Ko e Taumuʻa Te ne Liliu ʻEtau Ngāue Fakaetauhí

Neongo ʻoku lahi e ngaahi taumuʻa ʻo e ngāue fakaetauhí, ka ʻoku totonu ke tataki ʻetau ngaahi feinga ʻi he ngāue fakatauhí, ʻe ha holi ke tokoniʻi e niʻihi kehé ke nau maʻu ha ului fakafoʻituitui ʻoku loloto angé pea hoko ʻo tatau mo e Fakamoʻuí.

ʻĪmisi

ministering like the Savior

Vai Moʻui, tā ʻe Simon Dewey

ʻI he taimi ʻoku tau ʻofa ai he niʻihi kehé ʻo hangē ko ia ne fai ʻe he Fakamoʻuí, ʻoku tau fie tokoni leva kiate kinautolu ʻo hangē ko ia naʻá Ne faí. ʻI Heʻene hoko ko e Tauhisipi Leleí, ko Ia ʻa e sīpinga taupotu taha ʻo e ngāue fakaetauhi ʻoku mahuʻingamālié.

ʻI heʻetau fakafenāpasi ʻetau ngāue fakaetauhí kiate Iá, ʻoku mahuʻinga ke manatuʻi naʻe mahulu ange ʻEne feinga ke ʻofeina, poupouʻi, tokoniʻi mo faitāpuekiná, ʻo laka ia ʻi hono feau ʻo e fie maʻu vivilí. Naʻá Ne ʻafioʻi moʻoni ʻenau ngaahi fie maʻu fakaʻahó peá Ne manavaʻofa ki heʻenau faingataʻaʻiá. Ko ia naʻá Ne fakamoʻui, fafanga, fakamolemoleʻi, mo akonekina kinautolu. Ka naʻe mahulu hake ʻa e meʻa ia naʻá Ne fie maʻu ke faí, ʻi hono tokangaekina pē ʻo e fie maʻu vivili he ʻaho ní (vakai ki he Sione 4:13–14). Naʻá Ne finangalo ke muimui ange e niʻihi ne nau feʻaó kiate Ia (vakai ki he Luke 18:22; Sione 21:22), ʻiloʻi Ia (vakai ki he Sione 10:14; Tokāteline mo e Ngaahi Fuakava 132:22–24), pea nau aʻusia ʻenau taumuʻa fakalangí (vakai ki he Mātiu 5:48). ʻOku moʻoni e meʻa tatau he ʻahó ni (vakai ki he Tokāteline mo e Ngaahi Fuakava 67:13).

ʻOku lahi e ngaahi founga kehekehe te tau lava ʻo tokoni ai ke tāpuekina e niʻihi kehé, ka ʻi he taimi ʻoku hoko ai e tokoniʻi ʻo e niʻihi kehé ke nau ʻiloʻi e Fakamoʻuí mo hoko ʻo hangē ko Iá ko e taumuʻa aofangatuku ʻo ʻetau ngāue fakaetauhí, te tau ngāue leva ke aʻu ki ha ʻaho he ʻikai ke tau toe akoʻi ai hotau kaungāʻapí ke nau ʻiloʻi e ʻEikí, he te tau ʻiloʻi kotoa Ia (vakai ki he Selemaia 31:34).

Naʻe Mahulu Ange Tokanga ʻa e Fakamoʻuí ʻi he Fie Maʻu Vivilí

Ne ngāue lahi ha kakai ʻe niʻihi ke ʻomi honau kaungāmeʻá kia Sīsū ke fakamoʻui mei he mahaki teté. Ko hono aofangatukú, naʻe fakamoʻui ʻa e tangatá ʻe he Fakamoʻuí, ka naʻá Ne mahuʻingaʻia ange ʻi hono fakamolemoleʻi ʻene ngaahi angahalá (vakai ki he Luke 5:18–26).
ʻI hono ʻomi ʻe he kakaí ha fefine feʻauaki ki he Fakamoʻuí, naʻe hanga ʻe heʻene mapuleʻi ʻEne fakamalaʻiaʻi iá, ʻo fakahaofi fakaesino ʻene moʻuí. Ka naʻá Ne fie fakahaofi fakalaumālie foki ia, ʻo ne folofola ange ke “ʻalu, pea ʻoua ʻe toe fai angahala” (vakai ki he Sione 8:2–11).
Naʻe ʻoatu e fekau ʻa Mele mo Māʻata kia Sīsū ʻo kole ke Ne fakamoʻui ʻa Hono kaungāmeʻa ko Lāsalosí. Neongo kuo fakamoʻui ʻe Sīsū ha kakai tokolahi, ka naʻá Ne fakatoloi pē ʻEne hāʻele ki aí kae ʻoua kuo mate ʻa Lāsalosi. Naʻe ʻafioʻi ʻe Sīsū e meʻa ne fie maʻu ʻe he fāmilí, ka ʻi hono fokotuʻu ʻo Lāsalosi mei he maté, naʻá Ne fakamālohia ai ʻenau fakamoʻoni ki Hono tuʻunga fakaʻotuá (vakai ki he Sione 11:21–27).

