Kapau ʻOku Mou ʻOfa Kiate Au
Ko e kaveinga fakataʻu ʻa e toʻu tupú ki he 2019 ko ha ui ia ke ngāue—ko ha fakaafe fakataautaha mei hotau Fakamoʻuí. ʻOku mou loto kotoa ki ai? ʻOku mou ʻofa kiate Ia? ʻOku mou loto fiemālie ke molomolo muivaʻe kiate Ia?
Naʻe fai ʻe hotau Fakamoʻui ko Sīsū Kalaisí ha meʻa maʻatautolu mahalo he ʻikai ke tau lava fai maʻatautolu. Pea ko e hā ʻokú Ne fie maʻu meiate kitautolú? ʻOkú Ne kole mai ke tau tauhi ʻEne ngaahi fekaú kae lava ke tāpuekina kitautolu ke tau maʻu maʻu pē Hono Laumālié (vakai, Molonai 4:3).
Ko e ngaahi fekaú ko ha meʻaʻofa ia ʻo e ʻofa. Naʻe folofola ʻa e Fakamoʻuí ʻo pehē, “Kapau ʻoku mou ʻofa kiate au, fai ʻeku ngaahi fekaú,” ka ko e hā hono ʻuhingá? Koeʻuhí ʻokú Ne ʻofa ʻiate KOE! ʻOkú Ne finangalo ke ke fiefia. ʻOkú Ne finangalo ke fonu ho moʻuí ʻi he fiefia mo e ngaahi faingamālie taʻefakangatangata. ʻOkú Ne finangalo ke ke hao mo maluʻi koe mei he ngaahi kovi ʻo e māmaní. ʻOkú Ne finangalo ke lilingi hifo e ngaahi tāpuaki lahi fau kiate koe ʻo “ʻikai ha potu ʻe faʻa hao ia ki ai” (3 Nīfai 24:10). ʻOkú Ne finangalo ke ke toe foki hake pea toe nofo fakataha mo Ia pea maʻu ʻa e kotoa ʻo e ngaahi tāpuaki ʻa e Tamai Hēvaní kuo talaʻofa maí.
Manatuʻi maʻu pē hono lahi ʻo e ʻofa ʻa e Tamai Hēvaní ki Heʻene fānaú. ʻOku haohaoa ʻEne ʻofa kiate koé. Te ke lava ʻo fakahaaʻi hoʻo ʻofa kiate Iá ʻaki hono tauhi ʻEne ngaahi fekaú. ʻE ʻomi ʻe hoʻo ngaahi ngāue angatonú ha ngaahi tāpuaki lahi kiate koe pea mo kinautolu ʻoku mou feohí.
Hangē ko e lea ʻa hotau palōfita ko Palesiteni Lāsolo M. Nalesoní: “ʻOku mau fie maʻu koe ke ke kau mo kimautolu ʻi he kau tau kei talavou ʻa e ʻEikí. He ʻikai tatau ia ʻo kapau he ʻikai ke ke kau mai!” Naʻá ne fakaafeʻi kimoutolu ke mou “makehe mo kehe mei he māmaní” ʻaki hono moʻui ʻaki e ngaahi tuʻunga moʻui ʻi he Ki Hono Fakamālohia ʻo e Toʻu Tupú pea mo hono tauhi e ngaahi fekaú—ke ke “fotu, lea, ngāue mo teuteu ʻo hangē ha ākonga moʻoni ʻa Sīsū Kalaisí” (“ʻAmanakiʻanga ʻo ʻIsilelí” [fakataha lotu fakamāmani lahi ʻa e toʻu tupú, 3 Sune 2018], 8, HopeOfIsrael.lds.org).
ʻI hoʻo faifeinga ke talangofua ki he ʻEikí mo ʻEne kau palōfitá, ʻe fakafonu koe ʻe he mālohi ʻo e Laumālie Māʻoniʻoní ʻaki e ʻofa ʻa e ʻOtuá mo fakamoʻoniʻi atu kiate koe ʻa ho tuʻunga fakalangi ko e foha pe ʻofefine ʻo e ʻOtuá. ‘Oku tupulaki e ngaahi tāpuaki ko iá ʻi hoʻo faifeinga ke moʻui angamāʻoniʻoní. ʻOku falala atu e ʻEikí mo e palōfitá kiate koe. ʻOkú Na ʻofeina koe. ʻOku mau talaʻofa atu ʻoku maʻu e loto falala lahí, tuʻunga pau fakatāutahá, mo e nongá ʻi hoʻo talangofua mo tauhi e ngaahi fekaú.