Ko Hoku Fuofua Taimi ʻi he Temipalé
ʻOku nofo ʻa e taha naʻá ne faʻú ʻi Kolatopa, ʻĀsenitina.
Naʻá ku fie aʻu tonu ki he temipalé, kae ʻikai ko ha fanongo talanoa pē ʻi he ngaahi aʻusia ʻa e niʻihi kehé.
ʻI heʻeku taʻu 16, naʻe fanongonongo mai ʻe he kau palesitenisī ʻo e siteikí ʻe ʻaʻahi homau siteikí ki he temipale ʻi Puenosi ʻAilisí, pea naʻe fakaafeʻi au ke u ʻalu ai. Naʻá ku tānaki leva ha paʻanga mo ngāue mālohi ke u taau ke maʻu ha lekomeni temipale.
Hili pē hono maʻu ʻeku lekomení, naʻe ʻahiʻahiʻi lahi au ʻi he ngaahi founga kehekehe, ko e ʻuhinga kotoa pē ia ke mole ʻeku tuʻunga tāú. Ka naʻá ku maʻu ha holi ke ʻalu ki he temipalé. Naʻe ʻikai ke u fie fanongo ki he aʻusia mo e fakamoʻoni ʻa e niʻihi kehé, naʻá ku fie aʻu tonu pē mo maʻu ha fakamoʻoni ki ai.
Ne hokosia e pō ke mau fononga aí. Naʻe aʻu pē ki he taimi ke u heka ai ʻi he pasí, naʻe veiveiua ʻeku fakakaukaú, ka naʻe ʻikai ke u tukulolo ki ai. Lolotonga e fononga houa ʻe 10, naʻá ku tangutu fakataha mo ha tokotaha Siasi ʻa ia naʻá ne anga fakakaumeʻa ʻaupito. Naʻá ne ʻi he taʻu 60 nai. Naʻá ne talanoa kau ki heʻene moʻuí mo ʻene fiefia koeʻuhí ko e ngaahi faingataʻa kuó ne fehangahangai mo iá.
Ne u kamata talanoa ange kau ki heʻeku moʻuí mo ʻeku ongoʻi tuēnoa koeʻuhí kuo fakamamaʻo e niʻihi tokolahi meiate au ʻi heʻeku muimui ki he ʻOtuá. Naʻá ne talamai kiate au, “ʻE foaki atu ʻe he ʻOtuá ha kaungāmeʻa lelei, pea ko hoʻo kaungāmeʻa ko iá te ne tokoniʻi maʻu pē koe. ʻOua naʻa ngalo ia.” ʻI he hili ʻene lea ʻaki ‘a e ngaahi leá ni, naʻá ku ongoʻi nonga mo fiemālie koeʻuhí na‘á ku ongoʻi naʻe moʻoni ʻene meʻa naʻe talamaí.
Ko e taimi ne u hū ai ki he temipalé, naʻe mōlia atu e ongoʻi faingataʻaʻiá. Ne hangē naʻe ʻi ai ha fakafeʻiloaki fakalaumālie naʻe pehē mai, “ʻE hoku foha, ʻoku talitali lelei koe. Kuo fuoloa ʻeku tatali atu kiate koé.”
Naʻá ku ongoʻi ko e temipalé ko e fale moʻoni ia ʻo e ʻOtuá, kae ʻikai ko ha fakamatamatalelei pē. Hili hano fakahoko ha ngaahi papitaiso mo ha hilifakinima, ne u hū leva ki tuʻa. Ne u ongoʻi ne toe foki mai e mafasiá, ka naʻá ku ongoʻi kuó u maʻu e mālohi ke ikunaʻi iá.
ʻOku ou ʻiloʻi ko ʻetau mateuteú mo e falala ki he ʻOtuá mo fai hotau lelei taha ke hū ki he temipalé ko e meʻa ia ʻoku fie maʻu ke tau faí. ʻOku mohu tāpuekina leva kitautolu ʻe he ʻOtuá.