Ko e hā ha toe ngaahi sīpinga te ke lava ʻo tānaki ki he lisi ko ʻení?

Ko e Hā ʻe Lava Ke Tau Faí?

Kapau ko ʻetau taumuʻá ke tokoniʻi e niʻihi kehé ke nau hoko ʻo hangē ko e Fakamoʻuí, ʻe liliu ai e founga ʻetau ngāue fakaetauhí. Ko ha ngaahi founga ʻeni ʻe lava ke tataki ai ʻe he mahino ko ʻení ʻetau ngaahi feinga ngāue fakaetauhí.

Fakakaukau 1: Fakafehokotaki e Tokoní ki he Fakamoʻuí

ʻOku mahuʻinga ʻetau faifeinga kotoa ke fai leleí, ka te tau lava ʻo fekumi ki ha ngaahi faingamālie ke fakalahi ai ʻetau tokoní ʻaki ʻetau fakafehokotaki ia ki he Fakamoʻuí. Hangē ko ʻení, kapau ʻoku puke ha fāmili ʻokú ke ngāue fakaetauhi ki ai, ʻe ala tokoni ha kiʻi meʻatokoni, ka ʻe ala liuliunga hoʻo fakahaaʻi faingofua hoʻo ʻofá, ʻaki hoʻo fakamoʻoni ki he ʻofa ʻa e Fakamoʻuí kiate kinautolú. ʻE ala fakahoungaʻi hoʻo tokoni ʻi he ngaahi ngāue ʻi tuʻá, kae mahalo ʻe toe mahuʻingamālie ange ia ʻo ka fai fakataha mo ha tāpuaki ʻo e lakanga fakataulaʻeikí.

Naʻe akoʻi mai ʻe ʻEletā Nila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻE lava ʻe ha taha loto lelei ʻo tokoniʻi ha taha ke ngaahi ha foʻi vaʻe, ʻave hano kaungā-loki ki he toketaá, maʻu meʻatokoni hoʻatā mo ha taha ʻoku loto mamahi, pe malimali mo fakalea fiefia holo ki ha taha.

“Ka ʻe fakanatula pē e fakalahi atu e ngaahi ngāue tokoni mahuʻinga ko ʻení, ʻe ha taha ia ʻoku muimui ki he ʻuluaki fekaú.”¹

Fakakaukau 2: Tukutaha hoʻo Tokangá ʻi he Hala ʻo e Fuakavá

ʻI he fuofua lea ʻa Palesiteni Lāsolo M. Nalesoni ki he kāingalotú heʻene hoko ko ha Palesiteni ʻo e Siasí, naʻá ne pehē ai, “Nofo maʻu ʻi he hala ʻo e fuakavá.” ʻE hanga ʻe hono fakahoko mo tauhi ʻo e ngaahi fuakavá, ʻo “fakaava e matapā ki he tāpuaki fakalaumālie mo e faingamālie kotoa pē ʻe ala maʻú.”²

ʻI heʻetau hoko ko e Kau Māʻoniʻoni ʻi he Ngaahi ʻAho Kimui Ní, ʻoku papitaiso mo hilifakinima kitautolu pea tau maʻu e meʻafoaki ʻo e Laumālie Māʻoniʻoní. ʻOku maʻu e lakanga fakataulaʻeikí ʻe he kau mēmipa tangata moʻui tāú. ʻOku tau ō ki he temipalé ke maʻu hotau ʻenitaumení pea mo silaʻi fakataha hotau ngaahi fāmilí ke taʻengata. ʻOku mahuʻinga e ngaahi ouau faifakamoʻui ko ʻení mo e ngaahi fuakava ʻoku kaunga ki aí, ke tau hoko ʻo hangē ko Iá kae lava ke tau nofo mo Ia.

Te tau lava ʻo fai ha fatongia mahuʻinga ʻi hono tokoniʻi e niʻihi kehé ʻi he hala ko iá, ʻaki ʻetau tokoniʻi kinautolu ke nau tauhi ʻenau ngaahi fuakavá mo teuteu ke fai ha ngaahi fuakava ʻi he kahaʻú.³ Te ke tokoni fēfē ki he fakafoʻituitui pe ngaahi fāmili ʻokú ke ngāue ki aí, ke nau maʻu e ouau hoko ʻoku nau fie maʻú? ʻE ala ʻuhinga ʻeni ki he tokoni ke mateuteu ha tamai ke ne papitaiso hono ʻofefiné, fakamatalaʻi e ngaahi tāpuaki ʻo e fuakava hoko ʻe faí, pe vahevahe e ngaahi founga ke maʻu ai ha aʻusia ʻoku mahuʻingamālie angé ʻi hono fakafoʻou ʻetau ngaahi fuakavá lolotonga hono maʻu ʻo e sākalamēnití.

