosefa Sāmitá ʻo pehē, “ʻOku ʻi ai ha fono naʻe tuʻutuʻuni pau ʻi he langí ki muʻa ʻi he teʻeki ai ke ʻai ʻa e ngaahi tuʻunga ʻo e māmaní, ʻa ia ʻoku makatuʻunga ki ai ʻa e ngaahi tāpuaki kotoa pē—pea ʻo ka tau ka maʻu ha tāpuaki mei he ʻOtuá, ʻoku tupunga ia ʻi he talangofua ki he fono ʻa ia ʻoku makatuʻunga ia ki aí” (Tokāteline mo e Ngaahi Fuakava 130:20–21).
ʻOku maʻu ʻa e fiefiá, ngaahi tāpuakí, mo e fakahinohinó ʻo fakafou he talangofuá. ʻOku finangalo e Tamai Hēvaní ke ke fiefia mo tauʻātaina koeʻuhí ʻokú Ne ʻofa ʻiate koe, pea ko e ʻuhinga ia ʻokú Ne ʻomi ai e ngaahi fekaú. Ke maʻu e nonga ʻoku ʻikai maʻu ʻi he māmaní, kuo pau ke tau ako ko e fakavaivai ko ia ki he finangalo ʻo e Tamai Hēvaní ʻa e founga pē ki he fiefiá.
ʻOku finangalo e Tamai Hēvaní ke ke maʻu e fiefia taʻengatá. ʻOku loto ʻEne kau palōfitá ke ke maʻu ʻa e fiefia hulu fau. ʻOku mau loto ke mou maʻu e nonga kuo mau maʻu ʻi he muimui ki he Fakamoʻuí. ʻAʻeva ʻi he hala kuó Ne tofá (vakai, “ʻEiki, te U Muimui Atu,” Ngaahi Himí, fika 127). Fili ke ke talangofua. ʻE iku hoʻo talangofua loto fiemālié ki he tauʻatāina mo e fiefia moʻoní.