Hoko ʻo Hangē ko Sipiloní
Fai ʻe ʻEletā Michael T. Ringwood
ʻO e Kau Fitungofulú
“ʻOku ou pehē kiate koe, ʻe hoku foha, kuó u ʻosi maʻu ʻa e fuʻu fiefia lahi ʻiate koe, koeʻuhi ko hoʻo faivelenga mo hoʻo tōtōiví” (ʻAlamā 38:3).
Ko ʻeku tangata toʻa ʻi he Tohi ʻa Molomoná ko Sipiloni. Naʻá ne fai lelei moʻoni. Naʻe ʻikai ke ne hohaʻa ki he fakakaukau ʻa e niʻihi kehé fekauʻaki mo iá. Naʻá ne tokanga pē ke talangofua ki he Tamai Hēvaní. Naʻe falala ʻene tamai ko ʻAlamā ko e Siʻí kiate ia. Naʻe fiefia ʻaupito ʻa ʻAlamā ʻi he tauhi ʻe Sipiloni ʻa e ngaahi fekaú talu mei heʻene kei siʻí (vakai ʻAlamā 38:2).
Pea naʻe fili maʻu pē ʻe Sipiloni ʻa e totonú. Naʻá ne tokoni ki he niʻihi kehé koeʻuhí naʻá ne ʻofa kiate kinautolu pea koeʻuhí naʻá ne ʻofa ki he ʻOtuá. Naʻá ne fai ʻa e meʻa naʻe totonú koeʻuhí naʻá ne ʻiloʻi naʻe totonu ia. Naʻe ʻikai ke ne feinga ke maʻu ha pale.
ʻI heʻeku ngāue fakafaifekau ʻi Kōleá, naʻá ku ngāue fakataha ai mo ha faifekau naʻe hangē ko Sipiloní. Naʻá ne faivelenga mo talangofua ki he Tamai Hēvaní. Ka naʻe pehē ʻe he kau faifekau kehé naʻe ʻikai ko ha faifekau lelei ia. Naʻá ku fakaʻamu ke nau ʻiloʻi naʻe hala ʻenau fakakaukau kiate iá! Ka naʻe pehē mai ʻe heʻeku palesiteni misioná, “ʻOku ʻafioʻi ʻe he Tamai Hēvaní ko ha faifekau lelei ia, pea ʻoku pehē pē mo au. Pea ko ʻeni ʻokú ke ʻiloʻi mo koe, ko e hā mo ha toe meʻa ʻe mahuʻinga ange?”
Mahalo te tau fakakaukau ʻoku fuʻu faingataʻa ke tau hangē ko Sipiloní ʻo fai e meʻa ʻoku totonú koeʻuhí pē ʻoku totonu. Ka ʻe lava ʻe he ongoongoleleí ʻo tokoniʻi kitautolu! Ko e taimi ʻoku papitaiso ai kitautolú, ʻoku kamata leva ke tau hoko ko ha kakai lelei ange. Ko e taimi ʻoku tau maʻu ai e sākalamēnití, ʻoku fakafoʻou ʻetau ngaahi fuakavá. Te tau lava ʻo hoko ʻo hangē ko ia ʻoku finangalo ʻe he Tamai Hēvaní maʻatautolú.