Te U Fakamālohia Fēfē ʻEku Ako Folofolá?
Sarah Keenan
Utah, USA
Tā fakatātaaʻi ʻe Bradley Clark
Naʻe hili ha māhina ʻe tolu ʻo ʻeku foki mai mei he ngāue fakafaifekaú, naʻe kamata ke u faingataʻaʻia ʻi hono lau e folofolá.
Naʻá ku lau e folofolá ʻi he ʻaho kotoa pē ʻi heʻeku ngāue fakafaifekaú mo tukupā ke hokohoko atu ia ʻi heʻeku foki ki ʻapí. Ka ʻi he fakalau ʻa e taimí, naʻe lahi e ngaahi meʻa naʻe hokó. Kapau pē naʻe ʻikai lahi ʻeku ngāue fakaako mei ʻapí, naʻá ku fuʻu moʻumoʻua ʻi he ngāué, pe naʻá ku fuʻu helaʻia pē. ʻI he ʻuhinga takitaha, naʻe hōloa ai ʻeku lau folofolá ʻo aʻu ki ha taimi naʻe tātātaha pē ke u toe lau ia.
Naʻá ku fakaava hake e Tohi ʻa Molomoná ʻi ha pō ʻe taha mo palani ke u lau ha foʻi veesi pē ʻe taha. Naʻe fakamanatu mai ʻe he veesi naʻá ku laú ʻoku maʻu ʻi he ngaahi folofolá ʻa e “folofola fakafiemālie ʻa e ʻOtuá, ʻio, ʻa folofola ko ia ʻoku fakamoʻui ʻa e laumālie kuo kafó” (Sēkope 2:8).
Naʻá ku fakalaulauloto ki he veesi ko ʻení peá u fakatokangaʻi e ngaahi uesia kovi ne u maʻu mei hono liʻaki ʻo e lau folofolá. Naʻá ku ongoʻi loto-hohaʻa ange ʻi he akó, taʻetokanga ange ʻi he lotú, mo toe mamaʻo ange mei he ʻOtuá. Naʻe fie maʻu ʻe hoku laumālié e folofola fakamoʻui ʻa e ʻOtuá ʻa ia ʻoku maʻu ʻi he ngaahi folofolá. Naʻá ku ʻilo naʻe fie maʻu ke toe fokotuʻutuʻu e ngaahi meʻa ʻoku ou fakamuʻomuʻá.
Naʻá ku tafoki ki hoku ngaahi kaungāmeʻá, fāmilí, mo e kau taki ʻo e Siasí ʻo kole ha ngaahi fokotuʻu ke fakamālohia ʻaki ʻeku lau folofolá. Naʻá ku maʻu ha ngaahi meʻa ʻe tolu naʻá ne tokoniʻi au.
ʻUluakí, naʻá ku ʻiloʻi naʻe ʻikai sai ʻeku ako folofola ʻi he poʻulí. ʻOku ou lava ʻi heʻeku ako he pongipongí ʻo fakalaulauloto ʻi he toenga ʻo e ʻahó ki he tokāteline mo e ngaahi tefitoʻi moʻoni naʻá ku lau ʻi he pongipongi ko iá.
Uá, ʻoku akoʻi kitautolu ke tau lau fakataha e folofolá mo hotau ngaahi fāmili, ka koeʻuhí ko ʻeku ʻi he akó mo mamaʻo mei hoku fāmilí, naʻe kamata ke u lau e folofolá mo hoku ngaahi kaungālokí mo e kaungāmeʻá. Naʻe tokoni ʻeni ke u ongoʻi haʻisia, pea naʻe tupu mei ai ha ngaahi fealēleaʻaki lahi fekauʻaki mo e ongoongoleleí.
Tolú, naʻe kamata ke u hiki e ngaahi ongo mo e ngaahi fakakaukau naʻá ku maʻu lolotonga e ako folofolá. Naʻe tokoni ʻeni ke u tokanga taha ki he meʻa naʻá ku laú mo tokoni ke u fakatokangaʻi ange e leʻo ʻo e Laumālié.
ʻI he toe hoko ʻa e ako folofolá ko ha meʻa mahuʻinga ʻi heʻeku moʻuí, naʻá ku fakatokangaʻi ai naʻe lahi ange e taimi mo e ivi naʻá ku maʻu ke fakakakato e meʻa kotoa pē naʻá ku fie maʻu ke faí. Kae meʻa tēpuú, naʻá ku toe ongoʻi ofi ange ki he ʻOtuá ʻi heʻeku lau mo fakalaulauloto ki he folofolá. ʻI heʻeku fakaʻaongaʻi hoku taimí ki he folofolá, ʻoku ou ongoʻi ai ha nonga mo maʻu ha fakamoʻui ki hoku laumālié.