Ko e Feituʻú ʻEni
Simeon Nnah
Aba, Naisīlia
Tā fakatātāʻi ʻe Allen Garns
Naʻe akoʻi au ʻe heʻeku tangataʻeikí, ko ha Kalisitiane faivelenga, ke u tui kia Sīsū Kalaisi. Naʻe tokonia au ʻe he tui ko iá ke u hao moʻui ʻi he tau fakalotofonua taʻu ʻe tolu ʻi Naisīlia ʻi he 1960 tupú, lolotonga ʻeku kei ʻi he kau taú. Ka neongo ia, naʻe kamata ke u puputuʻu kimui ange pea ʻikai ke u toe ʻalu ki he lotú.
ʻI heʻeku haʻu ʻi he 1981 ke ako ʻi he ʻIunaiteti Siteití, naʻá ku ongoʻi naʻá ku fie maʻu ʻa e ʻOtuá ʻi heʻeku moʻuí. ʻI ha taʻu ʻe ua naʻá ku ʻalu ai ki ha ngaahi siasi kehekehe ʻi Positoni, Masasūseti, ka naʻe ʻikai fakamānako ha siasi kiate au. Naʻe ʻikai ke u ongoʻi ʻa e Laumālié, ko ia naʻe ʻikai ke u toe ʻalu ki ha lotu.
Naʻe ʻikai fuoloa mei he haʻu hoku uaifi ko Meipoló, mei Naisīlia ʻi he 1984, naʻe kamata ke u maʻu ha loto vilitaki ke u toe ʻunu ofi ange ki he ʻOtuá mo kau ki ha siasi. Naʻe ʻikai ʻilo ʻe haʻaku kaungāmeʻa naʻe ʻeva mai mei Naisīlia ʻoku ou fekumi ki ha siasi, ka naʻá ne fakamatala mai fekauʻaki mo ha siasi naʻe fanongo ai ʻoku ʻi ai ʻenau tohi ʻoku ui ko e Tohi ʻa Molomoná.
Hili iá, naʻe hoko atu ʻeku fekumi ki ha siasí. Naʻá ku ʻiloʻi ha siasi naʻe ui ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe maʻu ʻeku tokangá ʻi he foʻi lea māʻoniʻoní. Naʻe ʻikai ke u ʻiloʻi ʻoku ʻi ai ha siasi ʻoku ui honau kau mēmipá ko e kau māʻoniʻoní. Naʻá ku fakapapauʻi ʻi he Sāpate ko iá ke vakaiʻi ia.
Naʻe hiva ʻe he haʻofangá ʻi he houalotu sākalamēniti naʻá ku ʻalu ki aí, ha ngaahi himi ʻi ha founga ʻapasia, naʻe tāpuakiʻi ʻe he kau taulaʻeikí ʻa e maá mo e vaí, pea naʻe tataki ʻa e polokalamá ʻi he maau mo e fakamātoato. Hili iá, ʻi heʻeku lue ki he fakafaletoló mo fakakaukau ki he polokalamá, naʻá ku ongoʻi hoku hingoá.
“Simione,” naʻe pehē ʻe he leʻo ʻo e Laumālié, “ko e feituʻú ʻeni.”
ʻI he taimi ko iá, naʻe fakafetaulaki mai ha ongo faifekau. Naʻá na fakafeʻiloaki mai kinaua mo e Tohi ʻa Molomoná. Naʻá ku sio kiate kinaua peá u pehē ange, “ʻOku ʻikai ke u ʻilo ha meʻa fekauʻaki mo e Tohi ʻa Molomoná, ka ʻoku ou ʻilo ʻa e Tohi Tapú. ʻOku ou mateuteu.”
Naʻe kamata ke na akoʻi mai e palani ʻo e fakamoʻuí. Ne siʻi hifo ʻi he māhina ʻe taha mei ai, naʻá ku papitaiso. Naʻe kau hoku malí ki he Siasí kimui ange hili ha kiʻi taimi siʻi. Hili ha ngaahi taʻu siʻi mei ai, naʻá ma sila ʻi he Temipale Uasingatoni D.C. pea naʻe sila mo ʻema fānau ʻe toko nimá kiate kimaua.
Kuo fakahā mai ha ngaahi meʻa lahi kiate au ʻi he temipalé, ka kuo tuʻo lahi ʻeku fakapapauʻi e ngaahi lea naʻá ku ongoʻi ʻi he fuofua ʻaho naʻá ku ʻalu ai ki he lotú ʻi ha fakahā ʻi he temipalé: “Ko e feituʻú ʻeni.” Kuo liliu ʻe he mālohi ʻo e kupuʻi lea ko ia mei he Laumālie Māʻoniʻoní ʻeku moʻuí ʻo taʻengata pea mo e moʻui hoku uaifí mo e fānaú.