Ko e Fili ʻa Mātení
ʻOku nofo ʻa e ongo faʻu tohí ʻi ʻIutā, USA.
Naʻe ʻiloʻi ʻe Māteni ʻoku ʻikai totonu ke ne inu tī. Ko e hā ʻoku totonu ke ne faí?
“Faitotonu, Tuʻu maʻu he moʻoní” (Tohi Hiva ʻa e Fānaú, 81).
Naʻe ʻāʻā māmālie hake ʻa Māteni. Naʻe fafangu ia heʻene fineʻeikí.
Naʻá ne pehē ange, “Māteni kuo taimi ke ke ʻā hake.”
Naʻe mili ʻe Māteni hono matá ke ʻāʻā lelei. Naʻe kei pōpōʻuli pē ʻa e langí, ka naʻá ne ʻiloʻi pē e taimí. Naʻe ʻā hono fāmilí he 5:30 ʻo e pongipongi kotoa ke lau fakataha e Tohi ʻa Molomoná. Naʻe ʻikai ke faingofua maʻu pē ʻa e ʻā pongipongiá.
Naʻe tuʻu ʻa Māteni mei he mohengá ʻo luelue māmālie ki he loto falé. Naʻá ne fao mo mamao leʻolahi. Naʻe mataʻi fiemohea mo hono ngaahi tokouá mo e tuofāfiné, ka naʻa nau kātoa pē ai.
Naʻe laukonga taki miniti ʻe nima ʻa e tokotaha kotoa pē. ʻI he kamatá naʻe toe fie foki pē ʻa Māteni ia ʻo mohe. Ka naʻá ne fakafanongo pē. Naʻe hangē naʻá ne maʻu ha ongo ʻoku lelei angé ʻi he ʻosi e foʻi veesi kotoa pē. ʻI he taimi pē naʻe ʻosi ai ʻenau lautohí, naʻe ongoʻi ʻe Māteni ʻoku mālohi hono laumālié.
Pea ko e mālohi fakalaumālié ko ha meʻa ia naʻe fie maʻu ʻe Māteni ʻi he ʻaho kotoa pē. Naʻe tokosiʻi pē e tamaiki Siasi ʻi he toʻu ʻo Mātení ʻi Keniā, pea naʻe mamaʻo e feituʻu naʻa nau nofo aí. ʻI he tuku ʻa e akó naʻe ʻalu ʻa Māteni ki ha kalapu maʻá e tamaiki tangatá naʻe tokangaʻi ʻe he siasi Katoliká. ʻI ha uike ʻe taha naʻe ʻalu ai ʻa e kalapú ʻo kemi.
Naʻe fakalataʻia ʻaupito ʻa Māteni ai. Naʻá ne hiva ha ngaahi hiva kemi. Naʻá ne tutuʻu e ʻū kupuʻi ʻakaú. Naʻá ne tokoni foki ki he tafu e afí.
Ka ʻi he ʻaho hono uá, naʻe haʻu ha taha ʻo e kau taki kemí mo ha tīpota. Naʻá ne pehē ange, “Te tau inu tī leva he taimí ni.”
Naʻe fiefia e tamaiki kehé. Naʻa nau toki inu tī pē ʻi ha meʻa mahuʻinga ʻe hoko. Naʻa nau taki taha toʻo mai ʻene ipu pea tatali ki he takí ke ʻutu ia.
Naʻe kiʻi ongoʻi lotosiʻi ʻa Māteni. Naʻá ne ʻiloʻi ʻoku ʻikai totonu ke ne inu e tií. Ka naʻe ʻikai ke ne loto ke lotomamahi hono ngaahi kaungāmeʻá.
Ka naʻá ne manatuʻi hake ʻene ongo ʻi he taimi naʻá ne tauhi ai e ngaahi fekaú. Ko e taimi naʻe talangofua ai hono fāmilí ki he palōfitá ʻo lau fakataha e Tohi ʻa Molomoná, naʻá ne ongoʻi fiefia. Ko e taimi pē naʻe ʻikai ke nau fai ai iá, naʻe ʻikai ke ne fiefia.
Naʻe ʻiloʻi ʻe Māteni ʻa e meʻa naʻe pau ke ne faí.
ʻI he taimi naʻe aʻu mai ai ki he ipu ʻa Mātení naʻá ne pehē ange ki he takí, “ʻIkai, malō pē.” “ʻOku ʻikai ke u fie inu tī.”
Naʻe ʻohovale ʻa e takí, ka naʻá ne ʻoange pē ha ipu vai ʻa Māteni kae inu tī pē e toengá. Naʻe fie ʻilo ʻe ha niʻihi ki he ʻuhinga naʻe ʻikai fie inu tī ai ʻa Mātení, ka naʻe ʻikai ke manukiʻi ia ʻe ha taha. Naʻe fiefia ʻa Māteni. Naʻá ne ʻiloʻi ʻe tokoni e Lea ʻo e Potó ke mālohi hono sinó. Pea naʻá ne fiefia ʻi heʻene toʻa feʻunga ke fai ʻa e meʻa ʻoku totonú.