Toʻu Tupú
Ko Ha Faifekau Hala Pine
ʻOku nofo ʻa e tokotaha naʻá ne faʻú ʻi ʻIutā, USA.
ʻOku ʻi ai ʻeku faiako ʻi he akó ʻokú ne maʻu e faʻahinga ʻulungaanga ʻe lava pē ke manavahē ai ha taha ʻoku fakafetau kiate ia ʻi ha kaveinga. ʻI ha ʻaho ʻe taha ne mau kamata talanoa ai kau ki he kau faifekau ʻo e Siasí. Naʻá ku ʻiloʻi ne u mei tali ʻene fehuʻí, ka naʻá ku ongoʻi pē ke tuku. Ko ia ne u ʻoange pē ha tali feʻunga ke ne fiemālie ai.
ʻI he ngaahi uike hono hokó naʻe ʻikai malava ke toʻo ʻeku fakakaukaú mei heʻemau talanoá. Naʻe faifai peá u fakakaukau ʻoku totonu ke u ʻoange ha Tohi ʻa Molomona kiate ia pea fakaʻilongaʻi ai ʻa e ngaahi kupuʻi lea fekauʻaki mo e ngāue fakafaifekaú. Ne u manavasiʻi he foʻi fakakaukau ko iá, ka naʻe ongo mālohi ia. Naʻá ku ʻiloʻi ko ha ueʻi fakalaumālie ia kuo pau ke u muimui ki ai.
Hili nai ha māhina ʻe ua, naʻá ku mateuteu mo e Tohi ʻa Molomoná. Naʻá ku ongoʻi mafasia lahi ʻi he ʻaho kakato ko iá ʻi heʻeku fakakaukau ki he tohi ʻi heʻeku loto kató. Ko e sēkoni ʻe tolu ko ia ne u ʻoange ai ʻa e tohí kiate iá kimuʻa pea tutuku e akó ki he faʻahitaʻu momokó, ko e taimi fakamanavahē taha ia ki heʻeku moʻuí.
ʻI he fuofua ʻaho ne fokotuʻu ai e akó, naʻá ku fakalaka ʻi hono loki akó ka naʻá ku fuʻu manavahē ke u hū ki loto. Ne u fanongo atu leva naʻá ne ui mai au, peá ne mono mai ha kaati. Naʻá ku lau ia ʻi he holó. Naʻá ne tohi ai kuó ne fakamoleki “ha taimi lahi” ke ako ʻa e ngaahi potu folofola ne u fakaʻilongaʻí, pea naʻe kamata ke mahino kiate ia ʻa e meʻa ʻoku ou tui ki aí.
ʻOku ou fiefia he taimí ni ke vahevahe ʻa e ongoongoleleí, pea ʻoku ou toe fiefia ange ke u tokoni ki he Tamai Hēvaní ʻi haʻaku ngāue fakafaifekau ʻi he kahaʻú.