Ngaahi Fehuʻi mo e Talí
“Kapau ʻoku ou ongoʻi ʻo hangē ʻoku mole atu ʻa ʻeku tuí, ko e hā te u fai ke toe maʻu ai iá?”
Vakai ki he Ngaahi Folofolá
Kapau ʻoku faingataʻa kiate au ke u ongoʻi e Laumālié, ʻoku tokoni ʻeku vakai ki he folofolá mo sio ki he tui ʻoku maʻu ʻe he taha kotoa peé. ʻOkú ne ʻomi ʻa e tuí kiate au. Mahalo pē naʻa ʻoku fuʻu nounou hoʻo ngaahi lotú. Feinga ke toe fakamātoato ange hoʻo fai iá pea ʻe tokoniʻi koe ʻe he Tamai Hēvaní ke toe maʻu hoʻo tuí.
Kulisi B., taʻu 14, ʻOlikoni, USA
Tanumaki ʻa e Tenga ʻo e Tuí
ʻOku ou ʻilo te u lava ʻo lotu ki he Tamaí mo kole kiate Ia ke Ne tokoniʻi au ke tauhi maʻu ʻa e fuʻu ʻakau ʻo e tuí ʻoku ou fakatupulakí. Kuo pau ke u fakahoko ʻa e ngaahi meʻa ʻoku fie maʻu ke tanumaki ai iá, hangē ko hono lau ʻo e folofolá, fekumi ki ha ngaahi aʻusia fakalaumālie, tānaki hoku ngaahi tāpuakí, mo kole ha tokoni mei hoku fāmilí. ʻI he founga ko iá, ʻe lava ke toe tupulaki ʻeku tuí. He ʻikai hoko ia ʻi ha ʻaho pē ʻe taha—ko ha ngāue ia ʻoku fie maʻu ki ai ha taimi lahi. ʻE fie maʻu ke u faʻa kātaki mo falala ki he ʻEikí.
ʻIlaiase B., taʻu 18, Menitosa, ʻĀsenitina
Mou Ngāueʻi Fakataha Ia
ʻI he taimi ʻoku ou ongoʻi ai ʻo hangē ʻoku mole atu ʻeku tuí, ʻoku ou talanoa ki heʻeku fineʻeikí mo ʻeku tangataʻeikí, pea mau ngāueʻi fakataha ia. Hili iá, ʻoku mau faʻa hiva ha hiva fakatupulaki ʻi he taimi ʻe niʻihi koeʻuhí ke mau ongoʻi ʻa e Laumālié.
ʻEmelī C., taʻu 15, Kolōlato, USA
Fehuʻi ki Hoʻo Ongomātuʻá
ʻIkai ngata ʻi he lotu fakahangatonu ki he Tamai Hēvaní, te tau lava ʻo fehuʻi ki heʻetau ongomātuʻá ʻa e founga ke tau lava ai ʻo foki hake kiate Ia mo toe maʻu ʻetau tuí.
ʻIlaiase S., taʻu 12, Paisanitū, ʻUlukuai
Lotu, Kumi Tokoni, pea Lau
Naʻá ku fakahoko ha meʻa ʻe tolu ke maʻu [ʻeku tuí] he ko ha taha au ne fakaʻauʻauhifo ʻeku tuí. ʻUluakí, naʻá ku lotu. Naʻe ngāue lelei ʻeku lotu ke maʻu ha ivi mo ʻilo e meʻa ʻoku totonu ke u faí. Uá, naʻá ku talaange ia ki hoku ngaahi kaungāmeʻa ofí, pea naʻa nau tokoniʻi lahi au ʻi heʻeku fie maʻu iá. Tolú, naʻá ku lau e folofolá Ko e lahi taha ʻo e folofolá ʻoku fekauʻaki mo e tuí pea ʻe lava ia ʻo tokoni ke tau toe maʻu ia.
Siaki J., taʻu 14, Fololita, USA