Talafungani ʻo e Ongoongoleleí
Ko e Pongipongi Sāpate Fakaʻofoʻofa Ko Iá
Mei ha lea ʻi he konifelenisi lahi ʻo ʻOkatopa 2006.
ʻI he ʻaho ko iá, naʻe veteki ʻe he ʻEiki kuo toetuʻú e ngaahi haʻi ʻo e maté. Naʻá Ne tuʻu hake mei he fonualotó ʻo Ne ikuna nāunauʻia ko e Fakamoʻui ʻo e faʻahinga kotoa ʻo e tangatá.
ʻOku tau ʻilo e ʻuhinga ʻo e Toetuʻú—ko hono toe fakatahaʻi ia ʻo e laumālié mo e sinó ʻi hono tuʻunga haohaoá. …
Te ke lava nai ʻo sioloto ki ai? Pe ne mei fēfē ke tau moʻui ʻo taʻengata ʻi hotau sino kei talavoú? ʻIkai ha mahamahaki, ʻikai ha mamahiʻia, ʻikai ha mafasia ʻi he ngaahi mahaki ʻoku tau faʻa moʻua ai ʻi he moʻui fakamatelié?
Ko e Toetuʻú ʻa e uho ʻo ʻetau tui faka-Kalisitiané. …
… ʻI he toe tuʻu ʻa e Fakamoʻuí mei he fonualotó, … naʻá Ne fai ha meʻa he ʻikai toe lava ʻe ha taha ʻo fai. Naʻá Ne maumauʻi e ngaahi haʻi ʻo e maté, ʻo ʻikai Maʻana pē ka kiate kinautolu kotoa pē kuo moʻuí—ʻa e angatonú mo e taʻeangatonú. …
… Naʻá Ne fakaʻatā e meʻaʻofa ko iá maʻá e tokotaha kotoa pē. Pea ʻi he ngāue fakaʻeiʻeiki ko iá, naʻá Ne fakafiemālieʻi ʻa e fuʻu mamahi fau, naʻe tō loloto ki he loto ʻo kinautolu kuo mole honau ngaahi ʻofaʻangá.
ʻOku ou fakakaukau atu ki he fakapoʻuli ʻo e ʻaho Falaite ko ia naʻe hiki hake ai ʻa Kalaisi ʻi he funga kolosí. …
… Naʻe ngalulu pea fakapoʻuli ʻa e māmaní. …
Naʻe fiefia ʻa e kau tangata kovi ko ia naʻa nau feinga ke toʻo ʻEne moʻuí. …
Naʻe mahae ʻa e veili ʻo e temipalé ʻi he ʻaho ko iá.
Naʻe fakatou lōmekina ʻa Mele Makitaline mo Mele, faʻē ʻa Sīsuú, ʻi he mamahí. … Kuo tautau mei he kolosí ʻo ʻikai ke toe ngaue ʻa e tangata māʻongoʻonga naʻá na fakatou ʻofa ai mo fakaʻapaʻapaʻí. …
… Naʻe mamahi ʻa e kau ʻAposetoló. Ko Sīsū, honau Fakamoʻuí—ʻa e tangata naʻe ʻaʻeva ʻi he fukahi vaí mo fokotuʻu ʻa e maté—kuó Ne moʻulaloa ki he kau tangata angahalá. …
Ko ha ʻaho Falaite ia naʻe fonu ʻi he mamahi fau pea hulu ʻo tō loloto. …
ʻOku ou pehē ko e Falaite fakapoʻuli taha ia talu mei he kamataʻanga ʻo e hisitōlia ʻo e māmaní.
[Ka] naʻe ʻikai fuoloa e siva ʻa e ʻamanakí he naʻe vete ʻe he ʻEikí e ngaahi haʻi ʻo e maté ʻi he ʻaho Sāpaté. Naʻá Ne tuʻu hake mei he fonualotó ʻo Ne ikuna nāunauʻia ko e Fakamoʻui ʻo e faʻahinga kotoa ʻo e tangatá.
