Hoko Atu e Tupulaki ʻa e Siasí ʻi Tongá
Naʻe fakataha mai e Kāingalotu ʻi Tongatapú ki he Fale Mamataʻanga Sipoti ʻi ʻAtelé ʻi Nōvema ʻo e taʻu kuo ʻosí, ke fokotuʻu foʻou e Siteiki Nukuʻalofa Tonga Capital, mei he Siteiki Nukuʻalofa Tonga Noaté mo e Siteiki Nukuʻalofa Tonga Harbour, pea mo toe fokotuʻutuʻu foʻou e Siteiki Nukuʻalofa Tonga Noaté.
Naʻe tokangaʻi e konifelenisí ʻe ʻEletā Craig A. Cardon ʻo e Kau Fitungofulú mo e Tokoni ʻUluaki ʻi he Kau Palesitenisī ʻo e ʻĒlia Pasifikí, pea kau fakataha mo ia ʻa ʻEletā ‘Aisake Tukuafu ʻo e Kau Fitungofulú. Naʻe kau fakataha atu ʻa Sisitā Deborah Cardon mo hono husepānití.
ʻI he lea ʻa ʻEletā Kātoní, naʻá ne akonaki ai ʻo kau ki he natula taʻengata ʻo e fāmilí, ʻo ne pehē, “Ko e ngāue mo e nāunau ʻo e Tamai Hēvaní ke ʻfakahoko e moʻui taʻe-faʻa-mate mo e moʻui taʻengata ʻa e tangatá’ (Mōsese 1:39). ʻOku hoko ʻeni ʻi he moʻui angamāʻoniʻoni ʻEne fanaú pea mo hono fakatahaʻi honau ngaahi fāmilí ʻo taʻengata ʻi he ngaahi temipale māʻoniʻoní. Tatau ai pē pe ko e hā hotau ngaahi fatongia ʻi he Siasí pe ʻi he moʻuí, ko e meʻa mahuʻinga tahá hotau fatongia fakafāmilí mo hono moʻuiʻaki e ongoongoleleí ʻi hotau ʻapí.”
Ko e kau taki foʻou ʻo e Siteiki Nukuʻalofa Tonga Noaté, ko Tali Tupou, ko e Palesitení; Samuela Fonua, ko e Tokoni ʻUluakí; pea mo ʻIsileli V. Taufa, ko e Tokoni Ua.
Naʻe uiuiʻi foki ki he Siteiki Nukuʻalofa Tonga Capital foʻou ne toki fokotuʻú, ʻa Ian Claude Tuihalangingie, ko e Palesiteni; ʻĀnau Vuna Hala, ko e Tokoni ʻUluaki; pea mo Daniel Fredrick Taumoepeau, ko e Tokoni Ua.
Naʻe lea ʻa ʻEletā Tukuafu ʻo poupouʻi e kāingalotu ʻo e Siasí, ʻo ne pehē, “ʻOku mahuʻinga ke mahino kiate kitautolu e foʻi lea ko e ‘KUO PAU’, ʻo hangē ko ʻene hā ʻi he folofolá. Ko e ‘KUO PAÚ’ ko ha fatongia, ko ha fie maʻu pea mo ha mālohi ke fai ha meʻa. ʻE hanga ʻe he founga mo e meʻa te tau fai ʻaki e mahino ko ʻení, ʻo liliu e anga ʻetau fakakaukaú pea lava ke tau ngāue lelei ange ai ʻi he Siasí.”