ʻĪmisi

invite and encourage

Ko Kalaisi mo e Talavou Pule Koloaʻiá, fai ʻe Heinrich Hofmann

Fakakaukau 3. Fakaafeʻi mo Poupouʻi

Kapau ʻe feʻunga ke fai, fealeaʻaki mo e niʻihi ʻokú ke tokangaʻí, ʻo fekauʻaki mo ʻenau fakauluí mo ʻenau feinga ke anga faka-Kalaisi angé. ʻAi ke nau ʻiloʻi honau mālohinga ʻokú ke mātā mo fakaʻofoʻofaʻia aí. Feinga ke ʻiloʻi e tafaʻaki ʻoku nau ongoʻi ʻe lava ke nau fakatupulakí pea talanoa ki he founga te ke ala tokoni aí. (Ki ha fakamatala lahi ange ʻi he fealeaʻaki mo kinautolu ʻokú ke ngāue fakatauhi ki aí, vakai ki he “Fealēleaʻaki Fekauʻaki mo ʻEnau Ngaahi Fie Maʻú,” Liahona, Sepitema 2018, 6–9.)

ʻOua ʻe manavasiʻi ke fakaafeʻi kinautolu ke nau muimui ki he Fakamoʻuí pea tuku ke Ne tokoniʻi kinautolu ke nau aʻusia honau tuʻunga fakalangí. ʻE lava ke liliu moʻui e fakaafe ko ʻení, ʻi he taimi ʻe fakahaaʻi fakataha ia mo hoʻo falala kiate kinautolú, kae pehē ki hoʻo tui kiate Iá.

Ngaahi Founga ʻe Ono Te Tau Lava ʻo Tokoniʻi e Niʻihi Kehé ke nau Fakalakalaka ke Aʻu kia Kalaisí

Ko e ngaahi tokoni ʻeni ki hono poupouʻi e niʻihi kehé ke fakalakalaka e moʻuí ʻi he hala ʻo e fuakavá. (Vakai Malangaʻaki ʻEku Ongoongoleleí, vahe 11, ki ha toe ngaahi fakakaukau.)

Vahevahe. Lea moʻoni mo fakahangatonu kau ki he founga kuo tokoniʻi ai koe ʻe he Fakamoʻuí ʻi hoʻo feinga ke ofi ange kiate Iá, ʻi hono moʻuiʻaki e ngaahi tefitoʻi moʻoni ʻo e ongoongoleleí neongo e ngaahi faingataʻá.
Palōmesi ange ha ngaahi tāpuaki. ʻOku fie maʻu ʻe he kakaí ha ʻuhinga mahuʻinga ke nau liliu ai, ʻo mahulu hake he ngaahi ʻuhinga ke ʻoua te nau liliú. ʻE lava ke ʻomi ʻe he ngaahi tāpuaki ʻoku fekauʻaki mo ha ngāué, ha fakalotolahi ʻoku mālohí (vakai ki he Tokāteline mo e Ngaahi Fuakavá 130:20–21).
Fakaafe. ʻOku hanga ʻe hono moʻuiʻaki e tefitoʻi moʻoni ʻo e ongoongoleleí, ʻo ʻomi ha fakamoʻoni ʻoku moʻoní (vakai ki he Sione 7:17) pea ʻoku iku ia ki ha ului ʻoku loloto angé.⁴ ʻE ala kau ʻi he meimei fengāueʻaki kotoa pē ha fakaafe faingofua ke fai ha meʻa ʻe tokoni ke nau tupulaki ai.
Palani fakataha. Ko e hā ʻoku fie maʻu ke hoko maʻanautolu ke ola lelei ai ʻenau tauhi ʻenau tukupā ke liliú? Te ke lava fēfē ʻo tokoni? ʻOku kau nai ai ha taimi tukupau?
Poupou. Kapau ʻe tokoni, pea faʻufaʻu ha founga fetokoniʻaki ko ha kakai te nau lava ʻo tokoni ke fakalotolahia e fakafoʻituituí ke ne lavameʻa. ʻOku tau fie maʻu kotoa ha taha ke ne fakaʻaiʻai kitautolu.
Muimuiʻi. Vahevahe maʻu pē ʻa e fakalakalaká. Tukutaha hoʻo tokangá ʻi he palaní kae fakaleleiʻi ʻo ka fie maʻu. Faʻa kātaki, vilitaki, mo loto lahi. ʻE fie maʻu ha taimi kae hoko e liliú.

Fakaafe ke Ngāue

Fakakaukau ki hoʻo ngaahi feinga ngāue fakaetauhí—ʻo tatau pē pe ʻoku siʻisiʻi pe lahi—ʻe lava tokoniʻi ai e niʻihi kehé ke toe loloto ange ʻenau uluí pea nau hoko ai ʻo hangē ko e Fakamoʻuí.

Vahevahe Hoʻo Ngaahi Aʻusiá

ʻOmi hoʻo ngaahi aʻusiá ʻi hoʻo ngāue fakaetauhi ki he niʻihi kehé pe ʻi heʻenau ngāue fakaetauhi atu kiate koé. ʻAlu ki he liahona.lds.org pea lomiʻi ʻi he “Submit an Article or Feedback.”