Pea ʻikai hano taimi kuo holoholoʻi ʻa e mata naʻe tafe taʻetuku mei ai ʻa e loʻimatá. Ko e loungutu naʻe lotu fanafana ʻi he taʻe ʻi ai ha ʻamanaki mo e lotomamahí, kuo nau fakafonu e ʻataá ʻaki ʻa e fakafetaʻi fakaofo, he naʻe tuʻu ʻi honau ʻaó ʻa Sīsū ko e Kalaisí, ko e ʻAlo ʻo e ʻOtua moʻuí … ko ha fakamoʻoni ia ko e maté ko ha kamataʻanga pē ʻo ha moʻui foʻou mo fakaofo.
ʻE takitaha ʻi ai pē hotau ngaahi ʻaho Falaite—ʻa e ngaahi ʻaho ko ia ʻoku hangē ka movete ai ʻa e māmaní pea movetevete fakakongokonga ʻiate kitautolu. …
Ka ʻoku ou fakamoʻoni kiate kimoutolu ʻi he huafa ʻo e toko Taha naʻá Ne ikunaʻi ʻa e maté—ʻe hoko mai ʻa e ʻaho Sāpaté. ʻE hoko mai ʻa e ʻaho Sāpaté, lolotonga e fakapoʻuli lōlō hotau mamahí.
Neongo ʻetau mamahí … ka ʻe hoko mai ʻa e Sāpaté. Neongo pe ʻe hoko mai ʻi he moʻuí ni pe ʻi he moʻui kahaʻú, ka ʻe hoko mai ʻa e Sāpaté.
ʻOku ou fakamoʻoni atu kiate kimoutolu ʻoku ʻikai ko ha fananga pē ʻa e Toetuʻú. ʻOku tau maʻu ʻa e ngaahi fakamoʻoni fakataautaha ʻo kinautolu naʻa nau mamata kiate Iá. Naʻe lauiafe ha kakai ʻi he Maama Motuʻá mo e Maama Foʻoú ne nau fakamoʻoni ki he Fakamoʻui kuo toe tuʻú. Naʻa nau ala ki he ngaahi matakafo ʻi Hono ongo toʻukupú, toʻukupu kelekelé, mo Hono vakavaká. …
Hili e Toetuʻú, naʻe maʻu ʻe he kau ākongá ha moʻui foʻou. Naʻa nau fononga ʻi he funga ʻo e māmaní … ʻo fakahaaʻi mālohi ko Sīsū ʻa e Kalaisí, ko e ʻAlo ʻo e ʻOtuá kuo toetuʻú.
Naʻe mate fakamāʻata hanau tokolahi, ne nau kei fakamoʻoniʻi pē e toe tuʻu ʻa Kalaisí ʻi heʻenau maté.
Naʻe liliu ʻe he Toetuʻú e moʻui ʻa kinautolu ne nau fakamoʻoni ki aí. ʻIkai ʻoku totonu ke ne liliu haʻatautolú?
Te tau toe tuʻu kotoa pē mei he faʻitoká. …
Te tau toe fakataha mo kinautolu naʻa tau ʻofa aí koeʻuhí pē ko e moʻui pea mo e feilaulau taʻengata ʻa e Fakamoʻui ʻo e māmaní.
… ʻI he ʻaho ko iá te tau fiefia ʻi hono ikunaʻi ʻe he Mīsaiá e meʻa kotoa pē ka tau lava ʻo moʻui taʻengatá.
Koeʻuhí ko e ngaahi ouau toputapu ʻoku tau maʻu ʻi he ngaahi temipale māʻoniʻoní, he ʻikai toe lava ke fakamāvahevaheʻi ʻe heʻetau mavahe mei he moʻui fakamatelie nounou ko ʻení hotau ngaahi vā fetuʻutaki kuo fakamaʻu fakataha ʻaki e ngaahi afo kuo haʻi taʻengatá.
Ko ʻeku fakamoʻoni molumalú ia ʻoku ʻikai ko e maté ʻa e ngataʻanga ʻo e moʻuí. …
Fakatauange pē ʻe mahino kiate kitautolu mo tau moʻui houngaʻia ʻi he ngaahi meʻaʻofa mahuʻinga ʻoku tau maʻu ko e ngaahi foha mo e ngaahi ʻofefine ʻo ha Tamai Hēvani ʻofa, pea mo e talaʻofa ʻo e ʻaho fakaʻofoʻofa ko ia te tau toe tuʻu lāngilangiʻia kotoa ai mei he fonualotó.
… Neongo pe ʻe fakapoʻuli fēfē hotau Falaité, ka ʻe hoko mai ʻa e Sāpaté.